Jólasveinninn dreginn til yfirheyrslu

 

Enn einu sinni hefur Ástþóri Magnússyni verið varpað í dýflissu. Síðast var það árið 2002 þegar hann varaði við hryðjuverkaárásum á íslenskar flugvélar og stöðvaði með háværum mótmælum þá fyrirætlun stjórnvalda að senda vopn og hermenn með farþegaflugvélum Icelandair til Írak.

Að launum fyrir þá viðvörun sína var sveinki látinn dúsa í einangrun í myrkvuðum turnklefa á Litla Hrauni með rottum og kakkalökkum dögum og vikum saman uppá vatn og bónusbrauð og húðstrýktur reglulega með hnútasvipum og gaddakylfum og látinn hlusta á ræður Halldórs Ásgrímssonar kvölds og morgna af segulbandi. Þegar honum var loks hleypt út var hann ekkert nema skinn og bein. Hafði lést um 55 kíló. Var kominn niður í 130 kíló.

Í gær gerðist svolítið svakalegt: Við sveinki sátum á hinum virðulega hákúltúrveitingastað í Byko og sveinki var að skófla í sig kjötbollum og rjómabollum í góðu jólastuði þegar Víkingasveitin birtist grá fyrir járnum og kom honum í ennþá meira stuð með því að gefa honum rafbyssuskot beint í vömbina. Jólasveinninn hentist á gólfið og tók þar nokkra hressilega krampakippi þannig að belgurinn gekk í öldum einsog vatnsrúm. Svo lá hann hreyfingarlaus og stjarfur um stund með útglennt augun. Þau eru nú venjulega á stilkum þannig að ég veit ekki hvort það var óheillamerki eða ekki. Úr munnvikunum lak froða. Nú eða rjómi. Nei, ef þetta hefði verið rjómi þá hefði hann nú örugglega sleikt útum. Því næst var hann handjárnaður og fótjárnaður og dreginn á hárinu og skegginu uppá lögreglustöð til yfirheyrslu.

Sveinki hafði víst trassað að mæta í skýrslutöku vegna gruns um að standa að menningarveftímaritinu sorprit.com. Hreinn Loftsson fyrrum stjórnarformaður Baugs og fyrrum DV-eigandi og fyrrum Davíðsvinur vill meina að sveinki standi á bak við það rit og að þar séu ærumeiðandi ummæli að finna, og hafði lagt fram kæru á sveinka svínaskelfi.

Ég fór að heimsækja Ástþór í dýflissuna stuttu eftir að hann var tekinn til fanga. Hann sat þar margkeflaður við tréstól með brunablöðrur á andlitinu vegna hitans frá yfirheyrsluljóskastaranum. Ég spurði hvort hann brynni ekki í skinninu að losna og hvort honum væri ekki heitt í hamsi og hvort hann vanhagaði um eitthvað. Hann stundi flögnuðum vörum: "Vatn. Ég er að deyja úr þorsta." Ég átti ekkert vatn að gefa honum en tróð þess í stað uppí hann lúku af salthnetum sem ég var með á mér. Ég hélt fyrir munninn á honum svo hann kyngdi örugglega og að ekkert færi til spillis. Að því loknu spurði ég hann hvað hann hefði sagt löggunni varðandi sorprit.com. Hann sagðist hafa svarað öllum spurningum lögreglunnar á þessa leið, í alvöru:

"Ég mun engu svara ykkur í lögreglunni fyrr en þið hafið tekið fyrir allar mínar kærur á hendur DV." 

"Og afhverju hefur lögreglan ekki tekið fyrir allar þínar kærur á hendur DV," spurði ég.

"Það er vegna þess að svín eru rétthærri jólasveininum hér á Íslandi."

"Afhverju segirðu að Hreinn Lofts og þeir á DV séu svín? DV hefur nú verið ötult við að berja á bankaræningjunum."

"Ég finn það á lyktinni. Það er ekki hreint loft í kringum Hrein Lofts. Farðu inná sorprit.com. Þar geturðu fræðst um útrásarsvínin, fjölmiðlasvínin og önnur svín. Svínin mega ljúga uppá alla en enginn má segja sannleikann um svínin," hrein jólasveinninn.

 

Á sama tíma og jólasveinninn sat þarna múlbundinn og emjandi einsog stunginn grís sá ég út um gluggann hvar útrásarbankaræningjasvínaglæpagengið alltsaman gekk skælbrosandi framhjá lögreglustöðinni í sólinni og veifaði löggunni. Líklegast á leið í einhvern bankann að hreinsa upp restina sem þeir gleymdu. Löggan veifaði á móti.

Þennan sama dag og Ástþór var tekinn til yfirheyrslu vegna meiðyrðaákæru og einhverra óvarlegra ummæla um útrásarsvínin og fleiri slíka þá kom í fréttum að Kaupþing hefði nokkrum dögum fyrir hrun lánað eigendum bankans og tengdum aðilum 450 milljarða króna. Daginn eftir þann gjörning ákváðu Kaupþingsmenn að afnema persónulegar ábyrgðir lykilstarfsmanna bankans vegna lána hlutabréfakaupa í bankanum. Frekar svínslegt alltsaman. En þessir höfðingjar skarta stórriddarakrossum og skálkaorðum og ganga skartklæddir um götur borgarinnar frjálsari en nokkrir aðrir ránfuglar.

 

Í dag, þriðjudaginn 4. janúar klukkan 4, verður sveinki svínaskelfir í þriggja gráðu yfirheyrslu á Sögu hjá Arnþrúði Karls og Pétri Gunnlaugs. Ekki missa af því. Líklegast í síðasta skipti sem Ástþór nær að tjá sig um útrásarsvínin og stjórnmálasvínin því nú ætla Vinstri grænir að teipa fyrir kjaftinn á fjölmiðlum og þjóðinni með glænýju fjölmiðlafrumvarpi svo þeir geti svínað á alþýðunni í friði.

Ástþór færður til skýrslutöku

Athugasemdir

[Sævar Einarsson, 4.1.2011 kl. 07:08]

Hreinn Loftson að berjast við vindmyllur, skyldi hann hafa fengið það í föðurarf ? og farðu nú að samþykkja mig á facebook.

[Sverrir Stormsker, 4.1.2011 kl. 07:36]

Sævarinn, ég á eftir að samþykkja 700 manns á facebook. Tók rispu fyrir stuttu og samþykkti 1000, en er voðalega latur við þetta og er ekki mikið þarna inni, en skal að sjálfsögðu þefa Sævarinn uppi og samþykkja með glöðu geði. 

[Helga Kristjánsdóttir, 5.1.2011 kl. 02:21]

Ég ætlaði  og ætla að kaupa nýjasta diskinn þinn,en honum verður að fylgja,eigin handaráritun(á,átti að koma á óvart.) til sonar míns.(skyldist að þú værir í Asíu).            Ef þú ert  minnugur, hljóp stráksi niður til að sjá þig og heilsa í Hýsingu Skútuvogi. P.S. er líka löt á facebook,kíki bara til að sjá hvað afkomendurnir eru að bralla.

[Haraldur Baldursson, 5.1.2011 kl. 09:20]

Ég trúi öllu úr þessari grein. Heppilegt þetta með salthneturnar :-)
Þetta er bráðskemmtileg færsla um hundleiðinlegt einelti á léttbrjáluðum manni í kolklikkuðu landi... (+)*(-)*(-)=(+)

[Sverrir Stormsker, 5.1.2011 kl. 20:04]

Helga, jújú, ég man eftir stráksa. Ég skal að sjálfsögðu græja áritaðan disk handa stráksa. Skelltu bara símanúmerinu eða emailfanginu þínu hér á athugasemdasvæðið og ég hef samband og við reddum þessu fyrir stráksa. Ekki flóknara en það. Kær kveðja til stráksa.

[Sverrir Stormsker, 5.1.2011 kl. 21:10]

Haraldur, takk fyrir það. Skrítið að það skuli alltaf verið að stinga Ástþóri í steininn. Fyrir bragðið á hann náttúrulega mun auðveldara með að berja hausnum við steininn en það réttlætir samt ekki þetta einelti eða tvíelti eða hvað þetta kallast nú.

[Helga Kristjánsdóttir, 6.1.2011 kl. 00:31]

 Flott, 5872192--  verðum með 13 gleði annaðkvöld, ég er samt ekkert að reka á eftir ég kem með Evrurnar borga og fer glöð með gersemin.

[Ómar Ingi, 7.1.2011 kl. 00:41]

Shiiiiiiiiii