Geiri á Goldfinger. Minningargrein

Stormsker og Geiri GoldÞað eru orðin um 25 ár síðan ég kynntist Geira. Hann rak þá Næturgrillið í Kópavogi og þar pantaði maður sér oft staðgóðan morgunverð um helgar þegar maður var að vakna á kvöldin. Kjúkling og vodka. Skömmu síðar fór Geiri í útrás og flutti starfsemi sína alla leið til Reykjavíkur. Þar opnaði hann hámenningarmiðstöðina Skipperinn og svo 5 stjörnu restaurantinn Hafnarkrána sem sérhæfði sig í ristabrauði og landa í kók.

Geiri var ekki bara góður vinur minn heldur líka vinur litla mannsins, og þá er ég ekki að tala um Þór Saari, heldur þá sem minna máttu sín. Ég býst við að það hafi verið sælt að vera miðbæjarróni þegar Geiri átti Hafnarkrána því á hverjum degi í hádeginu gaf hann ógæfumönnum súpu sem hann mallaði í myndarlegum mannætupotti. Árið 1996 sat hann sjálfur í þessari súpu þegar staðurinn fór á hvínandi hausinn og hann með. Hann var með tvær hendur tómar og einn haus fullan af hugmyndum. Þessar tvær tómu hendur dönsuðu eftir höfðinu og hann lét þær standa fram úr ermum og opnaði skömmu síðar Maxim´s í Hafnarstræti sem hann kjaftfyllti af peningum og súludansandi englakroppum. Hinn siðavandi kappklæddi R-listi sem þá var við völd mátti ekki til þess hugsa að líf væri í borginni, hvorki fjármálalíf, skemmtanalíf, mannlíf né móðurlíf, og flæmdi þetta fyrirtæki eins og önnur vel rekin fyrirtæki uppí Kópavog hvar Geiri opnaði Goldfinger. Eftir það varð kallinn draumur allra tengdamæðra og átrúnaðargoð allra feminista.

Jón Ólafs, Geiri og StormskerMér þótti afar vænt um þennan sællega síkáta vin minn. Hann var óneitanlega mikill vinur vina sinna. Bjallaði oft í mig aðeins til að spyrja hvort allt væri ekki í orden og hvort hann gæti ekki gert eitthvað fyrir mig. Við áttum saman ótal stundir hér heima og erlendis sem voru hver annarri skemmtilegri og óprenthæfari í virðulegt blað einsog Moggann.

Geiri byrjaði jafnan setningar sínar á: “Ég skal segja þér það...” Fyrir um mánuði sagði hann við mig: “Ég skal segja þér það að ef einhver skrifar ævisögu mína þá verður það þú. Það versta er að þú veist alltof mikið um mig. Það gengur ekki.” Og svo skellihló hann.

Hneykslunargirni og tepruskapur eru orð sem lýsa Geira ekki mjög vel. Honum leiddist ekki að vera innanum góða glæpamenn og fagrar dömur, jafnvel þótt þær væru í fötum. Hann fór aldrei í manngreinarálit og vinahópur hans samanstóð af háum og lágum, allt frá lögfræðingum og alþingismönnum uppí heiðarlega sómamenn.

geiri_erpur_og_stormsker_03_08_10.jpgÞað er seint hægt að saka Geira um að hafa verið venjulegur, flatur, smáborgaralegur persónuleiki, enda “normal” fólk það alleiðinlegasta stóð sem þrífst undir sólinni. Af einhverjum ástæðum virðist ég draga að mér manngerðir sem fólk almennt kallar “furðufugla.” Geiri Gold var einn skrautlegasti páfuglinn í prumphænsnakofanum Íslandi. Gull af manni. Hafði stórt og mikið gullhjarta sem maður hefði haldið að gæti ekki slegið feilpúst, en svo bresta gullhjörtu sem önnur hjörtu.

Blessuð sé minning þessa litríka skemmtilega góða vinar. Börnum hans og allri hans stórfjölskyldu votta ég mína dýpstu samúð.

 

(Þessi minningargrein birtist í Morgunblaðinu í morgun).


« Síðasta færsla | Næsta færsla »

Athugasemdir

1 Smámynd: Reynir Hugason

Helvíti góð eftirmæli!

Reynir Hugason, 2.5.2012 kl. 10:37

2 Smámynd: Þorsteinn Valur Baldvinsson

Við Geiri vorum saman til sjós á varðskipi á árabilinu 1972-4 og skemmtilegri mann var varla að finna, honum sárnaði samt þegar breskur dráttarbátur minnkaði eldhúsið um meira en helming við eina ásiglinguna.

Það var gæfa að kynnast Geira og margan tók hann undir vænginn til að verja en fékk ekki alltaf verðskuldaðar þakkir fyrir.

Þorsteinn Valur Baldvinsson, 2.5.2012 kl. 11:19

3 Smámynd: Sverrir Stormsker

Reynir, takk fyrir það.

Sverrir Stormsker, 2.5.2012 kl. 14:11

4 Smámynd: Sverrir Stormsker

Þorsteinn, hann sagði mér einmitt að þegar hann hefði verið skipskokkur þá hefði hann nú étið mest af matnum sjálfur einsog sjá mætti á honum.

Tek undir með þér að það var erfitt að finna skemmtilegri mann.

Sverrir Stormsker, 2.5.2012 kl. 14:15

5 Smámynd: Axel Jóhann Axelsson

Besta minningargrein sem sést hefur í langan tíma, ef önnur betri hefur þá verið skrifuð.

Axel Jóhann Axelsson, 2.5.2012 kl. 14:15

6 Smámynd: Ásdís Ásgeirsdóttir

Sverrir....Þú ert gullmoli

Ásdís Ásgeirsdóttir, 2.5.2012 kl. 20:54

7 Smámynd: Sverrir Stormsker

Axel, ekki gleyma minningargrein minni um Ósóma bin Lasinn

Sverrir Stormsker, 3.5.2012 kl. 06:21

8 Smámynd: Sverrir Stormsker

Ásdís, ég þakka...en "normalt" fólk myndi nú frekar segja að ég væri bullmoli. X

Sverrir Stormsker, 3.5.2012 kl. 06:25

9 Smámynd: SVR

Bullmolin Sverrir Stormsker !
Ég skal segja þér það......að betra verður ekki að orði komist, nema þá kannski "Oft vita kokkar hvernig allt er í pottinn er búið"

SVR, 5.5.2012 kl. 02:48

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband