Andlegir öreigar allra vinstriflokka sameinist

Enginn munur á kynjunumAllir flokkar á Íslandi í dag eru pólitískt rétthugsandi vinstriflokkar, nema ef vera skyldi Miðflokkurinn, en þó gerðist það fyrir nokkrum vikum að kjördæmaráðin dúkkulísuvæddu flokkinn og úthýstu úr honum mörgum góðum og gegnum hægrisinnuðum farsælum bjórbelgjum og þjóðhollum heilbrigðum „karlrembusvínum“ þannig að nú er svo komið að þessi góði flokkur er ekki svipur hjá sjón og ekki víst að hann muni bera sitt barr eftir þessa femínísku „hreinsun“ sem fólst í að úthýsa sápunni og innleiða óþrifnaðinn eftir ströngustu kynjakvótakröfum nútímageðveikinnar.

 

Fúlt að Miðflokkurinn skyldi falla í þennan fúla ilmvatnspytt.

Hverjum átti þetta að þjóna?

Vinstrimenn ætluðu sér aldrei að fara að kjósa þennan flokk þó hann yrði kjaftfylltur af kellingum og nú hafa fjölmargir hægrimenn snúið við honum bakinu því þeir þola skiljanlega ekki að kyn skuli vera sett ofar hæfni og vilja síst af öllu enn einn femínistaflokkinn.

Þetta var því afleitur afleikur.

 

Sigmundur DavíðÞessi misskilda „hreinsun“ og misheppnaða tilraun til reyna að gera öllum til hæfis og ná til stærri kjósendahóps gerir það að verkum að trúverðugleikinn laskast og flokkurinn mun missa stóran hluta af sínu hægrafylgi og missa sérstöðu sína og missa fótanna og jafnvel detta út af þingi, sem væri mjög slæmt því Sigmundur Davíð Gunnlaugsson er einstakur stjórnmálamaður; frjór, eldklár, rökfastur, íhugull, áræðinn, víðsýnn, vel að sér, lausnamiðaður, fylginn sér, orðheldinn, þjóðhollur og blessunarlega laus við woke-ruglið, glóbalismann og rétttrúnaðinn sem tröllríður öllu í dag.

En náði tröllríðandi femínisminn að koma aftan að honum?

Varð hann að beygja sig fyrir valdi kyngreinandi kjördæmaráðanna?

Þurfti hann að beygja sig eftir sápunni í sturtuklefa rétttrúnaðarins?

 

 

Niðurskurður í Flokki fólksinsFlokkur fólksins eða Flokkur fólsins?

Sömuleiðis væri sárt að missa Flokk fólksins af þingi því þau eru heiðarleg og sönn í því sem þau eru að gera og enginn þarf að efast um vilja þeirra til góðra verka. Flokkurinn væri eflaust stærri ef Inga Sæland hefði sleppt því að skera hann í sundur og minnka hann um helming.

Þá óheppilegu skurðaðgerð framkvæmdi hún vegna þess að tveir af hennar mætustu mönnum leyfðu sér að efast um stjórnunarhæfileika hennar og fengu sér örlítið messuvínstár í afar vel heppnuðu samsæti á Klausturbar.

 

FólksflokkurinnSömuleiðis er hæpið að hún græði mikið á því að nota hvert tækifæri sem gefst til að hnýta í Sigmund Davíð af öllum mönnum. Það var ekki hann sem sagði í hófinu góða að hún væri „húrrandi klikkuð kunta“ heldur var það samflokksmaður hans, Bergþór Ólason, sem er kunnur fyrir mannþekkingu, háttprýði og varfærni í orðavali þó hann hafi þarna kannski sagt eitthvað sem var aðeins orðum aukið.

 

Ingu bættist góður liðsauki í Jakobi F. Magnússyni sem verið er að djöflast á um þessar mundir en hann þekki ég af góðu einu. Þar fer harðduglegur málafylgjumaður og drengur góður þó hann sé krati.

Inga má eiga að það býr í henni eldmóður, líf, ástríða og sannfæringarkraftur enda hefur hún staðið sig best allra leiðtoga í sjónvarpskappræðum að undanförnu.

Flokkur fólksins getur varla talist dæmigerður vinstriflokkur í hefðbundnum skilningi. Ég vona því að hann nái vopnum sínum og óska honum góðs gengis.

 

Political_CorrectnessSjálfstæðisflokkurinn er skásti vinstriflokkurinn

Sjálfstæðisflokkurinn hefur ekki farið varhluta af pólitíska rétttrúnaðinum, woke-vírusnum, glóbalismanum, Kínaveirunni, femínismanum, og öðrum mannskæðum plágum.

Enda fékk flokkurinn taugaáfall þegar Trump sigraði spilltasta skaðræðisvinstrakvendi í heimi, Crooked Hillary, og allur flokkurinn studdi að sjálfsögðu vinstri-pottaplöntuna Sleepy Joe Biden núna síðast.

Þetta er lýsandi fyrir kratamóralinn og meðvitundarleysið í flokknum og sýnir best á hvaða stigi hann er og hvert hann er kominn.

Í rétthugsuninni er hann alveg á pari við Samfylkingarviðreisnarpíratavinstrigræningjana.

 

Politically correctHægrimönnum er ekki lengur vært í Sjálfstæðisflokknum.

Nokkur dæmi:

Á landsfundi fyrir 5 árum voru þeir þjóðhollu eðalhægrimenn, Gústaf Níelsson og Jón Magnússon hrl, baulaðir niður af sviðinu fyrir að tala fyrir varfærni og heilbrigðri íhaldssemi í útlendingamálum.

Fyrir borgarstjórnarkosningar síðustu var Sjálfstæðisflokkurinn í borginni femíniseraður og þá var reynslumiklum hægrikörlum einsog Kjartani Magnússyni fleygt útí tunnu til að skapa pláss fyrir eyrnablautar kratastelpur.

Sigríður ÁiFyrir stuttu var hægrimönnunum Brynjari Níelssyni og Arnari Þór Jónssyni sparkað niður tröppurnar og Sigríði Á. Andersen dúndrað útum gluggann. Alltsaman topp fólk. En hægrisinnað. Það gengur ekki. Ekki í þessum flokki.

Hægrimennska er einfaldlega ekki lengur liðin í Sjálfstæðisflokknum.

Brynjar greyið hefur ekki undan við að samþykkja allskyns kommúnistadellufrumvörp og kyngja ælum í gríð og erg. Hann segir þetta sjálfur.

Hann er ekki aðeins mesti fýlupokinn á þingi, að eigin sögn, heldur er hann orðinn stærsti ælupokinn.

Að mínu mati er Sjálfstæðisflokkurinn engu að síður skásti vinstriflokkurinn því þar á bæ eru menn upp til hópa meðvirkir vinstrimennskunni frekar en sturlaðir vinstrivitleysingar.

 

Húmor cancellaðEru Bernie and Kate - Bonnie and Clyde?

Ég býst við að Bjarni Ben myndi viðurkenna það fúslega að hann hafi beygt sig undir ægivald snargeðveiks tíðarandans og breytt flokknum í femínískan krataflokk pólitískrar rétthugsunar.

Enda kemst ekki hnífurinn á milli hans og Grettis-Kötu, einsog ég kalla hana stundum í gamni, ef það er leyfilegt á þessum woke-tímum. (Ég kalla sjálfan mig stundum Serði Monster).

Það er lítill sem enginn munur á þessum tveimur femínísku vinstriflokkum þeirra Bjarna og Grettis-Kötu og þessvegna gengur samstarfið svona líka ljómandi vel.

 

Bernie, Kate and SissyVerkaskiptingin er skýr: Bjarni sér um viðskiptahlið stjórnmálanna og stjórnmálahlið ættarveldisins og öll corleone-plottin og Grettis-Kata sér um handaböndin við erlenda þjóðhöfðingja og brosgretturnar og geiflurnar og kynræna sjálfræðið og hálendisþjóðgarðinn og fóstureyðingar fram að fæðingu og menningamarxismann og femínismann og kynjafræðina og manngerðu loftslagsbreytingarnar og öll þau stórkostlegu „vísindi.“

 

Sigurður Ingi situr þolinmóður á kantinum og kinkar kolli og mátar sig í huganum í stól Grettis-Kötu með ennþá ógæfulegri vinstristjórn í skjalatöskunni.

 

 

ViðreisnarhóranEn ef stjórnin missir meirihlutann þá væri einfaldast að kippa bara Viðreisn uppí. Viðreisn ber nafn með rentu og er vön að gefa lýðræðinu langt nef og reisa við fallna meirihluta sem fólk er búið að kjósa í burtu.

En „Viðreisn mun selja sig dýrt“ einsog forkonan orðaði það þegar hún fór í bólið með föllnum borgarstjórnarmeirihlutanum.

Forkonan er semsé búin að gefa það út að Viðreisn sé hóra og að þetta sé bara spurning um prís.

Kúlulán gæti dugað.

Gleðihúsið við Austurvöll veldur skiljanlega mörgum ógleði.

 

Allir jafn fátækirVinstrisinnaðir „nýfrjálshyggjuflokkar“

Einn er sá maður sem trúir því að Sjálfstæðisflokkurinn sé hægriflokkur og það er sósíalistaforinginn Gunnar Smári Egilsson. Hann kallar reyndar alla flokka „nýfrjálshyggjuflokka“ sem eru hægra megin við Stalín.

Þetta gerir hann til að skapa sér sérstöðu. Hann vill gera sig að eina valkosti sannra vinstrimanna en auðvitað eru valkostirnir allir hinir 50 vinstriflokkarnir eða hvað þeir eru nú margir.

 

Íslenskur smákóngurÁstæðan fyrir öllum þessa fjölda flokka er ekki málefnaágreiningur heldur sú að allir Íslendingar vilja vera kóngar. Ef það kemur upp minnsta misklíð í flokki þá stofnar fúli froskurinn nýjan flokk utanum sjálfan sig þar sem hann getur verið kóngur í ríki sínu.

Og svo má ekki gleyma að hver flokkur fær gríðarlega styrki úr ríkissjóði og formennirnir feita bónusa þannig að það getur verið góður bissniss að stofna flokk og segjast vera á móti spillingu til að geta komist á kaf í hana sjálfur.

Heiðarleiki hefur aldrei verið sterkasta hlið Íslendinga. Allur heimurinn veit af því.

 

Sósíalismi, ávísun á fátæktGamalt vín á nýjum ólátabelgjum

Undanfarnar vikur hefur Gunnar Smári reynt að vera rólegur og kurteis til að sýna öllum hinum vinstriflokkunum á þingi að hann sé stofuhæfur og stjórntækur.

Hann vill að flokkarnir fái á tilfinninguna að hann sé ekki einsog hver annar ódannaður vanþroska taðreyktur pírapi á sokkaleistunum sem vilji bara öskra sig hásan í stjórnarandstöðu heldur að hann sé siðaður ábyrgur sósíalistaleiðtogi í vandlega útjöskuðum verkamannalörfum sem geti sest niður og rætt ennþá útjaskaðri hugmyndafræði sína af yfirvegun á málefnalegum grundvelli.

 

Sósíalisminn í framkvæmdEn málið er að þegar Smárinn neyðist til að ræða málin á rólegum nótum þá opinberast enn frekar brotalamirnar í stefnu hans. Þessi stefna kemst nefnilega best til tilfinninganna sé hún öskruð með handapati og látum en hún þolir illa vitsmunalega og yfirvegaða umræðu.

 

Sósíalisminn sökkarÞessvegna er Smárinn bestur þegar hann er yfirspenntur og óðamála og frussar orðunum útúr sér einsog vínberjasteinum í heilagri bræði og lætur vaðalinn ganga í belg og biðu og keyrir sig uppí trylling yfir óréttlæti heimsins og arðráni auðvaldsins og hræðilegum kapítalistum sem leyfi sér að græða peninga, og hræsnandi vellauðugum útrásarritstjórum sem komi sér hjá að borga kúguðum starfsmönnum sínum umsamin laun, (hann kannast við það), og hvað það sé nú ömurlega óréttlátt að wannabe-braskarar skuli fljúga um í einkaþotum útrásarvíkinganna á meðan hreingerningakonan lepji dauðann úr skúringafötu o.s.fr. (Hann veit hvað hann er að tala um).

 

 

 

Socialism distancingSósujafnarinn Gunnar Smári

Ég hef lengi haft gaman af Gunnar Smára sósíalista og jafnaðarmanni (sósujafnara) eða hvað hann gefur sig nú út fyrir að vera akkúrat þessa stundina því hann er hugmyndaríkur og klár dellukall og vel að sér og skemmtilegur áheyrnar og góður penni en ég man ekki eftir að hafa verið honum sammála um nokkurn skapaðan hlut, enda er mjög erfitt að fylgja honum eftir í hringlandahættinum því hann hefur eina skoðun í dag og aðra á morgun, bara eftir því hvernig vindurinn blæs og hvað hentar honum best hverju sinni.

 

 

SósujafnarinnÍ fyrradag var hann grjótharður armaníklæddur frjálshyggjumaður og bindisreyrður kapítalisti með handlegginn þakinn Rolex-úrum og vildi einkavæða allt heilbrigðiskerfið í hvelli.

 

Í gær barðist hann fyrir því að Ísland afsalaði sér sjálfstæði sínu og gerðist fylki í Noregi.

 

Í dag er hann allt í einu orðinn lenínskeggjaður sósíalisti í köflóttri snýtuklútaskyrtu og drulluskítugum gámajakka úr Sorpu.

Hann er fljótari en Laddi að skipta um gervi.

 

Sósíalismi fyrir grunnskólabörnHann vill láta færa kosningaaldurinn niðrí 7 ára. Skiljanlega. Grunnskólakrakkar í dag vita nefnilega ekkert um hryllingssögu sósíalismans og munu ekki læra að lesa fyrr en um fimmtugt. Gráupplagður kjósendahópur.

 

Smári segir að kraftur, nýsköpun, frumkvæði og framkvæmdavilji einstaklingsins skipti engu máli í stóru myndinni.

Hann vill drepa niður einstaklingsframtakið en fjölga þess í stað ríkisstarfsmönnum (jökkum á stólum) og vinstrisinnuðum alþingismönnum og vill láta ríkið sjá um alla þætti samfélagsins með tilheyrandi tröllauknum útgjöldum, og miðstýra kerfinu að ofan og ganga á milli bols og höfuðs á stóreignafólki og viðskiptamógúlum og þeim sem skapa verðmæti og draga björg í landsbú.

 

Sósíalisminn og annarra manna peningarHann er á því að það beri að tæma ríkissjóð sem allra fyrst til að byggja upp innviði samfélagsins og fara að safna glæsilegum skuldum að hætti Reykjavíkurborgar.

 

Til að kóróna snilldina þá er hann að sjálfsögðu sammála rétthugsandi vinstriríkisstjórninni um að það eigi að spreða fleiri tugum milljarða í loftslagstrúarbrögðin og flytja inní landið sem allra mest af síðskeggjuðum velferðarflóttabörnum og lúxushælisleitendum því við séum svo ofboðslega rík og svo svakalega gott fólk.

 

Slæmt að gamla fólkið okkar skuli aldrei verða vart við ríkidæmi okkar og meinta góðmennsku.

 

Margprófaður sósíalisminnSósíalistar allra flokka sameinist

Velferðarkerfið fer lóðrétt til helvítis með þessum sósíalísku aðgerðum, sem allir stjórnmálamenn Íslands virðast eindregið hlynntir í sínum funheita rétttrúnaði, að Sigmundi Davíð undanskildum.

Það sem gerist er að Íslendingar verða sameinaðir öreigar og samfélagið morknar niður og deyr drottni sínum (Allah). Engu að síður virðist fólki þykja skynsamlegt að gefa þessari skaðlegu og úrbræddu hugmyndafræði séns í hundraðasta skipti til að athuga hvort að niðurstaðan verði ekki önnur núna.

 

Hugmyndafræði sósíalismansGrunnurinn í trúarbrögðum vinstrimanna er að peningar vaxi á trjánum og þessvegna er þeim líklega svona umhugað um grænu málefnin og trjárækt.

Erfitt er þó að sjá hvernig þeir ætla að fjámagna alla þessa góðmennsku sína og björgun heimsins því vaxtaskilyrði trjáa eru ekki svo góð á köldum Klakanum.

 

Skýrasta merki geðveikinnarSósíalisminn er einfaldlega gjaldþrota stefna sem gerir alla gjaldþrota.

Hann færir ekki alþýðunni feita launaávísun heldur er hann ávísun á tóman sparibauk.

Svo galin er þessi stefna að ég efast ekki um að Sósíalistaflokkurinn verði hástökkvari kosninganna og vinni frækinn sigur.

Það er alltaf pláss fyrir fleiri póitískt rétthugsandi vinstriflokka á Íslandi.

Lengi lifi geðveikin!

 

Open bordersSama hver niðurstaða kosninganna verður þá er 100% öruggt að það verði mynduð vinsristjórn og það er einfaldlega vegna þess að það er enginn hægriflokkur á Íslandi.

Hægriflokkur mun ekki verða stofnsettur og fá brautargengi á Íslandi fyrr en allt góða fólkið í öllum góðu glóbalistavinstriflokkunum verður búið að rústa landinu með open-borders-stefnu sinni og misskilinni góðmennsku og búið að umbreyta Íslandi í Íslandistan.

 

Ef Íslendingar væru ekki þrætugjarnir egósentrískir smákóngar þá væri í raun alveg nóg að vera bara með einn flokk á Íslandi einsog staðan er núna og það væri pólitískt rétthugsandi vinstriflokkur sem gæti kallast Flokkur íslenskra félagshyggjulíberalista, skammstafað: F.Í.F.L.

 

 

(Þessi grein birtist í Morgunblaðinu í morgun).


mbl.is Ríkisstjórnin gæti haldið
Tilkynna um óviðeigandi tengingu við frétt

« Síðasta færsla | Næsta færsla »

Athugasemdir

1 Smámynd: Þorsteinn Briem

Eins og fyrri daginn halda mörlenskir öfgahægrikarlar og aftaníossar Hádegismóra að þeir geti unnið kosningar með stóryrðum, fúkyrðum og smjörklípum, graðgandi í sig súrsaða selshreifa. cool

kép.png

Þorsteinn Briem, 24.9.2021 kl. 12:36

2 Smámynd: Jóhann Elíasson

Þú klikkar aldrei.  Ég hef sjaldan skemmt mér eins vel við að lesa blákaldan sannleik......

Jóhann Elíasson, 24.9.2021 kl. 13:16

3 Smámynd: Ingólfur Sigurðsson

Einstaklega gott að fá aftur pistil frá þér, meistari Sverrir. Einn af mínum uppáhaldstónlistarmönnum frá upphafi, ef ekki sá snjallasti í textagerð.

Ég held að ef Jón Gnarr væri enn í pólitík sæu allir hvað pólitík er í dag - einn stór brandari. (En grátbroslegur).

Ingólfur Sigurðsson, 24.9.2021 kl. 13:19

4 Smámynd: Ómar Geirsson

Yndislegur.

"..vera bara með einn flokk á Íslandi einsog staðan er núna og það væri pólitískt rétthugsandi vinstriflokkur sem gæti kallast Flokkur íslenskra félagshyggjulíberalista, skammstafað: F.Í.F.L."

Takk.

Kveðja að austan.

Ómar Geirsson, 24.9.2021 kl. 18:23

5 Smámynd: Sverrir Stormsker

Þakka ykkur drengir góðir.

Sverrir Stormsker, 24.9.2021 kl. 18:43

6 Smámynd: Karl Löve

Komdu sæll. Ágætur pistill og broslegur á köflum. Mig langaði að athuga hvort þú hefðir áhuga á að fræðast um aðrar þjóðir og stjórnarskrár þeirra. Sé svo þá vildi ég benda þér á stjórnarskrá Venezuela. Kaflar 12 og 13 eru mér sérstaklega hugleiknir því ég vildi fá þá óbreytta í okkar stjórnarskrá. Ég sé hvergi að hægt sé að senda viðhengi með þessu en það væri velkomið að senda þér hana.

Karl Löve, 24.9.2021 kl. 21:45

7 Smámynd: Ásgeir Rúnar Helgason

Þú ert alvöru hægri maðaur. 

Ásgeir Rúnar Helgason, 24.9.2021 kl. 22:29

8 Smámynd: Geir Ágústsson

Pistill ársins.

Geir Ágústsson, 24.9.2021 kl. 23:53

9 Smámynd: Sverrir Stormsker

Karl, já ég hef lesið stjórnarskrá Venuzuela og er sammála þér um að kaflar 12 og 13 eru alveg sérdeilis góðir.

Sverrir Stormsker, 25.9.2021 kl. 20:59

10 Smámynd: Sverrir Stormsker

Ásgeir, maðaur? jebb, alvöru hægri blaðmaur.

Sverrir Stormsker, 25.9.2021 kl. 21:02

11 Smámynd: Sverrir Stormsker

Geir, sammála. Pistill áratugarins. smile

Sverrir Stormsker, 25.9.2021 kl. 21:04

12 Smámynd: Loncexter

Ríkisútvarpsbáknið gæti sparað góðar summur með því að láta Sverri stormsker skrifa næstu 10 áramótaskaup einn og óstuddur. 

Loncexter, 26.9.2021 kl. 11:39

13 Smámynd: Sigurður Kristján Hjaltested

Mikið var nú gaman að fá aftur pistil frá þér Sverrir.

Og eins og venjulega algjör snilld. Sem betur fer eru nú

kosningarnar afstaðnar og rétttrúanðurinn fékk vel á baukinn

og það er bara hið besta mál.

M.b.kv.

Sigurður Kristján Hjaltested, 26.9.2021 kl. 12:44

14 Smámynd: Halldór Jónsson

Bravó fyrir Stormskerinu sem er skemmtilegast penni sem uppi er á Mogganum þó Davíð sé meðtalinn

Halldór Jónsson, 26.9.2021 kl. 15:45

15 Smámynd: Theódór Norðkvist

Snilldarpistill frá þér Sverrir, eins og venjulega. Ég var að spá í að bjóða Gunnari Smára að semja kosningaslagorð fyrir hann. Eitt hefði getað verið svona: Öreigar allra landa sameinist um að fá ekki launin sín greidd. Í samræmi við boðskapinn hefði ég ekki krafist greiðslu fyrir þessa ráðgjöf.

Theódór Norðkvist, 27.9.2021 kl. 22:10

16 Smámynd: Sverrir Stormsker

Loncexter, Sigurður og Halldór, hverju orði sannara hjá ykkur piltar mínir.

Einsog talað útúr mínu hjarta. smile

Sverrir Stormsker, 28.9.2021 kl. 12:59

17 Smámynd: Sverrir Stormsker

Theódór, 10 blaða Smárinn var með þetta slagorð neglt uppá vegg hjá sér á skrifstofunni þegar hann var útgefandi allra þessara blaða sem hann keyrði í þrot, allavega Fréttatímans.

Sverrir Stormsker, 28.9.2021 kl. 13:09

18 Smámynd: Ragnar Kristján Gestsson

Kærar þakkir, ég þurrka tárin úr krókunum eftir hláturinn

Ragnar Kristján Gestsson, 28.9.2021 kl. 16:54

19 Smámynd: Sverrir Stormsker

Ragnar, ég sem var að reyna að vera eins alvarlegur og ég gat.

Geri betur næst.

Sverrir Stormsker, 29.9.2021 kl. 07:47

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband