Bárujárnsbyltingin ríður húsum

Skömmu eftir heimsstyrjöldina síðari kom hingað til lands bandarískur byggingaspesíalisti í “skemmtiferð.” Ekki veit ég hvernig honum datt það í hug, en hann fékk sér víst göngutúr um borgina og skoðaði “húsagerðarlistina.” Eftir upplifunina sagði hann við íslenskan blaðamann: “Djöfull hafiði farið illa út úr stríðinu maður!” Hann gapti af undrun þegar honum var tjáð að það hefði engin sprengja fallið á borgina önnur en sú sem býr í íslensku smekkleysi.
                                                                                   (Íslensk húsagerðarlist)

 

Nú er búið að ákveða að eyða milljarði í kaup og samantjöslun á tveimur þeim aumustu og stagbættustu óþverravinnuskúrum sem sést hafa á byggðu bóli, að skaðbrenndum indíánatjöldum meðtöldum. Í kjölfarið á svo að friða allt annað aldargamalt fúaspýtnarusl og bárujárnsdrasl sem finnst við Laugaveg og nágrenni, fyrir ófáa milljarða.

Sögufrægt ofvitahús Þórbergs Þórðarsonar að Skólavörðustíg 10 er hinsvegar að sjálfsögðu búið að flytja uppí Árbæ eða sprengja í loft upp. Allt samkvæmt alíslenskri smekkvísi og snilld.

 

Á sama tíma og húsafriðunaræði ríður húsum þá er verið að buffa og brytja fólk í smátt í miðbænum og þar með talið á eftirlitsmyndavélalausum Laugaveginum því það eru ekki til peningar í almennilega löggæslu, nema þegar kemur að því að hakka niður vörubílstjóra og þeirra stuðningsmenn sem neita að borga hæsta elsdneytisverð í heimi.

 
Taðreyktir hippar væla um að það beri að friða einhverja rottuholu sem kallast Sirkus og fatta ekki að borgin er einn allsherjar Sirkus. Væri nokkuð galið að byrja á því að friða fólkið í bænum áður en við förum að friða hjallana í bænum? Við eigum ekki að friða kofana fyrr en við höfum efni á að friða fólkið því kofarnir eru til fyrir fólkið en ekki öfugt.

 

 

 

 

 (Þetta fallega hús mætti nú gera

 upp fyrir lítinn pening, svosem 1 milljarð)

 

(Þessi pistill birtist í 24 Stundum 8. febrúar síðastliðinn)

 

Minni vitaskuld á þátt okkar Halldórs E, "Miðjuna," sem er í dag, miðvikudaginn 14. maí, á Útvarpi Sögu 99.4 milli 16:00 og 18:00. Gestur að þessu sinni er Helgi Hóseason, fyrsti og þrautseigasti mannréttindabaráttumaður Íslands. 

Fyrri þætti má heyra á www.stormsker.net 

 

 

Athugasemdir

[Alfreð Símonarson, 14.5.2008 kl. 10:12]

Satt er það að áheyrslurnar eru oft á rongum stöðum, alveg eins og að ríkisstjórnin sé fyrir fólkið en skv stjórnarskránni þá er það ekki. Ég byð að heylsa honum Helga mótmælenda en hann er ein besta fyrirmynd sem Íslnedningar eiga í dag.

Kær kveðja Alli

[Óskar Þorkelsson, 14.5.2008 kl. 10:16]

sammála þér Sverrir, góður pistill að vanda

[Gulli litli, 14.5.2008 kl. 11:26]

[J. Einar Valur Bjarnason Maack , 14.5.2008 kl. 11:32]

Ég er 85% sammála.

Þykir samt verzt að það virðast allir þessir peningamenn ætla að biggja kringlur í stað baranna sem þeir rífa. 

[Ómar Ingi, 14.5.2008 kl. 12:36]

Góður pistill ójá

[...désú (IP-tala skráð) 14.5.2008 kl. 18:36]

Hef enga trú á þessum eftirlitsmyndavélum.  Ég var barinn í buff hér um árið beint fyrir framan eina eftirlitsmyndavélina og þá var mér tjáð að ekkert nýtilegt myndefni hefði náðst þar sem enginn var við tækin að stjórna myndavélinni!  Má ég þá frekar biðja um pappalöggur á götuhornin!

Svo er skemmtilegt frá því að segja að eftirlitsmyndavélaborgin London gaf upp tölur varðandi hversu margir glæpir myndavélar hefðu leyst... minnir að það hafi verið eitthvað hlægilega lítið, 3% eða eitthvað í þá áttina svo ekki eru myndavélar nein allsherjarlausn eins og margir vilja meina.  Lausnin er betra borgarskipulag, sýnileg löggæsla og innræting virðingu fyrir náunganum.  Ást og friður.

Hvað varðar "hjallana" þá verður alltaf eðlileg þróun í öllum borgum og einhver gömul hús verða að víkja en það er bara spurning um að menn líti á heildina, skipuleggi eftir því og láti ekki stjórnast af gróðavon og skammtímahagsmunum.  Ég myndi persónulega halda í götumyndina á Laugaveginum ef mögulegt væri því fokkljótu margra hæða steypukassarnir sem menn henda upp víðast hvar eru ekki til bóta fyrir neinn nema þann sem græddi.

[...désú (IP-tala skráð) 14.5.2008 kl. 18:39]

Andskotinn að hafa misst af þættinum með alþýðuhetjunni Helga!  Bíð spenntari en borgarstjóri í spennitreyju eftir þættinum á heimasíðuna!

[Viðar Freyr Guðmundsson, 17.5.2008 kl. 01:26]

Einn daginn verða þessi hús ómetanleg.. Við verðum að horfa til framtíðar. Það verður mjög sexy að eiga svona gamaldags miðbæ, eftir nokkur ár, þegar búið er að setja húsin í upprunalegan búning.

Svo má deila um hvort kostnaðurinn sé of mikill, eða hvort einstaka hús séu þess virði að bjarga.. ég treysti mér ekki til að leggja mat á slíkt. 

Sumum húsum hlýtur að meiga bjarga.