Forsetinn bað um að stjórnarskráin yrði brotin

Þetta er mjög einfalt. Ég skal reyna að orða þetta kurteislega:  Annaðhvort er maðurinn fábjáni eða trúður. Ég hallast að því síðarnefnda. Ólafur er stjórnmálafræðingur og ætti því að þekkja stjórnarskránna jafnvel betur en útrásarvíkingana.

Kannski að fjármálaráðherrann geti aðstoðað hann við launalækkunina, en ef Ólafur er svona gasalega sólginn í að lækka laun sín og bæta þannig fyrir afglöp sín í starfi sem útrásarmella og lírukassaapi fyrir Baugsveldið þá á hann bara að gera það þegjandi og hljóðalaust og skrumlaust og hræsnislaust og slaka hinum og þessum góðgerðarfélögum millu á mánuði og svo gæti kannski hans betri helmingur bætt einhverju við. Hún hlýtur að mega missa einn lítinn demant úr námunni. Þetta er ekkert flókið

Það er svakalega lásí og idjótískt af honum að biðja Kjararáð að lækka laun sín þegar hann veit nákvæmlega hver niðurstaðan verður. Nema náttúrulega að hann hafi ekki vitað það og þá hefur hann þá einu afsökun að hann sé fábjáni og því kannski alveg tilvalinn sem samnefnari og sameiningartákn þjóðarinnar.

Forsetaembættið kostar þjóðarbúið nokkur hundruð milljónir á ári og þessari fúlgu væri án nokkurs vafa betur varið í styrkingu mennta - og heilbrigðiskerfisins og í aðstoð við þá sem hafa ekki til hnífs og skeiðar. Ef Ólafur vill raunverulega koma að gagni og spara þá færi vitaskuld best á því að hann segði af sér og leggði til í leiðinni að þetta tilgangslausa fokdýra snobbembætti yrði lagt niður í snarhasti.

Þessar endalausu leiksýningar forsetans fara að verða álíka þreyttar og hallærislegar og hárgreiðslan. Hann er búinn að koma embættinu niður í forarpytt sýndarmennsku, auðmannadekurs og ótrúverðugleika og í þeim skít situr hann sem fastast.

Ólafur er sannkallaður "for-seti."

Kjararáð getur ekki lækkað laun forsetans

Athugasemdir

[Haraldur Baldursson, 16.1.2009 kl. 14:50]

Klárlega hefur Ólafur gert mistök eins og hann gekkst reyndar við í Nýársávarpi sínu. Þau mistök getur hann bætt fyrir með jákvæðum störfum í framtíðinni, enda lítið hægt að hrófla við fortíðinni nema með haka og skóflu. Ég vill sjá Ólaf halda áfram uppbyggilegum samskiptum við Indland. Hann hefur stórkostleg sambönd þar og getur stuðlað að því að auka samskipti okkar og efla þar. Mikið nær að horfa til Asíu, en ört hrörnandi Evrópu sem gleymt hefur að fjölga sér nægjanlega.

[Sverrir Stormsker, 16.1.2009 kl. 15:02]

Kallinn hefur jú sambönd. Þessi sambönd hefur hann verið óþreytandi við að nota í þágu Baugs og útrásarvíkinganna. Trúverðugleikinn er Enginn.

Miðað við þessa nýjustu leiksýningu hans þá er ekki að sjá að hann hafi lært nokkurn skapaðan hlut af mistökum sínum sem hann gekkst við í Nýársávarpinu. 

[Haraldur Baldursson, 16.1.2009 kl. 15:21]

Ég hef þá misst af síðasta leikþættinum, því eg man ekkert eftir Ólafi eftir Nýársávarpið. Annað tveggja gæti valið, athyglisbrestur eða fjölmiðlafælni.

[Haraldur Hansson, 16.1.2009 kl. 15:21]

Þeim, sem ákveða laun forsetans með lögum, er óheimilt að lækka þau. Það væri brot á stjórnarskrá. En það er ekki þar með sagt að það sé brotlegt að lækka launin að frumkvæði forsetans sjálfs.

Úr 9. gr. stjórnarskrárinnar:
Ákveða skal með lögum greiðslur af ríkisfé til forseta og þeirra, sem fara með forsetavald. Óheimilt skal að lækka greiðslur þessar til forseta kjörtímabil hans.

Nauðsyn brýtur lög, stendur einhvers staðar. Nú er kreppa og nauðsyn að spara alls staðar sem því verður við komið. Ég get ekki séð að launalækkun sé brot.

[Haraldur Baldursson, 16.1.2009 kl. 15:26]

Ólafur gæti auk þess nýst okkur í næstu útrás með sambönd sín og vilja til verka, því hann er býsna duglegur. Næsta útrás yrði að vísu að markast af ögn meira innihaldi, en hún þarf að eiga sér stað. Ég vona að hún feli ekki í sér þáttöku í saumaklúbb skrifræðisins í Brussel, heldur þá frekar í allar hina heimsálfurnar. Enn eigum við svo eftir að endurheimta lönd og jarðir í Noregi, sem Ólafur getur hjálpað okkur við. Sitji norðmenn fastri á sínu víkjum við kröfunni einfaldlega að sjóðnum okkar, sem þeir kalla Olíusjóðinn sinn. Það er kominn tími á að leiðrétta þennan miskilning...þetta er allt meira og minna á landgrunni jarða forfeðra okkar.

[Sverrir Stormsker, 16.1.2009 kl. 15:45]

Haraldur Baldurs (nr. 3).  Þú ert ekki sá eini sem ert að reyna að gleyma honum

Haraldur Hansson. Fjármálaráðherra ætti að geta aðstoðað Ólaf við þessa leiksýningu, en ég vísa í grein mína hvernig auðveldast er fyrir Ólaf að gera þetta án þess að auglýsa "góðmennsku" sína.

Haraldus Baldurs (nr. 5). Ég myndi helst ekki vilja horfa uppá frekari útrásartilburði af hálfu Ólafs. 

[Offari, 16.1.2009 kl. 17:56]

Ólafur hafði mikla trú á ránsferðum útrásarvíkingana og fékk því oft að fara með í ránsferðir.  Er nema von að sett séu á okkur hryðjuverkalög þegar þjófnaðurinn var studdur af forsetanum?

[Sverrir Stormsker, 16.1.2009 kl. 18:16]

Það er rétt Offari. Hann gaf útrásarræningjunum gæðastimpil - V.S.O.P. (Viðbjóðslegur Sori Og Pakk).

[Júlía Helgadóttir (IP-tala skráð) 16.1.2009 kl. 19:16]

  Þú ert svo fyndinn Sverrir!  Og svo dónalegur!  Einn fárra manna sem eru bæði fyndnir og dónalegir á sama tíma.

[Hörður Þórðarson, 16.1.2009 kl. 21:32]

Hann getur bætt fyrir mistökin með því að segja af sér. Hanns tími er liðinn.

[Ómar Ingi, 16.1.2009 kl. 21:42]

Flott mynd af Ólafi hjá þér lýsandi honum vel

[Birna Guðmundsdóttir, 17.1.2009 kl. 05:22]

Íslenska thjódin tharf forseta sem er í tengingu vid thjódina- tími Óla er lidinn-eins og tími útrásarvíkinganna!  Ekki eins og hann fari á vonarvöl og verdi blankur í nánustu framtíd 

Sverrir gódur ad vanda og passlega dónalegur í thetta sinn

[Sigurður Sigurðsson, 17.1.2009 kl. 10:17]

Snilldar grein hjá þér Sverrir, ég segi bara takk núna eftir að hafa legið í hláturskasti í 10 mínútur.

Talandi um hárgreiðsluna  !!!  er kominn í annað hláturskast.

[Hallgerður Pétursdóttir (IP-tala skráð) 17.1.2009 kl. 13:34]

Ég elska ÓRG. Held samt að hann sé á rangri hillu? Hann er snilldarleikari og menn/konur mega ekki vanmeta það. Svo er maðurinn svo alþýðulegur sem kemur ekki á óvart í sjálfu sér enda af alþýðufólki komin. Hann er held ég sá eini sem gleymir því stundum. Kannski partur leikarans að lifa sig inn í hlutverk? Hvað veit maður.

[Sverrir Stormsker, 18.1.2009 kl. 04:16]

Sammála síðasta ræðumanni. Ólafur er frábær leikari. Semur handritið jafnharðan, eftir því hvernig vindarnir blása.