Rammstolnum ófögnuði fagnað í Eurovision

Jæja. Þá er það búið. María stóð sig virkilega vel þrátt fyrir örlitla hnökra. Hún sagðist t.d. hafa „sungið af sér rassgatið,“ en slíkt hlýtur að vera afar óheppilegt í hommakeppni einsog Eurovision, jafnvel þó María sé kvenkyns og skegglaus í ofanálag.

Ég ætla að vona að þetta sé ekki ástæðan fyrir óförunum. (Hommar eiga það nefnilega til að taka það full bókstaflega þegar þeim er sagt að fara í rassgat. Vilja helst ekki fara neitt annað og þá er eins gott að allir hafi eitt). En hún sýndi semsé stjörnuleik í vissum skilningi.

 

Eftir að ljóst varð að hún kæmist ekki áfram með lagið Unbroken þá sagði hún broken en kurteis og pen á Fjasbókarsíðu sinni:

 

„Þeir sem drulla, flott, drullið bara yfir mig eða atriðið, mér er sama...“

 

Mér er ekki drullusama. Ég var reyndar ekki var við það að nokkur hafi drullað yfir hana, en það má vera að einhverjir ódannaðir drullusokkar og kúkalabbar hafi drullað yfir hana, vitandi að hún gæti ekki svarað í sömu mynt þar sem hún var búin að syngja af sér rassgatið.

 

Ég veit það ekki, en það er óneitanlega skítalykt af málinu.

 

Ef ég væri gráglettinn einsog Láki jarðálfur þá myndi ég eflaust segja að það hafi verið soldið kaldhæðnislegt að syngja af sér rassgatið í lagi sem er óttalegt prump, en þar sem ég er annálað orðvart prúðmenni þá segi ég náttúrulega sem er að lagið er alveg stórglæsilegt, nema hvað það gleymdist óvart að setja í það sterka og skemmtilega melódíu. Mjög gott að öðru leyti.

Byrjunarkaflinn var að vísu á lágum og ógreinilegum muldursnótum þannig að maður vissi ekki alveg hvort lagið væri byrjað eða hvort hún væri bara að ræskja sig og tauta eitthvað við sjálfa sig, en svo hóf lagið sig til flugs með miklum tilþrifum einsog glæsiþota frá Malaysia Airlines og...

 

Þetta steinlá. Í vissum skilningi.

 

María má vera stolt af sinni frammistöðu því hún var með hráefni í höndunum sem myndi ekki vera selt í matvöruverslun sem héti Fugl og fiskur.

 

Sviðssetningin var alveg til fyrirmyndar. Bakraddasöngvararnir sáust varla. Þegar það kom fyrir að það rétt glitti í þá þá voru þeir úr fókus og virkuðu einhvernveginn einsog draugar eða svartkuflaðir djöfladýrkendur sem væru að fórna henni Maríu litlu í norðurljósasviptingum lengst norður í afsungnu rassgati. Mjög líflegt og frjótt alltsaman.

 

En nú aðeins að öðru. Þó að þetta eigi að heita sönglagakeppni en ekki sönglandakeppni eða söngvarakeppni þá geta þó söngvarar stundum gert gæfumuninn hvort lag fari áfram eður ei. Rússneska leiðindalagið er gott dæmi um það: Illa þolanlegt voðaverk en sungið af hörku Marilyn Monroe ljósku í hvítu austantjaldi. Lenti í öðru sæti. Ótrúlegt helvíti.

 

Sjálfur var ég hrifnastur af ítalska laginu og því ástralska og svo var lagið frá Kýpur ansi snoturt og tilgerðarlaust.

 

Lélegasta lag keppninnar var án nokkurs vafa sænska vinningslagið. Reyndar er það ekki sænskt heldur er það rammstolið frá franska tónlistarmanninum David Guetta. Sá gæi er vel þekktur, búinn að selja yfir 9 milljónir platna út um allan heim.

 

Í flutningi sykraða Svíans hét lagið „Heroes“ en raunverulega heitir það „Lovers on the sun“ og kom út í fyrra. Tæplega 80 milljónir manna hafa horft á það á youtube. „Höfundur“ „sænska lagsins“ er alveg örugglega einn af þeim. A-kaflinn er svo gott sem alveg eins. Ferlega neyðarlegt. Stuldir geta varla talist til góðra og „hetjulegra“ lagasmíða.

Vó-ó-vóóó-viðlagið er hirt úr öðru lagi sem var gríðarlega vinsælt fyrir ekki löngu. Man ekki hvað það heitir í augnablikinu en skal þefa það uppi við tækifæri.

 

Þetta lag Sví(n)anna, „Heroes“ er semsé samsuða, uppáhellingur, drullumall, glundur, stuldur, í raun algjört ræningjarugl frá upphafi til enda og á nákvæmlega ekkert skylt við sjálfstæð gæðalög einsog "We are the champions" með Queen einsog Ómar okkar Ragnarsson skrifar uppveðraður um í mígandi hrifningu hér á moggablogginu.

 

Berið endilega saman þessi tvö lög þegar þið eruð búin með greinina: HÉR er „sænska“ lagið og HÉR er orginallinn með David Guetta.

 

Þó að Frakkar hafi verið í þriðja neðsta sæti þá unnu þeir engu að síður keppnina með lagi í flutningi Svía.

 

En það verður nú að segja Svíum til hróss að þeir voru með langbestu og frumlegustu sviðssetninguna, nema þeir hafi kannski stolið henni líka einsog laginu. Ég spái því að við munum um ókomin ár eiga eftir að sjá í Eurovision stælingar og tilbrigði við þessar sviðsteiknimyndir Svíanna. Menn elta hvers annars skott og hvers annars rass í þessari keppni.

 

En talandi um rassa þá endurtek ég að hún María stóð sig alveg glimrandi vel. Ohh, hún er svo gasalega mikið rassgat...eða var það allavega. Hún er og verður stjarna, þrátt fyrir að hafa sungið af sér rassgatið.

Þeir sem segja annað geta farið í rassgat.

Kynnarnir voru sömuleiðis góðir. Fínir sveppir. Skárri en flest lögin. Betri verða rasskynnar ekki.

 

 

Ísland fékk 14 stig

Athugasemdir

[FORNLEIFUR, 24.5.2015 kl. 09:37]

 Það er ekki að spyrja að sænsku mafíunni...

[Ásthildur Cesil Þórðardóttir, 24.5.2015 kl. 09:48]

Þú ert ótrúlegur, bjargaðir deginum fyrir mér. 

[Heimir Lárusson Fjeldsted, 24.5.2015 kl. 12:44]

Geðbótarfærsla. Takk.

[Guðmundur Ásgeirsson, 24.5.2015 kl. 15:09]

Fornleifur. Ertu kannski að meina þessa hér?

http://en.wikipedia.org/wiki/Swedish_House_Mafia

[Filippus Jóhannsson, 24.5.2015 kl. 17:28]

Sænska lagið greinilega stolið. Stormsker er með þetta á hreinu.

[Sverrir Stormsker, 24.5.2015 kl. 18:06]

Fornleifur. Veit ekki með sænsku mafíuna en það þarf allavega að afleggja þessar sjálfhverfu snobbuðu skynbragðalausu dómnefndir landanna sem hafa 50% vægi á móti símakosningu. Það er nú komið í ljós að ef símakosning hefði ein fengið að ráða þá hefði sænski lagastuldurinn lent í 3. sæti og ítalska lagið í 1. sæti.

 Íslenskur almenningur setti t.d. ítalska lagið í 1. sæti en íslenska 5 manna tónlistarvitringadómnefndin tróð sænska þýfinu í 1. sæti og þar við sat. Ef þetta er sama dómnefndarklíkan og valdi lögin hér í undankeppnina þá þarf þetta svosem ekki að koma á óvart.   

Það þarf nauðsynlega að stokka rækilega uppí þessu dómgreindarlausa dómnefndardrasli öllusaman og rusla því út. Fólkið á að fá að ráða þessu, ekki litlar kæstar klíkur.

[Sverrir Stormsker, 24.5.2015 kl. 18:11]

Ásthildur. Gott að heyra. En þú verður að biðja Drottinn að bjarga morgundeginum því ég verð busy.

[Sverrir Stormsker, 24.5.2015 kl. 18:16]

Heimir. Ekkert að þakka. Ég lagaðist mikið við þetta.

[Hrannar Baldursson, 24.5.2015 kl. 18:19]

Til hvers þarf dómnefnd?

Annars sýnist mér eitthvað af franska laginu stolið frá Ennio Morricone, og þannig má segja að Ítalir hafi í raun unnið þetta aftanfrá.

[Sverrir Stormsker, 24.5.2015 kl. 18:29]

Filippus. Já það er þokkalega stolið helvíti þó að íslenska dómnefndin hafi að sjálfsögðu ekki fattað það.

Borgarstjórinn okkar er meiraðsegja svo ánægður með að þessi rammstolni vibbi skyldi hafa unnið að hann ætlar að mæta í níðþröngum leðurbrókum með buxnaklaufina aftaná og með strútsfjaðrir í rassinum í vinnuna á þriðjudaginn. Síðan hvenær höfum við ekki klappað fyrir þjófum?

[Sverrir Stormsker, 24.5.2015 kl. 18:34]

Hrannar.     Það er sem ég segi: Menn elta hvers annars skott og hvers annars rass í þessari keppni.

[Ásthildur Cesil Þórðardóttir, 24.5.2015 kl. 19:29]

Sorrý Sverrir það get ég ekki, því ég trúi ekki á Guð.  En ég gæti ef til vill blótað Óðni mér til bjargar 

[Sigurður Kristján Hjaltested, 24.5.2015 kl. 20:04]

Eins og endranær..alltaf frábær og bjargar blogginu.

Átt þú ekki einhverjar leðurbuxur til að lána Degi..???

Þá gæti hann verið loksins sem hann er.

Algjört "Rassgat"..:)

[Sverrir Stormsker, 24.5.2015 kl. 20:07]

Ásthildur. Óðinn kallinn gerir sig alltaf vel í mánudagsþynnkunni. Láttu mig þekkjaða.

[Sverrir Stormsker, 24.5.2015 kl. 20:12]

Sigurður. Nei, ég á bara G-strengi og latexdress, þetta klassíska, sem maður notar í fermingarveislum.

Ásthildur sagði hér fyrir ofan að ég hefði bjargað deginum. Það má vera en ég bjarga ekki Degi. Kannski að Gnarrinn eigi eitthvað til í skápnum góða.

[Ásthildur Cesil Þórðardóttir, 24.5.2015 kl. 20:18]

Hehehehe júróvisjón og alles gera sitt 

[Sigurður Andrés Jónsson, 24.5.2015 kl. 20:30]

Eg held ad bandarikin hafi verid einna best tarna, sendu allaveganna ekki fulltrua i keppnina. Olikt Astraliu og Israel eru bandarikin nokkud viss um ad vera ekki i evropu. En tad kannski breitist hver veit. Evropa er ju stor.

[Sverrir Stormsker, 24.5.2015 kl. 21:14]

Sigurður Andrés. Asía tekur líklegast þátt í þessari Evrópukeppni eftir fáein ár.

Nú er komið í ljós að þessi fingralangi sænski sykurpúði stal ekki aðeins laginu frá A til Ö heldur grafísku hönnuninni líka. Svíarnir hafa greinilega ekki lagst í mikla hugmyndavinnu heldur aðeins horft á myndband Davids Guetta og verið þá komnir með „sitt“ framlag.

 

Sjá: https://www.youtube.com/watch?v=JnTvAaHtQRU

 

Það ætti náttúrulega að svipta þennan sænska smjörtilla titlinum og kæra hann og kjósa uppá nýtt eða láta rússnesku Monroe-týpuna fá 1.sætið. Nú eða það sem er heilbrigðast og lýðræðislegast: að láta símakosninguna standa eina og sér þar sem flestar dómnefndir „tónlistarvitringanna“ reyndust dómgreindarlausar með öllu.

[Ásthildur Cesil Þórðardóttir, 24.5.2015 kl. 22:12]

Þetta er algjörlega með ólíkindum.

[Jens Guð, 24.5.2015 kl. 23:27]

  Ég sá ekki júrivision (nema eitthvað af atkvæðagreisðlunni í lokin.  Var annars upptekinn á Classic Rock - skilst mér).  Mér segir svo hugur að söngvakeppnin hafi ekki verið eins fyndin og bráðskemmtileg og þessi lýsing á henni.  

[Ómar Ragnarsson, 25.5.2015 kl. 00:21]

Hvergi kemur fram í bloggfærslu minni að ég hafi talið sænska lagið gott. Mér fannst það og finnst það enn stolið/ófrumlegt/hálfstolið, og alveg fram að úrslitunum fannst mér ekki taka því að nefna það. En við bensíndæluna í Búðardal fannst mér ég var hins vegar vera byrjaður að sjá í gegnum lymskulegt plottið sem var augljóslega það að hægt væri að gera lagið að eins konar stuðs-upphrópun við ákveðin tækifæri. "We are the heroes...! byggist á svipuðum húkk og "We are the champions.!" 

Er sammála því að meistaralagið er margfalt betra, en trixið er svipað.

Ég nefndi ítalska lagið, ástralska lagið og kýpverska lagið eins og Stormsker, sem sýnir að við höfum órtúlega svipaðan smekk. En hann varð að lúta í lægra haldi á úslitakvöldnu í aftanskininu á endanum.  

[Jón Pétur Líndal, 25.5.2015 kl. 11:33]

Þegar ég sofnaði yfir sjónvarpinu á laugardagskvöldið hafði ég ekkert séð nema mjög ljótar skeggjaðar kerlingar og kalla með Fred Astair hatta að kyssast.  Hélt þetta væri þessi margfræga Eurovision Gay Contest og náði bara alls ekki að halda mér vakandi yfir þessu prógrammi.  Prófa kannski að hlusta á það sem menn eru að mæla með hérna til að sjá af hverju ég missti.

[Mofi, 25.5.2015 kl. 16:21]

Hvernig stendur á því að svona lög geta komist svona langt án þess að einhver fatti að um algjöran þjófnað sé að ræða. Þetta sænska lag er svo stolið. Takk fyrir þræl fyndna grein, ég hló af mér ra.... hvað var María að pæla að segja þetta? LOL

[Sverrir Stormsker, 25.5.2015 kl. 18:34]

Ásthildur. Jebb, þetta er nefnilega alveg með ólíkindum. Eða einsog arabafurstarnir orða það: þetta er algjörlega með olíulindum.

[Sverrir Stormsker, 25.5.2015 kl. 18:36]

Jens Gvöð. Hvaða maður er svosem ekki upptekinn á Classic Fuck?

En sem ég segi, ég er farinn að halda að það sé mun erfiðara að horfa á þessa keppni en að taka þátt í henni.

[Sverrir Stormsker, 25.5.2015 kl. 19:07]

Ómar. Greinin sem þú skrifaðir í fyrradag hét Hliðstæður„húkkur“og„We are the champions.“ Þó að grunnhugmynd textans sé svipuð þá er þarna ólíku saman að jafna. Maður ber ekki tuskudýr saman við alvöru ljón.

 Þú segir: „Þá áttaði ég mig á þeim möguleika að þetta lag gæti orðið skætt partílag eða lag sem fólki dytti í hug að syngja á góðum kvöldstundum þegar allir eru í stuði, vinningsstuði, á einn eða annan hátt.  Og gott að fá útrás með því að syngja hina lúmsku slaufu "vó, ó, vóóó!"

 Þú virðist þarna nú bara vera býsna ánægður með þetta útrásarspangól þrátt fyrir að þú hafir vitað að það væri stolið.

Sjálfur heyrði ég lagið í fyrsta skipti í beinni en ef ég hefði vitað einsog þú á þessum tíma að lagið væri „stolið//hálfstolið“ einsog þú segir núna að þú hafir vitað, þá hefði ég nú frekar bara einfaldlega skrifað: „Þá áttaði ég mig á þeim möguleika að þetta lag gæti verið stolið. Djöfull er þetta nú lélegt.“  En svona er fólk misjafnt.

 

Þessi sænski stuldur getur í basti falli orðið einkennislag lúsera, leppalúða, rummungsþjófa, dusilmenna og örlagaaumingja. Þó að ætlun "höfundarins" hafi eflaust verið að "búa til" eitthvert voðalegt sigurhátíðarlag þá er lagið nú samt andstæða lagsins „We are the champions“ en ekki hliðstæða. Meistarar vinna ekki með svindli.

[Sverrir Stormsker, 25.5.2015 kl. 19:17]

Jón Pétur. Það eru nú margar flottar kellingar með fínar túttur í Júróvisjón. Stundum finnst mér meiraðsegja að það ætti að kalla þetta Júgravisjón. En hommarnir yrðu nú ekki par hrifnir af því. Það er vel hægt að hafa gaman að þessu þó maður hafi ekki endilega hljóðið á.

[Sverrir Stormsker, 25.5.2015 kl. 19:40]

Mofi. Svíar hefðu náttúrulega aldrei átt að hleypa þessu í gegn. Hefðu átt að stoppa þessa vitleysu í tæka tíð. En þeir hafa sennilega bara tekið Ómar Ragnars á þetta og ekki séð ástæðu til að hafa orð á því að þetta væri stolið heldur bara dillað sér við þetta gums í góðum fíling og fundist þetta vera hliðstætt „We are the champions.“ :)

[Ómar Bjarki Kristjánsson, 25.5.2015 kl. 20:42]

Soldið líkt vissulega.  Sérstaklega í byrjun.  Viðlagið hjá svíunum minnir mig á þarna This is the rythm of the night húkkinn.

Málið er bara að þeir svíar eru svo sniðugir í eurovision og popp bissnesinum.  Eru það nefnilega.  Dáldið sneddý.

Það var samt performansinn sem gerði útslagið, frumlegt baksvið  og þeir náðu að búa til svona stemmingu sem fittar inn í núið.  Flytjandinn var sterkur, virkaði þrautþjálfaður, og afslappaður.  Öruggur í öllum sínum aðgerðum.

[Sverrir Stormsker, 25.5.2015 kl. 22:21]

Ómar Bjarki. Svíar er færir í poppinu, það er rétt. Eiga meiraðsegja bestu lagasmiði í heimi, þá Benna og Bjössa í Abba. En þessi sísmælandi brjóstumloðni sykurlegni súkkulaðihúðaði smjörtilli sem vann núna með sitt þrælstolna lag er náttúrulega alveg úti að skíta. Alveg lost. Þó hann hafi lært að valhoppa um sviðið einsog kiðfætt kengúra þá er hann samt sami aumi rummungsþjófurinn.

Menn hafa nú verið kærðir fyrir minni lagastuldi en þetta og þurft að punga út vænum summum þannig að ég veit nú ekki hversu „sneddý“ þetta var hjá honum. Þetta er hlandauli.

[Morgunstjarnan, 27.5.2015 kl. 01:16]

Sæll meistari Stormsker. Þú ert með puttann á púlsinum eins og fyrri daginn :D

Nú er sumarið að detta inn og höfum við félagarnir haft mikið gaman að því að hlusta á þættina þína sálugu sem voru hér um árið á Útvarpi Sögu.."Miðjan". Þegar við keyrum um landið. En við eigum bara til þáttinn með Geira og Jóni Baldvin. Þættirnir voru allir aðgengilegir á síðunni þinni en nú er hún horfin af yfirborði jarðar. Er einhverstaðar hægt að nálgast þættina hjá þér á netinu eða til kaups? Jafnvel fá að versla CD hjá þér og þætti í kaupbæti :) Það myndi bjarga sumrinu að heyra þessa bestu þætti sem hafa verið í útvarpi á Íslandi frá upphafi!

Einlægar aðdáendakveðjur,
Morgunstjarnan

morgunstjarnan 'att' illgresi.net

[Helga Kristjánsdóttir, 27.5.2015 kl. 13:15]

Sæll!...Svo stálu þeir textanum úr "Rabbabara Rúna"ætla að finna þá í fjöru.

[Sverrir Stormsker, 28.5.2015 kl. 01:17]

Morgunstjarnan. Skal skoða þetta og vera í bandi við ykkur félagana þegar ég veit meira um málið. Vona að ég geti bjargað sumrinu hjá ykkur (ef það kemur eitthvað sumar) en lofa engu.

[Sverrir Stormsker, 28.5.2015 kl. 01:24]

Helga. Já, hugsið ykkur að geta ekki einusinni látið hana Rabbabara Rúnu í friði. Gott hjá þér að taka að þér það verkefni að finna þessa ribbalda í einhverri fjöru og gera að þeim. Allah mun launa þér góðverkið með 72 hreinum meyjum í Paradís. Nú er bara að vona að þú sért lessa.