Síbrotamaðurinn á Bessastöðum

Undanfarin misseri hefur Ólafur Ragnar farið ríðandi um héruð til að "blása bjartsýni í þjóðina," semsé gefa henni andlegt blowjob. Það er virðingarvert, sérstaklega eftir að hafa átt þátt í því að taka hana í kakóið með því að gefa útrásarskúrkunum gæðastimpil og lofsyngja þá hástöfum um allar jarðir. Hann raðaði á þá fálkaorðum og medalíum og glingri og bling bling og stórriddarakrossum svo mynduglega að þeir stóðu varla í lappirnar. Voru orðnir einsog gettómelludólgar í Harlem. Hér áðurfyrr voru glæpamenn hengdir á krossa. Í dag eru krossar hengdir á glæpamenn. Fálkaorðan ætti í raun að kallast skálkaorðan. Það er allavega mín tillaga.

 

Forsetinn vill skiljanlega bæta fyrir afglöp sín, útrásardekur og dómgreindarleysi og því hendist hann kófsveittur í loftköstum um sveitir landsins til "að byggja að nýju upp traust á milli sín og fólksins í landinu" einsog segir í frétt DV. Hann er jú sameiningartákn þjóðarinnar. Allavega samnefnari. Af fenginni reynslu þótti Ólafi náttúrulega skynsamlegast að fara í þessa huggunarfundarherferð ríðandi á hrossi einsog sannri hetju sæmir. Dómgreindin söm við sig. Aldrei þessu vant þá hrundi kallinn einsog bankakerfið; kastaðist af baki og axlarbrotnaði. Mun því ekki geta axlað ábyrgð úr þessu. Löglega afsakaður.

 

Þessi margbrotni æðsti axlarbjörn ríkisins vill gera sín góðverk í hljóði og kyrrþey og án skrums og auglýsingamennsku, eða einsog segir í frétt DV: "Það vekur hinsvegar athygli að forsetinn heldur sig fjarri kastljósi fjölmiðlanna með fundarherferð sína og einnig slysið." Það vekur semsagt mikla athygli fjölmiðla að forsetinn skuli halda sig fjarri kastljósi fjölmiðla með þessa fundarherferð sína og einnig slysið. Það veit bókstaflega ekki nokkur maður af þessari auglýsingafundarherferð forsetans og hvað þá af slysinu einsog sjá má í öllum fjölmiðlum landsins. Maður á að vinna sín góðverk í kyrrþey einsog Ólafur Ragnar. Ólafur vill jarðsyngja landsmenn í kyrrþey í öllum fjölmiðlum landsins. Gott að vita af heiðarlegum síbrotamanni á forsetastóli.

Forsetinn í aðgerð í morgun

Athugasemdir

[Jenný Stefanía Jensdóttir, 21.8.2009 kl. 16:45]

Enn og aftur gerir þú þig sekan um ótrúlega pennalipurð og kímni í bland við ískaldan sannleika. 

Þessi "síbrotamaður" hlýtur alvalega að hugsa það í kyrrþei, að nú sé mál að linni.

[Þorri Almennings Forni Loftski, 21.8.2009 kl. 17:45]

Þarf ekki að ryðja Bessastaði? Verst hvað það er erfitt að hitta á Viðskiptafulltrúann heima. Hann hefur enga sómakennd til að fara sjálfur.

[Helga Guðrún Eiríksdóttir, 21.8.2009 kl. 21:22]

Þarna á fyrstu mynd eru þeir vinirnir að afhjúpa saman listaverk skömmu áður en þeir voru afhjúpaðir sjálfir. Hvað skyldi það heita? -Vegir liggja til allra álfta..? -Svanasöngur í eyði..? -Álftirnar kvaka ekki meir..? -Svíðum, svíðum..?

[Guðmundur Júlíusson, 21.8.2009 kl. 22:45]

Það er ekki ofsögum sagt að þú ert manna beittastur með pennann að sverr (ð) i  :) þetta er skemmtilega orðað hjá þér og hárrétt svo ekki sé meira sagt, haltu áfram þessum beittu skrifum félagi.

[Árelíus Örn Þórðarson, 22.8.2009 kl. 04:27]

Sæll Sverrir.

Eitt að því sem gæti verið tákn fyrir uppreisn og æru þjóðarinar er að forsetinn sem dáði alla þessa útrásarglæpamenn víki á miðju kjörtímabili, NAUÐUGUR.

Upprisa þjóðarinnar mun aldrei nást nema að allir þeir sem komu að útrásarglæpnum víki.

Nú berjumst við allir Íslendingar og mætum galvösk á Austurvöll í haust og hrópum á réttlæti.

Kveðja.

Árelíus Þórðarson.

[Jakob Þór Haraldsson, 22.8.2009 kl. 10:03]

Þó þessi fábjáni hefði ekki axlabrotnað þá hefði hann auðvitað aldei axlað ábyrgð á einu eða neinu, enda ekki hægt að ætlast til þess af SÝKÓPÖTUM að þeir skilji eitt eða neytt rangt við sýnar gjörðir.  Þennan mann á að leggja inn á deild 33d, þá loksins er hann kominn á stað sem hann slær í gegn!  Sorglegt hversu spilta stjórnmálamenn við eigum, stjórnmálamenn sem margir hverjir hafa svo sannarlega "svínslegt eðli" - ekki satt "Óli grís...??"

kv. Heilbrigð skynsemi

[Mofi, 22.8.2009 kl. 10:32]

Hrein unun að lesa þetta; takk fyrir mig

[Kolbrún Stefánsdóttir, 22.8.2009 kl. 11:09]

Frábær pistill sem spilar á alla tilfinningaflóruna hjá mér en fer hlæjandi frá henni. kveðja Kolla.

[Rut Sumarliðadóttir, 22.8.2009 kl. 11:26]

Takk fyrir mig.

[Þorvaldur Guðmundsson, 22.8.2009 kl. 13:16]

Keypti mér um daginn tösku með axlarÓlum og dettur mér nú alltaf í hug forsetinn þrælsetinn og ofsetinn þegar ég snara henni á vinstri öxlina.

[Guðbjörg Hrafnsdóttir, 22.8.2009 kl. 13:29]

Heiðra þig sem gullpenna dagsins!

[Einar B Bragason , 22.8.2009 kl. 16:19]

Flottur fer aftur í betrunar vist fyrir þig haha !

[Ómar Ingi, 22.8.2009 kl. 23:37]

Tær snilld Sverrir.

[Sigurjón, 23.8.2009 kl. 06:03]

Sæll Sverrir.

Hafðu þökk fyrir þennan pistil.  Ég lít á Óla sem sameiningartákn 40% þjóðarinnar, enda veit ég ekki til þess að stærri hluti þjóðarinnar hafi nokkurn tímann kosið hann.  Hann er eiginlega sundrungartákn frekar en eitthvað annað...

Skál!

[Sverrir Stormsker, 23.8.2009 kl. 13:51]

Jenný, ussss. Ekki hafa hátt. Ólafur Ragnar Klúsó er að vinna í kyrrþey.

[Sverrir Stormsker, 23.8.2009 kl. 13:52]

Þorri Almennings, ég þarf nú að fara að endurheimta ættarsetrið, Bessastaði. Langalangafi var bróðir Gríms Thomsens Bessastaðabónda. Þarf endilega að fara að henda grísnum út og stinga mér oní vínkjallarann.

[Sverrir Stormsker, 23.8.2009 kl. 13:53]

Helga Guðrún, þetta verk sem Óli Grease og Jón Násker voru að afhjúpa í fyrra heitir Myrkraverk.

 

Guðmundur, lofa því.

[Sverrir Stormsker, 23.8.2009 kl. 13:55]

Kreppumaðurinn, sammála. Skildi ekkert í því þegar grímuklæddir “byltingarmenn” fóru á Svessastaði til að drekka te. Hélt þeir myndu henda kallinum út. Nei nei, þeir tylltu sér niður og fengu sér te og smákökur í makindum og fóru að tala um veðrið. Þetta hefði átt að koma í heimsfréttunum: “Íslensk bylting.” Úfffff. Gengur vonandi betur næst.

[Sverrir Stormsker, 23.8.2009 kl. 13:56]

Jakob Þór, kallinn er ekki beint í fyrstu deild. Kannski að geðdeild sé svarið.

 

Mofi, takk fyrir mig.

[Sverrir Stormsker, 23.8.2009 kl. 13:57]

Kolla, kallinn ætti fá sér eina kollu Kolla. Bjórkollu og hárkollu. Getur allavega ekki versnað.

 

Rut, thank you very much for this program.

[Sverrir Stormsker, 23.8.2009 kl. 13:58]

Þorvaldur, “For-seti:” Maður í djúpum skít.

[Sverrir Stormsker, 23.8.2009 kl. 13:58]

Guðbjörg, takk. Það er ekki slæmt að vera gullpenís dagsins.

 

Egill, ekki málið.

[Sverrir Stormsker, 23.8.2009 kl. 13:59]

Einar, þú veist að kallinn datt á hraun. Ætti kannski bara að vera á Hrauninu.

[Sverrir Stormsker, 23.8.2009 kl. 14:00]

Ómar, “tær snilld” er búið að fá soldið vafasama merkingu

[Sverrir Stormsker, 23.8.2009 kl. 14:01]

Sigurjón, gölturinn verður örugglega kosinn aftur. Aftur og aftur og aftur og aftur. Hann lofaði reyndar í viðtali sem ég tók við hann 1996 að hann myndi aldrei sitja lengur en í 8 ár yrði hann kjörinn. Hann lofaði í sama viðtali að hann myndi fara afar sparlega með fálkaorðurnar og hengja þær aðeins á þá sem ættu þær fyllilega skilið. Einmitt. Óli Grease og loforð. Súrmjólk og brennivín. Góð blanda

[Sölvi Arnar Arnórsson, 23.8.2009 kl. 23:08]

Hann Óli ætti nú bara að hætta þvi að hengja fálkaorðurnar á fólk. það væri skynsamlegra hjá honum og minni fyrirhöfn fyrir hann að orðunni yrði útdeilt í coco puffs pökkum.

[Sverrir Stormsker, 24.8.2009 kl. 00:59]

Sölvi, láta eina fálkaorðu fylgja hverjum SS pulsupakka í Bónus.

[Þorri Almennings Forni Loftski, 24.8.2009 kl. 02:13]

Sverrir: Grímur Thomsen var nú skástur í Skólaljóðunum sem við þurftum að þylja. Þótt Thomsen þætti ekki við alþýðuskap. Farðu nú að drífa þig í hústökubransann. Vonandi eru vínföngin ósnert. Ég bíð eftir boðsmiðanum.

[Guðni Þór Björnsson, 24.8.2009 kl. 10:34]

Hann var að feika þessi meiðsli til að sleppa undan áreiti.

[Tómas Örn Sigurbjörnsson (IP-tala skráð) 24.8.2009 kl. 14:17]

Þú verður þá fyrst að leigja þér loftbor og brjóta niður vegginn sem hann lét setja í innganginn að vínkjallaranum þegar hann tók við embætti...

[sandkassi (IP-tala skráð) 25.8.2009 kl. 13:05]

Smá sending Sverrir;