GJALDMIÐLAR OG AÐRIR SVIKAHRAPPAR

Sýnir, vitranir, draumar, tarrotspil, kristalskúlukellingar, fylgjur, draugar, kaffibollaspámenni, stjörnuspámenni, happagripir, heilun, álfar, tröll, guð, djöfullinn, teskeiðabeygingar, skurðgoð, andalækningar, huldufólk, reiki, orkusteinar, fljúgandi furðuhlutir, talna”speki”, útfrymi, lófalestrarhryssur, miðlar.

 

Allt eru þetta fyrirbrigði sem trúgirnin þarfnast og gleypir ótuggin í öll mál, fyrirbrigði sem standa afskaplega djúpum rótum í vitsmunalífi heimsins, en þó sérílagi íslensku þjóðarinnar. Reyndar eiga mörg þessara fyrirbrigða það sameiginlegt með vitsmunalífi þjóðarinnar að tilvist þeirra er ekki sönnuð, en það er annað mál.

 

Töfrasnillingurinn mesti, Harry Houdini, vann fyrir sér á fyrstu árum sínum í galdrabransanum með því að bregða sér í gervi “alvöru” miðils og setti upp miðilsfundi út um kvappinn og kvippinn og blekkti auðtrúa skrílinn gjörsamlega uppúr bomsunum. Fyrir utan að vera þessi líka svakalega flinki blekkingarmeistari, þ.e.a.s. miðill, þá hafði hann einn kost sem afar sjaldgjæft er að finna hjá dæmigerðum miðlum: Hann var heiðarlegur - strangheiðarlegur blekkingameistari, og því hætti hann fljótlega þessum óleik. Hann sagði seinna: “Fólkið var svo brjóstumkennanlegt og svo hrekklaust. Orðsendingar okkar “að handan” veittu þeim huggun, en það var ósönn huggun, ef það var þá ekki verra. Smátt og smátt varð mér ljóst hve ósæmileg svik það eru að flytja hrekklausu fólki lognar orðsendingar frá liðnum mönnum, og stundum verður það til þess að menn bíða alvarlegt tjón á sálu sinni.” 

Nú myndu margir vitna í Stormsker og segja:

 

                                  Þegar vesælt viskumegn

                                  veldur sálarfúa

                                  þá er huggun harmi gegn

                                  að hafa á nóg að trúa.

 

En Houdini var ekki sammála svona steypu. Svo fór að hann fékk alveg uppí kok af þessari glæpsamlegu draugastarfsemi sinni og sneri algerlega við blaðinu. Hann fór á miðlaveiðar. Þessi mesti töframaður allra tíma gerði það að heilagri skyldu sinni að afhjúpa bestu og frægustu miðla samtíðar sinnar, semsé að koma prettvísinni í hendur réttvísinnar. Og hann fór létt með það. Hann kunni jú öll trikkin í bókinni. Flestir þessara afhjúpuðu roðflettu miðla lentu í grjótinu. Houdini varð aðal ghostbuster heimsins; hann kvað niður þessa bölvuðu drauga sem kölluðu sig miðla, ekki bara tíu eða tuttugu, heldur fleiri hundruð, reyndar hvern og einn einasta sem hann komst í tæri við.

 

Eftir nokkurra ára rannsóknir á dulspekilegum drullusokkum varð hann orðinn svo sannfærður um að ekki finndist EINN ekta miðill á jarðarkringlunni að hann lét þau boð út ganga að hann skildi gefa gríðarlegar fjárhæðir hverjum þeim miðli sem sannað gæti að væri gæddur dulrænum gáfum og lofaði því að hann myndi leika eftir mun betur öll þau fyrirbrigði sem talin væru af andavöldum. Miðlar, sem hafa nú aldrei slegið höndinni á móti auðfengnu fé, streymdu að úr öllum heimshornum til að vinna pottinn, mættu á svæðið með alla sína blístrandi slæðudrauga og óþolandi útfrymi í farteskinu og bjuggu til hressilegan draugang með tilheyrandi húsgagnaskjálfta og röddum að handan og öllu því leiðinda nonsensi. Auðvitað fletti Houdini ofan af öllum þessum hræbillegu andaheimasvikahröppum og berstrípaði þá gjörsamlega og aldrei gekk potturinn út.

Ekki fannst EINN heiðarlegur og sannur miðill í veröldinni.

 

(Þess má geta að Lára miðill, sem var einn vinsælasti íslenski miðill síðustu aldar, var afhjúpuð sem svikahrappur og játaði hún brot sitt. Þrátt fyrir það flykktist fólk áfram til hennar í hrönnum opinmynnt af undrun, trúgirni og heimsku).

 

Eftir þessa krossferð Houdinis hurfu draugagangsmiðlar og aðrir útfrymisasnar að mestu af sjónarsviðinu, semsé þessir fjölhæfu töfrabragðamiðlar, eða fjölmiðlar, einsog ég kalla þá. En þarsem miðlastarfsemin gefur vel í aðra hönd, enda um nótulaus viðskipti að ræða, þá hurfu náttúrulega ekki miðlarnir. Þessir gjaldmiðlar breyttu bara um taktík; hættu að nenna að falla í trans og tala tungum og “andarnir” hættu að nenna að búa til skarkala og færa hluti úr stað á fundum o.s.fr. Ef við vippum okkur yfir til dagsins í dag þá má t.d. finna þessa gæa á útvarpsstöðvum og kallast þeir þá talnaspekingar og útvarpsmiðlar og tala þá fáránlegustu íslensku sem heyrst hefur utan sandkassa. Orðanotkun þessara vafasömu gúrúa ein og sér er næg ástæða til að senda þá rakleitt beint á næsta sambýli. Hér eru dæmi úr nokkrum þáttum:

 

 

“Er þér illt í öllum tilfinningunum þínum?” 

“Hefurðu orðið fyrir árekstri nýlega?” 

“Hefurðu verið að fást við höfuðverk uppá síðkastið eða í gær?” 

“Streymir venjan um þig að innanverðu?” 

“Mér langar að tengja þig við móðir þína, en samt vill ég frekar tala um faðir þinn, er hann annars ekki alveg örugglega farinn?” 

“Bar hann afi þinn ekki brjóst ömmu þinnar fyrir hagi?” 

 

Svona heimspeki, eða heimskuspeki, dýrkar fólk. Það elskar þetta. En takiði eftir því að þessi della, sem ég var að vitna í, er öll í spurningaformi? Blekkingarleikur miðilsins byggist nefnilega á spurningum, að fiska uppúr fólki. Sjálfur segir hann raunverulega ekki neitt heldur hagræðir bulli sínu algerlega eftir viðbrögðum og upplýsingum hins táldregna innhringjara og aðlagar vitleysuna að því sem hann nær að draga uppúr honum. Ef miðillinn röflar einhverja steypu og hittir ekki í mark þá er viðkvæðið alltaf þetta: “Mundu þetta.”  Með þessu móti getur hann alltaf þóst hafa rétt fyrir sér þó hann viti ekkert í sinn haus, og þegar hann kemst ekkert áfram með viðmælanda og nær ekki að toga neitt uppúr honum þá fer hann að tala um neikvæða orku og sambandsleysi; “við skulum prófa annan hlustanda.” 

 

Eða heldur einhver óbrjálaður maður að útvarpsmiðill gæti nokkurntíma hitt naglann á höfuðið um nokkurn skapaðan hlut ef hann fengi ekki fyrst að heyra í ginningarfíflinu, aldursgreina það og kyngreina það o.s.fr? Að sjálfsögðu ekki. Ef einhver hringdi nú inn og segði ekki orð heldur biði bara eftir fréttum að handan, (og það ætti nú að koma út á eitt ef útvarpsmiðillinn væri ekta), þá yrði miðillinn einnig kjaftstopp. Hann myndi ekki vita hvort kall eða kelling væri á línunni og hvað manneskjan væri gömul og hann færi jafnvel að spyrja ungling hvort hann væri kominn á eftirlaun, eða spyrja einhvern níræðan afa hvort hann væri að æfa ballet og hvort hann væri óléttur, og allt feikið færi í eina allsherjar steik, og ef hann fengi ekkert svar og héldi áfram að láta móðann mása án uppdreginna upplýsinga úr viðmælandanum þá væri hann kominn lengst út á tún innan nokkurra mínútna, jafnvel yfir Esjuna og til tunglsins og marga hringi þar í kring í óendanlegri vitleysu, og hann hefði alveg örugglega ekki kjark til að spyrja í lokin: “Ertu sáttur við mig?” 

 

Miðill segir einfaldlega aldrei neitt að fyrra bragði, hann endursegir, vinnur úr upplýsingum. Slæmur miðill hefur engan úrvinnslunarhæfileika, enga mannþekkingu, lætur mikilsverð smáatriði fara framhjá sér, er andlegur þykkskinnungur og getur í raun ekki miðlað neinu nema eigin heimsku. Þannig er ástatt um flesta miðla. Góður “miðill” hinsvegar hlustar eftir fínustu blæbrigðum í röddum fólks, hefur góða ályktunargáfu, næma athygligáfu, er fljótur að kveikja, fljótur að tengja, er naskur í að vinna heildarmynd úr uppgefnum smáatriðum, hefur ríkulegt sálfræðilegt innsæi; veit semsé út á hvað blekkingin gengur.

 

Ginningarfíflið, þ.e.a.s. innhringjarinn er nær undantekningalaust allur af vilja gerður til að hjálpa miðlinum; er jákvæður og opinn og lætur honum í té allar þær upplýsingar sem hvaða meðalskussi sem er í blekkingarfræðunum ætti að geta unnið úr en samt nær miðillinn undarlega oft að klúðra þessu. Einsog það getur nú verið mikil unun að fylgjast með klárum og “vönduðum” svikamiðlum að störfum þá er að sama skapi alveg ferlega pínlegt að fylgjast með klunnum og leppalúðum sem kunna ekki trixin og láta endalaust koma sér í bobba.

 

Í andaheimum miðlanna rekst allt hvert á annars horn. Þeir geta sagst vera komnir í samband við einhverja draugakellingu og haft eftir henni allskonar draumfagrar setningar, algerlega orðrétt, um hvað henni líði nú vel og hvað allt sé nú með miklum blóma í himnaríki og að hún sé umvafin sóleyjum og englasöng og að hún sé hætt að finna til í mjöðminni og að hún hafi ekki myrt einn einasta mann síðan hún kom í ríki drottins o.s.fr., en þegar kemur að því að hún eigi að kreista útúr sér eigið nafn og hvort hún sé amma eða frænka eða langamma viðkomandi ginningarfífls þá virðist hún fara að tafsa alveg gríðarlega og heita annaðhvort Sigríður, Sigrún, Sigurrós, Sigurlína, Sigurvíma, Sig-eitthvað, og svo þarf að fara að fiska uppúr ættmennisginningarasnanum á símalínunni hvað hún heiti og hvort um sé að ræða ömmu hans, langömmu, fóstru gömlu, frænku eða eitthvað þaðan af verra. Alltaf þegar kemur að einföldum grundvallaratriðum viðkomandi draugnum, svosem nafni hans, starfi í lifanda lífi og ættartengslum við símafíflið þá verður allt voðalega loðið og sambandið við andaheiminn mjög slæmt. Ekki einn einasti útvarpsmiðill á jarðarkringlunni getur sagt skýrt og skorinort við innhringjara eitthvað á þessa leið, og haft rétt fyrir sér:

 

“Ég nenni ekki að þykjast þurfa að tengja þig við einhverja manneskju eða tengja þig hingað og þangað. Það er einfaldlega komin hérna geysi hugguleg afturganga og hún segist vera langamma þín og heita Þórkatla Tíbrá Kristjánsdóttir, fyrrum til heimilis að Rassgötu 6 á Höfn í Hornyfirði, og engar refjar með það neitt. Ég þarf ekkert að veiða uppúr þér með lúmskum spurningum við hvað hún starfaði því hún er að segja mér að hún hafi unnið fyrir sér sem vörubílstjóri og skipamella. Hún hafi haft vel “í sig og á,” segir hún, þrátt fyrir mikinn starfsleiða, því hún hafi í raun verið í skápnum sem trukkalessa bróðurpart lífs síns, allt þar til hún tók í lappirnar á syni sínum, sem þá var um fimmtugt, og barði bónda sinn í hel með honum. Þá hafi hún komið útúr skápnum og byrjað með dvergvaxinni tattúveraðri netagerðarlessu. Þetta stemmir allt er það ekki? Ertu sáttur við mig? Gott. Takk takk takk.”

 

Nei svona vafningalausar upplýsingar hvað varðar (óalgeng) nöfn og staðsetningar og slíkt getur enginn miðill veitt, því þegar kemur að beinhörðum staðreyndum að fyrra bragði þá fer sambandið að dofna og miðillinn að heyra gasalega illa, en eftir að hann hefur dregið einhverja vofu úr innhringjaranum með spurningaflóði þá getur hann hinsvegar haft orðrétt eftir henni ýmis nauðaómerkileg almenn skilaboð, t.d. að sér líði alveg gasalega vel og allt sé í gúdí fíling og að hún hafi ekkert merkilegra við tímann að gera í himnaríki en að fylgjast grannt með sinni jarðnesku famelíu og hún segi að barnabarn sitt þurfi að hætta að greiða svona mikið á sér hárið og snúast svona mikið í kringum sjálft sig og bla bla bla og bull bull bull. Þetta er hreint út sagt grátlega vitlaust.

 

Skilaboðin að handan eru að sjálfsögðu aldrei merkilegri en miðillinn. Þó hann segist þurfa að “tengja” innhringjarann við þetta og hitt, tengja hann við hina og þessa persónu, tengja hann útá land og tengja og tengja þessi líka reiðinnar býsn; tengja framhjá og tengja allt við alla og tengja alla við hitt og þetta út og suður einsog ofvirkur rafvirki, þá tengir hann aldrei eitt eða neitt. Hann bara tengir ekki. Það vantar einfaldlega alla tengingu í hann. Hann fær bara straum, - en alltaf að vísu voðalega jákvæðan straum. Jafnvel þó hann sé allur skaðbrenndur og flæktur í snúrunum þá er allt alveg obboslega jákvætt og gott. En afhverju tengja hlustendur ekki? Er virkilega ekki kominn tími til að tengja? 

Svona gæti dæmigert samtal verið milli útvarpsmiðils og miðlatrúmanns:

 

-  “Trúirðu á svona?”

-  “Já, ég hlusta alltaf á þig.”

-  “Ég líka. En hver er Guðmundur? Farinn.”

-  “Jaaaa....nú veit ég ekki...Hm...Nei veistu, ég þekki bara hreinlega engan með þessu nafni þótt ótrúlegt megi virðast. Þú verður bara að fyrirge...”

-  “Það kemur strax hérna vestfjarðarbær, einhver þoka, vestfirðir, eitthvað fyrir vestan. Hvern þekkirðu fyrir vestan sem er farinn? Ekki jarðneskur.”

-  “Ég þekki nú bara engan fyrir vestan.”

-  “Jú víst.”

-  “Neiiii, ég kannast ekki við...”

-  “Jú, jújú, hár maður, hár eftir vexti, stór miðað við stærð. Ég þarf að tengja þig þarna á vestfirðina, vestfjarðarkjálkann, og ég þarf að tengja við tenginguna þarna fyrir vestan. Skilurðu Þetta?”

-  “Nei, allt mitt fólk býr í Texas.”

-  “Takk. Texas er fyrir vestan. Kannski ekki alveg á vestfjörðum en þú skilur hvað ég á við...Veistu, það er voðalega gott að tala við þig. Þú hefur svo mikið og jákvætt orkustreymi í tilfinningunum þínum. En segðu mér...segðu mér...segðu mér með þetta Texas. Er einhver hár maður þar? Grannur? Í köflóttri skyrtu?”

-  ”Já, en ekki í köflóttri skyrtu.”

-  “Í hverju var hann þá?”

-  “Hann var í fangelsi.”

-  “Takk takk takk takk. Það er allt voðalega jákvætt og gott í  kringum hann og honum líður voðalega vel. Nú brosir hann.”

-  “Já en hann er ennþá lifandi. Hann fer í rafmagnsstólinn í næstu viku.”

-  (Þögn)  “...Gott. Þá er hann nú svo gott sem dauður. En hver er Gunna? Guðrún, Gunnhildur, Guðríður eða Guð-eitthvað, Guðminn almáttugur, hárið á henni er gráhært og það er eitthvað að henni í hnénu. Hún er með svona hné. Ég þarf að tengja tengja tengja tengja þig alveg gríðarlega mikið við hnéð á henni. Það er svona einsog hún sé svona með eitthvað í hnénu, liðamót eða eitthvað. Það þarf að kíkja eitthvað á það.”

-  “Ja afi haltraði soldið og hann hét einmitt Gunnlaugur.”

-  “Takk takk. Konan hans kallaði hann einmitt Gunnu eftir að hún hafði séð hann að neðan. Hann biður voðalega vel að heilsa. Sendir dúndur stuðkveðjur til allra sem voru með honum á Bindindismótinu í Galtarlæk 1957.”

-  “Jájá.”

-  “Segðu mér, dóu afi þinn og amma ekki barnlaus? Áttu þau einhver börn?” 

-  “Jú, veistu, ég held að þau hafi átt einhver börn.”

-  “Nei. Nei, þau áttu engin börn. Mundu bara hvað ég sagði. Ertu sátt við mig?”

-  “Já, alveg obboslega.”

-  “Það er gott, guð veri með þér vina mín. Og láttu þér líða vel í tilfinningunum þínum. Og hugsaðu meira um sjálfan þig. Þú getur ekki elskað aðra ef þú getur ekki elskast með sjálfri þér og þú getur ekki elskað aðra en sjálfa þig ef þú skilur hvað ég er að fara. Get aldrei munað þennan frasa. En mundu: Hugsaðu um sjálfa þig.“ (Hugsar sjálfur: Það geri ÉG. Annars væri ég ekki að vinna við að blóðmjólka trúgjarna vanvita og hræra í tilfinningum syrgjenda og gefa læknisfræðileg ráð og beygja hegningarlög um fjársvik).

-  “Ertu sátt við mig?”

-  “Já, alveg gríðarlega sátt.”

- "Guð veri með þér." 

 

Ég spyr: Hver getur verið sáttur við svona píp? Hverskonar fólk trúir á svona rugl? Hverskonar draugar eru það eiginlega sem trúa á miðla? Fyrir utan náttúrulega að þessir gjaldmiðlar hanga utaní 253. grein almennra hegningarlaga en þar stendur að noti maður sér bágindi annars manns, einfeldni hans og fákunnáttu í gróðaskyni þá varði það fangelsi allt að tveimur árum, með vaselíni og júgursmyrsli og alle græer.

 

Útvarpsmiðlarnir enda yfirleitt þætti sína á guðsorði: "Guð sé með ykkur," eða "Guð blessi ykkur," eða "Gangið á guðs vegum" og stundum er jafnvel endað á seiðandi bæn með svæfandi tónlist í bakgrunni til að undirstrika að allt sé þetta nú gert með samþykki almættisins. En hvað skyldi Guð sjálfur segja um kukl og andaheimatengingar hverskonar? Í riti Drottins, Biblíunni, sem allir vilja ólmir láta kenna ungviðinu í skólum landsins, segir hinn umburðarlyndi og kærleiksríki Herra:

“Hafi maður eða kona særingaranda eða spásagnaranda, þá skulu þau líflátin verða. Skal lemja þau grjóti, blóðsök hvílir á þeim.”

 

Svo mælir Drottinn. Þetta stendur orðrétt í Heilagri Ritningu, bók bókanna sem er grundvöllur þess "kristilega siðgæðis" sem við viljum fyrir alla muni boða í grunnskólum landsins. Miðlar og spákonur og þessháttar fólk er ekki beint efst á vinsældarlistanum hjá þeim gamla. Þar sem mér er illa við ofbeldi, enda trúlítill maður, þá get ég ekki samsinnt þessum fyrirmælum Drottins allsHerjar, en ég endurtek það sem Houdini sagði, heiðarlegi töframaðurinn sem mest vit hafði á miðlum og þeirra blekkingaraðferðum. Hann sagði, einsog áður sagði: “Smátt og smátt varð mér ljóst hve ósæmileg svik það eru að flytja hrekklausu fólki lognar orðsendingar frá liðnum mönnum, og stundum verður það til þess að menn bíða alvarlegt tjón á sálu sinni.”

Þetta er rétt hjá honum. Og menn mega ekki við því að bíða alvarlegt tjón á sálu sinni vegna þess að fólk sem trúir öllum hlutum og á alla hluti í blindni hlýtur að hafa beðið alvarlegt tjón á heila sínum.

 

Enda hér á Heilræðastöku sem ég gerði þegar ég var 17 ára og birtist í ljóðabók minni Kveðið í kútnum, 1982:

 

Blindri trú á eitthvað áttu að neita,

ef að þú ert sannfærður þú staðnar,

heimskan vex, þú hættir fljótt að leita,

hugsun skýr og rökrétt óðum hjaðnar.

 

Þetta er ekki þvaður vanhugsað,

þú mátt vera sannfærður um það.
 

  

 

 

(Skrifað árið 2002)

Athugasemdir

[Diddi (IP-tala skráð) 7.12.2007 kl. 07:06]

Sverrir minn þú þarft nú að fara að drífa þig í meðferð.

[Gunnar (IP-tala skráð) 7.12.2007 kl. 10:26]

Já því miður eru til alltof mörg auðtrúa fífl í heiminum, og þetta mun auðvitað viðgangast á meðan fjöl"miðlar" og stjórmálamenn taka ekki á þessu.

Það á auðvitað að banna þetta með lögum og fjölmiðlar eiga að taka þetta fólk fyrir og fjalla um það eins og glæpamenn, sem það er.

[Haukur Nikulásson, 7.12.2007 kl. 11:31]

Ef maður tryði slíku værir þú gott efni í ærsladraug seinna meir!

[Kjartan Pétur Sigurðsson, 7.12.2007 kl. 12:06]

Þú klikkar ekki á greinagóðum útskýringum á mannlegu eðli :)

Því miður eru margir drullusokkar sem lifa á því að

"The last stupid isn't born yet"

í þessum heimi okkar!

[Böðvar Jónsson (IP-tala skráð) 7.12.2007 kl. 12:13]

Það besta við þennan lestur er að það seigir okkur hve höfundurinn er innantómur,og ég er líka viss um að miðlar munu lifa og starfa lengur en lagasmíði þín Sverrir útkomin og óútkomin(sem vonandi kemur aldrei)í meðferð með þig.

[alva (IP-tala skráð) 7.12.2007 kl. 13:51]

Sverrir Stormeker, þú ert laaaannngflottastur, tek undir með Hauki, þú yrðir snilldar ærsladraugsi. 

Segi það með þér, svona fjölmiðlar...haha...gjaldmiðlar eru einmitt að hræra í 253 grein hegningarlaganna...þetta er hrikalegt sukk og alveg örugglega fjársvik líka, ég veit um fólk sem hefur eitt hundruðum þúsunda í svona rugl í mikilli vanlíðan..

Takk fyrir mig.

Alva Ævarsdóttir.

[Ía Jóhannsdóttir, 7.12.2007 kl. 14:27]

Jú auðvitað eru til svikamiðlar en Sverrir minn á ég að benda þér á einn frábæran miðil?  Veistu þú mundir fíla hann í botn!   

[Sigurður Hólm Gunnarsson, 7.12.2007 kl. 15:00]

Alltaf gaman að lesa það sem þú skrifar! Takk.

[Óskar Þorkelsson, 7.12.2007 kl. 15:47]

góður pistill Stormsker.

[Teitur Atlason (IP-tala skráð) 7.12.2007 kl. 16:11]

Meðlimur Vantrúar fór einu sinni á miðilsfund.  Í þessum link fyrir neðan er lítil skýrsla um fundinn og hljóðupptaka af fundinum.  Það er svo augljóst að þessi María (besti miðill á Íslandi) er í engu sambandi við þá framliðnu né við sjálfa sig.  Þetta er hvort í senn sprenghlægileg og sárgrætileg frammistaða.

 Njótið:

http://www.vantru.is/2007/02/02/08.00/

[FLÓTTAMAÐURINN, 7.12.2007 kl. 18:42]

Snillingurinn Sverrir lætur það flakka sem við hin þorum varla að hugsa.

[Júdas (IP-tala skráð) 7.12.2007 kl. 19:22]

"Það á auðvitað að banna þetta með lögum og fjölmiðlar eiga að taka þetta fólk fyrir og fjalla um það eins og glæpamenn, sem það er."

Já en Gunnar, afhverju ekki að stíga skrefið til fulls? Gerum eins og menn gerðu fyrir 2000 árum þegar upp á bankaði maður sem taldi þeim trú um að það væri fleira til í þessum heimi en það sem maðurinn hefur skilning á.

Krossfestum þetta lið!

[Barbatus (IP-tala skráð) 7.12.2007 kl. 19:59]

Var eitt sinn samferða þessum "ertu sátt(ur) við mig" miðli frá Dublin.  Vélinni seinkaði talsvert, en hann hafði ekki hugmynd um það, heldur stóð eins og asni í biðröð við útganginn í þrjá tíma.  Enginn af draugunum hans hafði fyrir því að segja honum að fá sér sæti og slappa af!  Eg hinsvegar lá rólegur út við vegg og drakk viskí, en eg hef heldur enga miðilshæfileika.  Það rænir mig heldur enginn.  Ef fólk er svona vitlaust,        á það skilið að vera rænt

[Steingrímur Helgason, 7.12.2007 kl. 20:38]

Nú er Miðhalli Riðli lítt skemmt, grunar mig...  Skástur kútur, skástur...

[Halldór Sigurðsson, 7.12.2007 kl. 21:31]

Sverrir ,þú ert snillingur,.
" miðlar " spila bara á viðbrögð þeirra sem til þeirra leita .
Og þéna góðan pening .

[DoctorE (IP-tala skráð) 7.12.2007 kl. 21:34]

Ertu að segja að Þórhallur miðill sé fake.. og Maggi Skarp í geimverufélaginu sé bara í business.. og biskupinn bara að bulla og allir klikkaðir hjá Omega, hver hefði trúað þessu
Nú þarf ég að vega og meta hver er trúlegri, þú eða þeir.. ;-)

[Gísli.R (IP-tala skráð) 7.12.2007 kl. 22:28]

hlustaði á þig báða morgnanna á útvarpi sögu.  hafi mikið gaman, af. heyrði þig tala um að þú hafir ekki getað sofið útaf skrifum þínum.  og ég skil núna útaf hverju.  heilmikil lesning.  .

veit ekki hvort þú ert sjóari, enn sakar ekki að benda þér á síðuna mína. og aðra líka

[Helena (IP-tala skráð) 8.12.2007 kl. 00:12]

Ég verð að vera sammála því að 90% miðla eru feik, en það eru einnig allir kristnir spámenn! Afhverju fá þeir ekki sömu meðferð ? Fólk trúir því sem lætur því líða betur og það er staðreynd, segðu það sem það vill heyra og þá ertu á góðri leið! Annars eru þessi litlu 10% sem eru ekta og þeir þurfa ekki að hlaupa á eftir Hundini til að sanna það.

[Ásdís Sigurðardóttir, 8.12.2007 kl. 00:28]

Mér finnast greinarnar þínar of langar og nenni ekki að lesa þær. Ef þú ert að reyna að koma einhverju á framfæri mundi ég reyna að gera það í 6 línum, ef þú ert bara að bulla í eigin nafni er þetta mjög gott hjá þér.  Allavegana nenni ég ekki að lesa svona langa pistla en það er mitt vandamál ekki þitt. Hafðu það gott.

[Drengur (IP-tala skráð) 8.12.2007 kl. 01:05]

Ég nenni ekki að lesa athugasemd Ásdísar, enda þykir mér hún ekki fallega framsett.

En áfram Sverrir!

[Helga Guðrún Eiríksdóttir, 8.12.2007 kl. 01:48]

Hörku smart að nenna ekki að lesa blogg hjá fólki... og kommenta svo um þau samt. Skíta þau út án þess að vita um hvað þau eru eða hafa nennt að lesa. Fyndið!

[Nanna Katrín Kristjánsdóttir, 8.12.2007 kl. 02:46]

Það er nú samt gaman að spá og spekulera í öllum þessum hlutum plús að sögurnar eru svo skemmtilegar.  Maður á aldrei að verða of gamall til að trúa á álfa og tröll, nú eða guð og vætti, smá efasemd gerir lífið skemmtilegra.

[DoctorE (IP-tala skráð) 8.12.2007 kl. 03:03]

The more you explain it, the more I don't understand it, varstu að meina það Ásdís?

Hey guð, næsta biblía 6 línur eða minna, þetta voru allt of langir pistlar hjá þér

Það má ekki lesa pistla Sverris eins og biblíuna Ásdís því þá missir þú af allri skemmtuninni

[Sigurjón, 8.12.2007 kl. 04:19]

Stórgóður pistill hjá þér Sverrir!  Ekki verra að hafa þessar myndir með í för.  Þær krydda orðin verulega.

Svo vil ég beina þeim orðum að Böðvari Jónssyni og Ásdísi Sigurðardóttur að þið upplýsið almenning um heimsku ykkar með svona athugasemdum á opnum miðlum... 

[Heimir Tómasson, 8.12.2007 kl. 18:44]

Snilld, Sverrir snilld.

Snilld, Ásdís snilld.

Nenntuð þið að lesa þetta komment?

[Jón Steinar Ragnarsson, 8.12.2007 kl. 20:22]

Þessi 253. grein smellpassar þá við helvítis glæpahyskið og hræsnarana á Omega.  Ég var einmitt að hugsa um að fara að kæra þá. Þeir eru að lofa gömlu fólki ávöxtun á himnum og V.I.P stúku fyrir að láta af hendi spariféð sitt. Þeir gera aðallega út á hrætt og senílt gamalt fólk, þroskahefta og fatlaða. Þeir höfða beint til þeirra í máli sínu. Þarna er í gangi endalaus fjársöfnun með súluritum og loforðum um heiðursæti og blessun guðs.  Það er komið tæm á að taka þetta pakk á beinið.

[Theódór Norðkvist, 8.12.2007 kl. 21:28]

Hvað er Stormskerið að endurvinna eldgamla pistla sína? Er hann kominn með ritstíflu?

Jón Steinar, aldrei hélt ég að ég yrði sammála þér, en það er ég hvað Omegahyskið varðar.

[Vilhelmina af Ugglas, 8.12.2007 kl. 22:24]

Góð vísa er aldrei og oft kveðin!

Það skiptir engu máli Theódór þó Sverrir sé að birta hér það sem hann hefur áður skrifað.

Aldrei hef ég séð það og þá er það nýtt fyrir mig.

Haltu endilega áfram að birta gamalt efni, allavega ef það er eins gott og þetta.

[Sverrir Stormsker, 8.12.2007 kl. 23:34]

Sælt veri fólkið.

Þó ég hafi skrifað þennan pistil 2002 þá sýnist mér hann eiga alveg jafn mikið erindi í dag og fyrir 5 árum. Það var nú ástæðan fyrir því að ég tók það fram að hann væri skrifaður árið 2002. Ekki ýkja flókið.

Þess má geta að ég andmælti einhliða kristinfræðiítroðslu í grunnskólum í blaðagrein fyrir um 10 árum síðan og lagði til að þess í stað yrði kennd almenn trúarbragðafræði með formerkjum sagnfræðinnar en ekki trúboðs. Benti á að það væri verið að fremja skýlaust lögbrot. Íslendingar voru ekki að velta þvílíku smotteríi fyrir sér í þá tíð, en þeir eru blessunarlega farnir að átta sig á þessu í dag, örfáir, og nú hefur hinn skeleggi menntamálaráðherra okkar, kaþólikkinn Þorgerður Katrín, tekið af skarið og ákveðið að framfylgja ákvæðum Mannréttindadómstóls Evrópu, og þá fara allir af hjörum. Að fara að lögum? Nei alldeilis ekki. Kemur ekki til greina. Ísland á að standa utan við allar alþjóðlegar samþykktir! Greindarlegt alltsaman. Ætli ég birti ekki þennan pistil minn fljótlega á þessu bloggi, einfaldlega vegna þess að hann á jafn mikið erindi við okkur í dag og fyrir 10 árum síðan þegar allir voru hrjótandi.

Þess má geta að ég hitti Þorgerði í fertugsafmæli sameiginlegs vinar okkar í gær, Kjartans Magnússonar borgarfulltrúa, og ræddi þessi mál lítillega við hana. (Helvíti er hún annars flott og ísmeygileg skutla. Má ég segja það?) Hún sagði að þó að þetta "kristilega siðgæði" væri tekið úr plagginu þá væri það í verkahring hvers skóla fyrir sig að ákveða hvernig þessu yrði háttað. (Sjálf sagðist hún vera mjög trúuð og ég sagði að það væri bara hið besta mál, en hugsaði: Hver hefur sinn djöful að draga) Þetta er semsé enginn aðför að kristninni þannig að ég held að það sé alveg óhætt fyrir þau 50% þjóðarinnar sem telja sig gasalega kristin að láta af móðursýkinni og fara að anda með gosanebbanum langa.

Enn aðra eldri grein ætla ég að birta hér á blogginu en hún fjallar um Omega og þeirra vafasama betl. Þó að sú grein hafi verið skrifuð fyrir 7 árum eða svo þá á hún einsog sumar greinar mínar jafn mikið erindi við okkur í dag einsog þá, því það er núna fyrst sem Íslendingar eru að vakna til meðvitundar um ýmis mál sem ég var að fjalla um fyrir löngu síðan og enginn veitti eftirtekt þá. Þetta er ekkert mont heldur staðreynd, þó ég þykist vita að menn munu eflaust snúa þessu á haus og koma með persónulega dylgjur á mig fyrir vikið.  Það voru einfaldlega allir steinsofandi fyrir mörgum hlutum sem ég var að reyna að vekja athygli á á sínum tíma og því er líklegast tímabært að endurbirta suma af þeim pistlum í dag.

Það er alveg lýsandi að júróvisjónlagið sem vann í kvöld hét "Don´t Wake Me Up"  eftir tónlistarkonu sem kallar sig Fabúla. (Orðið fabúla þýðir: Lygi, Lygasaga, og listamenn velja sér ekki listamannsnöfn útí loftið heldur nöfn sem þeir samsama sig við). Fabúla þessi er alveg greinilega ekki eini Íslendingurinn sem vill halda áfram að lifa í lyginni og sofa og hrjóta og neita að vakna. Þannig er ástatt um æði marga Íslendinga og þessvegna finnst mér alveg gráupplagt að skjóta hér inn á milli í bloggi mínu nokkrum af mínum eldri pistlum til uppvakningar þar sem ég finn að sumir eru farnir að rumska. Ekki flóknara en það.

Eigið góða helgi öllsömun. 

[Jón Steinar Ragnarsson, 9.12.2007 kl. 00:07]

Fólk má trúa á strákústa fyrir mér, ef það heldur því bara fyrir sjálft sig og reynir ekki að troða sannfæringu sinni ofan í aðra, svo ekki sé talað um að það hætti að kalla lygi sannleika og sannleika lygi. Hætti að sníkja og hóta verri vist eða lofa betri fyrir peninga.  Þeir sem viðhafa slíka glæpi ættu að sæta viðurlögum og mætti staðfesta lögfræðihugtakið Trúarlegt áreiti, svo menn geti kært slíka hegðan.  Fólk má trúa ef það hættir að ljúga um það sem það hefur ekki hugmynd um.  Að trúa er að telja eitthvað sannleika, sem annars er fabúla, afstætt og ósannanlegt. 

Megir þú birta þetta aftur og aftur Stormsker, því ekki veitir af að sporna gegn þessum yfirgangi.  Hér þarf að tala tæpitungulaust og forðast að leyfa trúarvelgjunni að draga þessa umræðu niður á lágkúrulegt tilfinningaplan um kertaljós og piparkökur; fermingarferðir og frídaga; eða hvað það nú er ekki, sem þetta fólk er að væla um.

Teddi minn. Ég er viss um að við erum sammála um fleira en þig grunar. 

[Gunnar Hrafn Jónsson (IP-tala skráð) 9.12.2007 kl. 03:37]

Ég fór einusinni til miðils sem gat sagt mér að afi minn eða amma mín hétu kannski Guð- eitthvað, ekki get ég útskýrt það. Sérstaklega þar sem ekkert þeirra heitir Guð-neitt. Mjög spúkí.

[Rafael (IP-tala skráð) 9.12.2007 kl. 14:16]

Þú hefur greinilega aldrei orðið fyrir yfirnáttúrulegri reynslu sjálfur. Vissulega er til fólk sem gerir sér upp ýmsa hæfileika í gróðaskyni. En að aðfneita allri tilvist yfirnáttúrulegs eðlis, finnst mér vera grunnhyggni. Hvað með drauma, berdreymi og fleira, erum við mennirnir kanski "hin fullkomna sköpun" að þínu mati, og ekkert okkur æðra?

[Ólafur Jónsson, 9.12.2007 kl. 15:33]

Ef miðlar væru alvöru myndu þeir einfaldlega eins og Sverrir bendir á segja manni beint frá öllu, ekki fiska það upp úr þeim sem þeir eru að tala við ( þeir eru að fá upplýsingarnar að handan, er það ekki). En þær upplýsingar eru alltaf fáránlega óskýrar, og þarfnast útskýringar viðmælandans.

[Rut Bjarna (IP-tala skráð) 9.12.2007 kl. 17:05]

Hver ert þú? Hvað gerir þig svona merkilegan?Nákvæmlega ekkert. Þú átt hér ágætan já kór, fínt er það, en engu breytir það hver þú ert, lítill og ómerkilegur náungi sem fær mig til þess að færa mig yfir götu þegar þú kemur gangandi og í annan bekk þar sem þú sest, bara svo ég þurfi ekki að vera í návist hrokans og grimmdar sem frá þér kemur, sjaldan haf ég lesið eins haturfull skrif og koma frá þér, Jón Steinar kemmst nálægt sérstaklega þegar kemur að löngum þvælum sem útskýra mun betur hans hugsunar hátt líkt og þinn, sem er dramsamur, fordómafullur my shit don´t stink liggiliggiló skrif.  Verði ykkur að því. 

[Vilhelmina af Ugglas, 9.12.2007 kl. 19:16]

Rut Bjarna, þessi tegund af færslu á ekki að finnast á blogginu. Þetta er skítkast úr launsátri! Það er að sjálfsögðu í lagi að skrifa undir dulnefni á blogginu en þá er mikilvægt að vera hlutlæg og málefnaleg.

Það minnsta sem hægt er að krefjast af fólki sem er með persónulegt skítkast er að það birt af sér mynd og skrifi undir fullu nafni. Annars læðist að manni sá grunur að þetta sé Biskupinn að skrifa undir dulnefni. Þú vilt væntanlega ekki að fólk trúi sonalöguðu uppá blessaðan Biskupinn?

Sjálf er ég á móti skítkasti á trú fólks (enda sjálf trúuð) en ég er jafn sannfærð um að trú á ekki heima í stjórnmálum eða menntakerfinu. Það er líka sorglegt þegar trúað fólk er sannfært um að það (og bara það) viti hvað sé rétt og rangt og hafi einkarétt á að túlka Biblíuna. Það er hroki sem er ein af dauðasyndunum. Æ,æ, nú er það ég sem geri mig seka um það sama og ég var að gagnrýna aðra fyrir.

[Guðrún (IP-tala skráð) 9.12.2007 kl. 20:48]

Ég hef aldrei orðið vör við "hatur" "hroka" eða "grimmd" í skrifum Sverris þó ég sé ekki alltaf sammála honum. Mér finst skrif hans fyrst og fremst einkennast af rosalegum húmor og skarpskygni. Hann er náttúrulega flugbeittur en það er ekki grimmd. Miðað við öll fallegu lögin hans eins og til dæmis þau sem hann er með í tónlistarspilaranum hérna á síðunni þá virðist hann vera mjög hjartahlýr og algjört ljúfmenni.

En þvílíkur sori og óhróður sem þessi aumkunarverða Rut Bjarna dembir út úr sér. Sú hlítur að eiga bágt. Ég tek undir með Vilhelminu að svona viðbjóður á ekki að sjást á blogginu. Að vega svona úr launsátri með persónulegu skítkasti og óþverraorðbragði lýsir ragmennsku og grimmd og hatri og hroka og afar takmörkuðum gáfum. Aumkunarverð manneskja verð ég að segja. Þessi setning sem Rut Bjarna lætur út úr sér "Sjaldan hef ég lesið eins hatursfull skrif og koma frá þér" hitta hana beint í hausinn. Ég hef nefnilega sjaldan lesið eins hatursfull skrif og frá þessari Rut. Ég vorkenni svona fólki. Það ætti að rekja IP tölu hennar og kæra hana fyrir meiðyrði.

Haltu ótrauður áfram Sverrir með þína frábæru pistla.  

[Hjalti Garðarsson, 9.12.2007 kl. 21:35]

Þessi pistill er snilld.  Ég neyðist víst til þess að vera hjáróma rödd í jákórnum þínum Sverrir.  En því er ekki að leyna að betra útvarpsefni fyrirfinnst ekki.  Þessir loddarar trúa öllu sem þeir segja.  Það gerir þetta svo yndislega fyndið.

Varðandi Omega, þá vil ég misnota aðstöðu mína og setja link á skrif mín um þá stöð.  http://hjaltig.blog.is/blog/hjaltig/entry/367972/

[Hilmar Kári Hallbjörnsson, 9.12.2007 kl. 23:03]

Fólk getur haft skoðanir á öllum hlutum, jákvæðar og neikvæðar.  Þó ég þekki Sverri ekki neitt, tel ég að hann sitji í horni sínu og skríki af vellíðan í hvert skipti sem einhver tjáir sig um bloggið hans.

Eníhú, þetta er flottur pistill, gamall eða nýr ( ekki fyrsti sem endurnýtir efni ), hann fór þó í sína eigin smiðju, ólíkt Hannnesi Hólmsteini. 

Ég neyddist, vegna þess að ég fékk alltaf far til Reykjavíkur á sunndagskvöldum, að hlusta á þessa útvarpsmiðla, og í kjölfarið fór ég að kalla þáttinn Lífsleiðann, enda er Þórhallur með eindæmum leiðinlega rödd, og mig langaði helst að hengja mig eftir að hafa hlýtt á manninn.

Stormsker, hef hlustað á þig síðan þú gafst út Ör-lög, það er bara til eitt orð yfir menn eins og þig, snarklikkaður, úttaugaður snillingur með mikilmennskubrjálæði.  Sem er töff 

[Predikarinn - Cacoethes scribendi , 10.12.2007 kl. 01:28]

Það er haft eftir Jay Leno eitthvað á þá leið að það væri sérkennilegt að fréttir eins og eftirfarandi tröllríði ekki fjölmiðlum : Larry miðill vann 1. vinning í lottóinu á miðvikudaginn. Sigga miðill vann allan pottinn í laugardagslott+óinu.....  Já skrítið.

[Rut Bjarna (IP-tala skráð) 10.12.2007 kl. 16:50]

Já mikið rétt, þarna lét ég pirringinn mig leiða, og ég er ekki sérstaklega stolt af því og bið ég því innilegrar afsökunar á því, húmorinn þinn er kladhæðninn og hafði ég gaman af slíku þar til slíkt særði vin minn, hef ég því litla þolinmæði fyrir slíkum húmor enda er hann oftast en ekki særandi.  Hinir ofurréttlátu hér inni hafa gert nákvæmlega það sem Já kór er sæmandi og standa vörð um þitt viðkvæma hjarta (kaldhæðni) enda ekki vanþörf á (aftur kaldhæðni).  Hafðu það sem allra best um jólin (ekki kaldhæðni) og ég lofa að skrifa aldrei kaldhæðni athugsemd við þínum pistlum aftur því þá er ég bara dæmd norn (tíhí)og annað eins og grimm..úú ég verð ætli ég verði fá smá rassskell (kaldhæðni).

Gangi þér samt vel.

[Steinunn Helga Snæland, 10.12.2007 kl. 17:17]

Hreinlega FRABÆR grein, innsæi, húmor og ískaldur sannleikurinn,- allt snyrtilega samann pakkað að hætti Sverris!!

Miðlar á Íslandi eru oftast fólk sem er á opinberum bótum, og notar vanmátt og sorg annarra, til að bæta fjármagnsstreymi,- og það sem sorglegra er, þetta fólk auglýsir sig, segir kinnroðalaust að "samtalið" kosti eitthvað á bilinu 3500 til 5000 krónur (síðast þegar ég vissi, kannski dýrara núna), og þótt þessi féfletting fari frm fyrir allra augum, hef ég ALDREI heyrt að skattayfirvöld hafi svo mikiö sem REYNT að ná skatti af þessum kvikindum!!!

Þannig að á sama tíma og skattborgarinn borgar einhverskonar fjármögnun til að halda þessu liði gangandi, þá ausa þau inn margföldum tekjum hans í gegnum sorg og taugaveiklun, góðs og grunlauss fólks.

ÞAÐ er VIÐBJÓÐUR, þið þarna, sem eruð svo dugleg að tala um VIÐBJÓÐ!!!

Hitt er annað, að ég held fast í mína barnatrú, en hún langamma mín blessunin, sagði mér mjög snemma (þegar hún kenndi mér Faðirvorið og aðrar fallegar bænir) að ég þyrfti ekki að hafa opinbera byggingu eða starfsmann á opinberum launum, til að tala við minn Guð. Allt sem ég þyrfti, væri bara að tala við hann, stundum myndi það virka, og stundum ekki. Og hingað til hefur hún haft á hárréttu að standa!!!

Það er nú kominn tími til að fólk taki hausinn útúr rassgatinu á sér, og hrökkvi inn í tuttugustu og fyrstu öldina, þetta er heldur spaugilegt, þessi hjátrú á sínum bestu stundum,- en mjög og skaðsöm vansælu/viðkvæmu fólki, á sínum verstu stundum..... Sverrir, haltu þínu striki!!!!

[jón ásgeir (IP-tala skráð) 10.12.2007 kl. 19:04]

sæll skíthæll og bróðir benna búálfs ertu hommi ég vissi það ekki en veit að þú ert í íþróttum svo þú hlítur að vera hommi hélt að þú værir bara með smástelpum en svona er þetta líf enginn er verri þótt hann sé perri nema hann sé eitthvað á við sverri

[Púkinn, 10.12.2007 kl. 20:01]

Þessi pistill þinn er snilld, eins og flest annað sem frá þér kemur.....kannski ofurlítið langdregið stundum, en mikið innilega er Púkinn sammála þér.

[Gunni bekkur (IP-tala skráð) 11.12.2007 kl. 01:43]

"Rut Bjarna", athugarsemd þín um Sverrir var ekki "kaldhæðni" eins og þú lætur núna í veðri vaka heldur persónulegt hatur og óhróður af lægstu kvötum. Það er ekkert í pistli Sverris sem einn eða neinn ætti að geta móðgast persónulega yfir enda engin nöfn nefnd. Hann er bara að tala um miðla og gerir það á hnittin og kómískan hátt. Eina manneskjan sem hann nefnir með nafni er Fabúla sem hann kemur inn á í athugarsemdadálknum í einhverskonar grín innskoti. Hún er þar af leiðandi eina manneskjan sem gæti hafa móðgast illilega og þessvegna get ég ekki betur séð en að þú "Rut Bjarna" sért Fabúla. Það er mín kenning. Það kemur í ljós ef Sverrir ákveður að gera eitthvað í þessu sem mér fynst svo sannarlega að hann ætti að gera.   

Ég er ekki í neinum "já kór" Sverris frekar en aðrir sem eru hrifnir af pistlum hans. Það vill bara svo til að maðurinn á fjölmarga aðdáendur og ertu á móti því að þeir kommenti jákvætt á þá pistla sem þeir eru hrifnir af? Viltu að við förum að hrauna yfir hann á persónulegum og lúalegum nótum eins og þú? Þú ert hins vegar í þeim hópi sem villt nota bloggið til að hreita skít í fólk og ausa úr skálum persónulegrar reiði og haturs yfir fólk sem þú telur þig eiga eitthvað sökótt við. Mér fynst það ljótur leikur og ódrengilegt. Það er á ofsalega lágu plani. Svoleiðis fólk þarf að fjarlægja úr bloggheimum.

Gangi þér vel að losna við grimmdina "Rut Bjarna"

Sverrir, haltu áfram að skrifa æðislega pistla. Þessi er snilld. Ekkert annað orð yfir það.  

[Jóhannes (IP-tala skráð) 11.12.2007 kl. 11:33]

“Hafi maður eða kona særingaranda eða spásagnaranda, þá skulu þau líflátin verða. Skal lemja þau grjóti, blóðsök hvílir á þeim.”

Er ekki verið að staðfesta þarna með þessum orðum að miðlar séu raunverulegt fyrirbrigði ?

[Guðrún (IP-tala skráð) 11.12.2007 kl. 12:00]

Gunni bekkur. Þegar ég skoða þetta betur þá get ég ekki annað en tekið undir með þér. Það eru bara 2 menn sem þessi "Rut Bjarna" hellir svívirðingum yfir af skefjalausri heift og geðveiki. Sá sem verður fyrst og fremst fyrir hatursgusum hennar er Sverrir og svo fær Jón Steinar væna slummu og þetta eru EINU mennirnir sem minntust á Fabúlu. Á aðra lifandi Íslendinga var ekki minst í pistli eða athugasemd Sverris og enginn annar hafði ástæðu til að reiðast. Bæði Sverrir og Jón Steinar notuðu orðið Fabúla í merkingunni lygi, sem er rétt merking orðsins og það hefur farið svona ofboðslega fyrir brjóstið á þessari Fabúlu prímadonnu. Sverrir hefur í hæðnistón sínum um lyganafn hennar snert einhvern ofurviðkvæman streng, hitt naglan á höfuðið. Hún er líklegast hrað lygin. Ekki nóg með að nafnið Fabúla merki lygi heldur lýgur hún meira að segja til nafns líka og kallar sig "Rut Bjarna" á blogginu og reynir í gegnum það nafn að ljúga hatri og grimmd upp á Sverri. Þetta er augljóst. Greinilega eitthvað mikið að í kollinum á þessari manneskju. Einhver mikil beyskja og hatur og grimmd og hryllilega hallærisleg viðkvæmni fyrir sjálfri sér. Bilun. Svona fólk á að fá útrás fyrir sálarflækjur sínar annarsstaðar en á bloggsíðum. Þetta er lítilmannleg og ragmenskuleg og ljót framkoma af henni. Ég mana þig Sverrir að láta rekja IP tölu hennar og kæra hana fyrir meiðyrði.

[Heimir Tómasson, 11.12.2007 kl. 18:53]

Það er ekki einusinni eins og mér finnist lögin hennar vera góð.... sjáum hvort hún hrauni yfir mig núna.....

[Björn (IP-tala skráð) 11.12.2007 kl. 21:57]

Þessi illa upp alda Fabúla mun ekki hrauna yfir þig Heimir undir nafninu “Rut Bjarna” af því að það er greinilega búið að fletta ofan af henni. Ekkert smá lúalegt af henni að fara inn á bloggsíðu kollega síns í bransanum, Sverris, og drekkja honum í svívirðingum undir fölsku nafni. Druslulegt og lélegt maður. Heigulsháttur dauðans. Virkar eins og hún sé að drepast úr minnimáttarkennd gagnvart honum. Ég pant ekki kynnast þessu kvendi. Ég sá hana einhverntíma með Sverri í einhverju blaði þar sem hún var eitt stórt smjaður og þóttist vera voðalega góð vinkona hans. Ojojo! Gæti ælt. 

[Jóhann E. (IP-tala skráð) 12.12.2007 kl. 14:28]

Hver er þessi Fabúla?

Ég hef mikinn áhuga á tónlist en ég hef aldrei heyrt minnst á þessa Fabúlu nema bara hér. Ég hélt að fabúla væri bara eitthvað orð yfir óra og lygi og bullshit og eitthvað svoleiðis því það er nefninlega talað um að fabúlera sem merkir að rugla vitleysu. Þessi Fabúla kann það perfekt.

Er hún eitthvað wannabe í tónlistarbransanum? Eitthvað fabúlerandi nobody? Hún getur varla hafa verið að gera merkilega hluti. Karakterinn virðist allavegana ekki vera upp á marga fiska.

Sverrir kærðu þessa undurförlu kellingu og farðu nú að koma með nýjan pistil svo maður getur farið að hlægja 

[Einar Guðmundsson (IP-tala skráð) 12.12.2007 kl. 15:41]

Það var mynd af þessari Fabúlu í Mogganum í gær og þar kom fram að hún heitir réttu nafni Margrét Kristín Sigurðardóttir. Þetta er svona einhver rosalega pirruð stýfmáluð miðaldra kerling sem reynir að virka eins og 17 ára beib. Glatað. Hún samdi þetta afspyrnu leiðinlega lag sem vann í Laugardagslögunum núna síðast. Símareikningurinn verður örugglega hár hjá famelíjunni hennar því ég veit um engan sem fílaði þetta. Það var umsögn um þetta djönk í Mogganum í gær:


"Ragnheiður Gröndal náði hins vegar að blása lífi í frekar ófrumlegt lag Fabúlu en Fabúla útskýrði sigurinn með því að lagið væri "breiðvirkt – líkt og sýklalyf??"

Botnar einhver í þessu bulli? Ég man að hún reyndi að útskýra þessu þvælu í þættinum og hún endaði með því að segja að áhorfendur væru bagteríur. Alveg fáránlegt. Tilgerðin og ruglið í henni var svo yfirþirmandi að fólkið í kringum hana roðnaði og snéri sér undan en sjálf var hún eitt sólheimasmæl. Og svo kemur hún á þessa blogsíðu undir fölsku nafni og úthúðar Stormsker eins og vitfirringur með ógeðslegu orðbragði fyrir eitthvað smá djók. Það er augljóslega eitthvað mikið að þessari kerlingu. Einhver geðveila í gangi. Ber nafn með réttu: Fabúla = rugl.

[Mosi frændi (IP-tala skráð) 12.12.2007 kl. 17:04]

Það þarf nú ekki að vera að Rut Bjarna sé Fabúla, þó hún "gangi ekki á öllum".  Sakleysi uns sekt er sönnuð, það sögðu Árni Johnsen og Eyþór Arnalds að minnsta kosti, og ekki hafa þeir herramenn nú rangt fyrir sér (hmm eða hvað???)Fólk sem á bágt tekur uppá ótrúlegustu hlutum, til dæmis að láta Þórhall miðil, Gumma í Byrginu, Snorra í Betel, Gunnar í Krossinum og aðra "handans" menn kyssa á báttið, oftar en ekki gegn einhverri þóknun.  Allt í nafni trúarinnar, að sjálfsögðu.Sannast einnig hið forkveðna:  If it looks like shit, smells like shit and tastes like shit...... it certainly must be shit !  Taka til athugunar að þetta á ekki við um pistilinn sjálfan heldur umfjöllunarefnið.

[Anna Ásgeirs (IP-tala skráð) 12.12.2007 kl. 18:33]

Ef að þetta væri ekki Fabúla þá væri hún alveg ÖRUGGLEGA komin inn á bloggið undir fullu nafni til að leiðrétta "misskilninginn." Hún kom á þessa síðu öskrandi og gargandi undir feiknafni, það komst upp um hana og hún flýr inn í skáp og síðan hefur ekki spurst til hennar. 

Ég er sammála Mosa frænda: "If it looks like shit, smells like shit and tastes like shit...... it certainly must be shit !"

[Kiddi Krókríðandi (IP-tala skráð) 13.12.2007 kl. 23:03]

"Rut" Margrét Lágkúruláfa: Haltu þig við það sem þú gerir skást. Það er hvorki að skrifa né syngja... allavega ekki með efri vörunum.

Áfram Sverrir! 

[Guðmundur G. Hreiðarsson (IP-tala skráð) 18.12.2007 kl. 10:52]

Fyrir hvern skyldu þeir starfa, sem tala gegn útbreiðslu fagnaðarerindisins? Ötullega og án þess að þiggja eyri fyrir!?