Saga um ástir og örlög

Í húsasundi mættumst við að morgni,

það magnþrungin var ást við þriðju sýn.

Ég kunni enga karlmannlegri siði

en kyssa þig og horfa í augu þín.

 

Ísinn brast í okkar litlu hjörtum,

ástarblómin rótum skutu í þeim.

Við fundum strax að fengjum við að njótast

þá fjandinn mætti eiga þennan heim.

 

Sem í draumi dagar bjartir liðu,

við drukkum lífið einsog kampavín,

ólmuðumst og okkur veltum látlaust

uppúr sælustundum líkt og svín.

 

Allt ég man úr árbók minninganna.

Við ótal sinnum gengum niðrað tjörn

og hugsuðum um hamingjuna okkar

og hvort við skyldum reyna að eignast börn.

 

Allt var dásemd, dýrðlegt ævintýri,

hver dagur sem við lifðum, satt er það,

en þó bar við að beiskir böðlar reyndu

að breyta okkar kærleikslind í svað.

 

Já til var mannfólk öfundsjúkt sem sagði

að samband okkar færi í hund og kött

og væri helber öfuguggaháttur

og alveg gjörsamlega útí hött.

 

Ég trúði þessum mönnum mátulega,

já mikið var ég efins fyrst um sinn.

En þessi orð með hörmulegum hætti

hljóta að hafa greypst í huga þinn,

 

því stuttu síðar komstu til að kveðja,

eitt kyrrlátt kvöld um miðjan september,

og tjáðir mér með orðum augna þinna

að þú vildir hverfa burt frá mér.

 

Og síðan hefur sál mín spurul leitað

að svörum um hin döpru endalok.

Aldrei mun ég elska nokkuð framar.

Af öllu hef ég fengið uppí kok.

 

Ég hugsa um þig alla daga og nætur

og oft ég reika um kynlegt húsasund

miður mín og hræðilega hryggur.

Ég held ég verði að fá mér annan hund.

 

 

 

(Gerði þetta átakanlega ástarkvæði um tvítugt. Birtist í ljóðabók minni Vizkustykki, 1991) 

Athugasemdir

[Nanna Katrín Kristjánsdóttir, 13.12.2007 kl. 12:58]

Æ þetta er sætt.  Hundar eru líka æði.

[Þröstur Unnar, 13.12.2007 kl. 13:58]

Kinky að góna í augun á hundi og fá löngun til að kyssa hann.

[Maddý (IP-tala skráð) 13.12.2007 kl. 15:28]

Ekki lætur húmörinn á sér standa hjá þér þrátt fyrir átakanlega lífreynslu

@Þröstur, þú þarft að prufa að kyssa hund, þá skiluru betur að það er ekkert kinky við það!! 

[Eysteinn Eysteinsson (IP-tala skráð) 13.12.2007 kl. 17:45]

Fyndið, var þetta ekki í ljóðabókinni Viskustykki?

[Heimir Lárusson Fjeldsted, 13.12.2007 kl. 18:33]

Það hefur ekki verið hundur í honum þessum.

[Jón Steinar Ragnarsson, 13.12.2007 kl. 19:34]

Tær snilld. Minnir á eitt tregaljóða Tómasar Guðmundssonar um æskuástina.  Hann bliknar með sitt tjöruborgarskjall.

[helga (IP-tala skráð) 13.12.2007 kl. 21:02]

Ja, það er nú það?Hundur eða kona/maður? Við vitum aldrei hvað Stormskerið hugsar í alvöru en fallegt ljóð. Snilli í leik með orð og túlkun. Áfram Stormsker og ég vil íslenska þýðingu á nýjasta diskinn þinn. Frábær diskur. Takk fyrir hann þó aðeins sé liðið frá útgáfu hans. Aðdáandi. Helga.

[Vilhelmina af Ugglas, 13.12.2007 kl. 21:11]

Gott kvæði fyrir tvítugan!

Hef það á tilfinningunni að þetta hafi ekki endilega verið hundur þrátt fyrir allt?

En að leysa upp ástarsorgina með djóki á þennan hátt er snilldarbragð!

[HGE (IP-tala skráð) 13.12.2007 kl. 23:28]

 She loves me not...

[Heimir Tómasson, 13.12.2007 kl. 23:47]

Flott kvæði, beint framhald af Bron-y-aur Stomp með Zeppelin.

[Steingrímur Helgason, 14.12.2007 kl. 00:17]

Hálf tíkarlegt, eiginlega ...

[Vilborg Valgarðsdóttir, 14.12.2007 kl. 11:42]

Dásamlega tíkarlegt, eiginlega ...

[Vilhelmina af Ugglas, 14.12.2007 kl. 18:06]

Minn kæri!

Ég les oft þitt blogg og mun sakna þín. Ég kveð nú bloggheim í bili og sný aftur til Afríku. Þar sem ég bý er útilokað að blogga en ég les bloggið þegar ég get. Jólagjöfin frá mér til þín er HÉR =

http://vilhelmina.blog.is/blog/vilhelmina/entry/391293/

Gleðileg Jól!

[alva (IP-tala skráð) 15.12.2007 kl. 00:14]

hahah flott ljóð...það eru tvö hundspott á mínu heimili...mig langar ekki til að kyssa þá..en yngsta dóttirin og mexíkanski gringóinn minn eru oft í hörkusleik...ógeð...

Ég bíð spennt eftir ömmuljóðinu þínu hér á síðunni...hehe

[Heiða Þórðar, 15.12.2007 kl. 01:04]

Meiriháttar dásamlegt þá það sé í aðra röndina tíkalegt...

[Steingrímur Helgason, 16.12.2007 kl. 00:55]

Öngvin sanngirni í því fólgin náttla að vera farinn i hundana rétt um tvítugt.

[skilningur, 16.12.2007 kl. 11:28]

Ég skil.

[Hróðmar Vésteinn, 16.12.2007 kl. 20:34]

Af hverju skrifaru ekki ljóð um vændiskonurnar sem þú sængaðir hjá öll kvöld í Pattaya?

[Anna (IP-tala skráð) 17.12.2007 kl. 00:56]

Þegar ég hélt að hæstu hæðum í leiðinlegheitum bloggheima væri náð steigst þú, Sverrir Stormsker fram á ritvöllinn. Leiðinlegri langlokur fyrirfinnast varla í gjörvöllum bloggheimum eða hvaða ritheimum sem er. Það er ekki nokkur manneskja sem nennir að lesa þessar endalausu þvælur sem frá þér koma. Það er þó bót í máli að sjálfum þykir þér þú skemmtilegur maður. Þú sem samdir einu sinni svo undurfögur ljóð er að breytast í leiðinda-gamalmenni þar sem biturleikinn einn ræður ríkjum. Besserwisserar eins og þú eru best geymdir í höllum langt fjarri Íslandi, í landi þar sem enginn skilur tungumálið þeirra. Almáttugur hvað þér tekst að vera leiðinlegur elsku maður! 

[Drengur (IP-tala skráð) 17.12.2007 kl. 14:14]

Ég heimsæki stundum fólk til að segja því hvað það er leiðinlegt.

[Steinunn (IP-tala skráð) 19.12.2007 kl. 00:21]

Hello... getur einhver sagt mér hvað ég get keypt bækur Stormskers... td. þessa með orðaflækjunum, Frekar góð.

[Rúna Guðfinnsdóttir, 19.12.2007 kl. 08:23]

Yndislegt

[Steindór (IP-tala skráð) 20.12.2007 kl. 01:58]

Rómó og fyndið ljóð. Algjör snilld. Að mínu mati ertu að skrifa lang skemmtilegustu og beittustu pistlana á blogginu og á landinu. Þessvegna fara þeir kannski svona mikið í taugarnar á þessum úrillu feministakerlingum og ofsatrúarfólki. Lengdin á pistlunum skiptir engu máli ef þeir hitta í mark og það gera þeir svo sannarlega. Fólk brjálast alltaf þegar það er rökþrota og þá byrjar það að skítkastast á persónulegum nótum. Svoleiðis gera bara illa gefnir aumingjar. 

Þú ert bestur. Ekki nokkur spurning.  

[Kjartan Pétur Sigurðsson, 22.12.2007 kl. 01:32]

Hef haft gaman af skrifum þínum Sverrir. Hef verið að vinna fyrir Kassagerðina aðeins og rakst þá á bróðir þinn. Mikið eru þið ólíkir :)

Þekki Sigurð Val myndskreytir sem sá um að gera teikningarnar í bókina hjá þér. Flott bók og á að sjálfsögðu eitt eintak.

En furðuleg tilviljun að dagurinn 6.9.62 skuli tengja okkur saman!

Gleðileg jól og takk fyrir skemmtilegt bloggár :)

[Gísli Hjálmar , 24.12.2007 kl. 11:58]

 

Ég vil óska þér og þínum gleðilegra jóla og gæfuríks komandi árs. Jafnframt þakka ég skemmtileg bloggviðkynni á árinu sem er að líða ...

kv, GHs

[Þorkell Sigurjónsson, 24.12.2007 kl. 12:14]

Gleðileg jól.

[Kjartan D Kjartansson, 24.12.2007 kl. 14:02]

Megið þið öll eiga 
Gleðileg jól og farsælt komandi ár!

[Túrilla, 27.12.2007 kl. 08:28]

Þótt seint sé þá langar mig að óska þér gleðilegra jóla og farsældar á komandi ári.
Megi bloggpenninn góði halda ótrauður áfram, þrátt fyrir gagnrýnisraddir sumra sem ekki kunna önnur rök en persónuleg skítköst. Hjartans þakkir fyrir bloggvináttuna okkar stuttu. Hafðu það alltaf sem best.