120 ár eru í dag liðin frá fæðingu frelsishetju Íslands, Adolfs Hitlers

Íslandsvinurinn og athafnaskáldið Adolf Hitler er 120 ára í dag. Þessa merkisdags er minnst með mismiklum fögnuði og húrrahrópum út um allan heim. Adolf var ákaflega hrifinn af Íslandi en hann var reyndar einnig hrifinn af hefðbundnum þrælabúðum, sem sýnir kannski hvað hann hafði fjölbreytilegan smekk.

 

Hrifning hans á Íslandi gekk svo langt að hann samdi ungur að árum söngleik um þessa útópíu sína, Klakann, og seinna þegar hann var kominn til valda þá sendu þeir vinirnir, hann og Himmler, ýmsa erindreka hingað til lands til að rannsaka þessa þrælmerkilegu sögueyju og hetjurnar sem hér áttu að ríða um héruð með sverð í annarri hönd og fjaðurpenna í hinni. Hetjurnar voru því miður flúnar land eða höfðu allar látist í fornsögunum, en því meira fundu þeir hér af útpískuðum vinnuþrælum, misindismönnum og örlagarónum. Um æðar þeirra rann að sjálfsögðu fullkomlega hreint arískt blóð, reyndar í bland við smá alkóhól. Þetta voru semsé útópískir útpískaðir vinnuþrælar.

 

Þetta var skömmu fyrir stríð þegar götur Reykjavíkur voru eitt drullusvað og menn einangruðu bárujárnshjalla sína með dagblöðum og þurrkuðum hundaskít. Við vorum víðs fjarri nútímanum. Við vorum í raun þriðja heims land einsog við erum að stefna í að verða aftur. (Sjá mynd hér til vinstri af Hverfisgötu fyrir og eftir stríð). Eftir þessar rannsóknir sínar var Adolf fljótur að sjá að þessi eyja var einkum merkileg fyrir einar sakir; fornsögurnar, en að öðru leiti var þetta afar frumstæð þrælaeyja og að því leiti kannski "þrælmerkileg." Seinna ásældist hann þennan klett vegna hernaðarlega mikilvægrar staðsetningar hans en það er önnur saga. Hernaðarsaga.

 

Þegar Adolf var hættur að geta haft frið fyrir friði þá fór hann í stríð einsog frægt er orðið. Þetta ágæta stríð hafði það í för með sér að Djöflaeyjan reis úr öskustónni og varð græn einsog þeir sem hana byggðu. Alltíeinu varð næga atvinnu að hafa á öllum sviðum; í fiski, tónlist, verslun og viðskiptum, vegavinnu, sjoppuránum, húsasmíðum og hrákasmíðum og eiginkonurnar létu ekki sitt eftir liggja í þjónustu við dátana, sem var víst alveg draumur að vera með, samkvæmt laginu góða. Menn flykktust úr moldarkofunum og fóru að vinna út um allt og stjórnmálatengdir stórgróðaspekúlantar settu á fót myndarleg svindilbraskkompaní og svo kom Marshall-aðstoðin sem var svo rífleg að það hefði mátt halda að við værum stríðshrjáð land á barmi glötunnar. Við erum það kannski núna en það var nú öðru nær í þann tíð.

 

Meðan styrjöldin geisaði útí heimi var hér á Íslandi talað um "blessað stríðið" sem gerði okkur rík og frjáls. Meðan aðrar þjóðir voru blóðugar uppfyrir haus þá smjöttuðum við á kavíar og tartalettum og þömbuðum kampavín inná Hótel Borg og reyktum sígarettur úr munnstykkjum einsog lávarðar og veltum okkur uppúr nýfengnum stríðsgróða einsog útrásarvíkingar, nema hvað við græddum á innrásum annarra þjóða. Ég kem aðeins inná þetta í ljóði sem ég orti fyrir rúmlega 10 árum sem heitir "Svefn er besta vörnin" og birtist í ljóðabók minni "Með ósk um bjarta framtíð." Það er svona:

 

 

 

Í seinna stríði var ófriðlegt um að litast,

þá áttust við þriðja flokks ræflar og göfugir aríar,

en uppi á Fróni var friðurinn aldrei meiri,

menn fóru í bingó, dæstu og smjöttuð´á kavíar.

 

Ró og spekt er enn yfir Íslendingum,

alltaf hefur ríkt hér friður nokkur.

Við erum ekki hluti af þessum heimi,

- heimurinn er bara hluti af okkur.

 

Einsog skáldið hrópaði hérna forðum:

"Hungursneið er fjarri Íslands ströndum

Horfðu á björtu hliðarnar minn kæri;

heimsstyrjaldir verða í öðrum löndum."

 

Þótt jörðin farist þá ferst ekki Skerið góða,

um framtíð alla mun þrífast hér mörlandaflokkur.

Við tilheyrum ekki þessum hörmungarheimi,

svo hann má fara til skrattans fyrir okkur.

 

Við vorum einangruð landfræðilega og í hugsun og stríðið snerti okkur ekki nema hvað við fundum að pyngjan þyngdist og það var það eina sem skipti okkur máli einsog fyrri daginn. Ömmur okkar blómstruðu sem aldrei fyrr á þessum skemmtilegu stríðs - og uppgangstímum og höfðu svo mikið að gera á bakinu og maganum að þær höfðu varla tíma til að fara í buxurnar svo árum skipti og peningarnir streymdu inn í réttu hlutfalli við dátasæðið. Stríðið var semsé ekki bara sprauta inní íslenskt efnahagslíf heldur einnig íslenskt móðurlíf. Kannski eitt og hið sama á þessum tíma.

 

 

Og hverjum var þetta stríð nú að þakka sem reif Ísland upp á rassgatinu og kom því inní nútímann? Jú, engum öðrum en afmælisbarni dagsins, Adolfi kallinum Hitler. Hvað sem segja má um önnur verk karlsins þá verður ekki undan þeirri staðreynd vikist að hann er hin eina sanna frelsishetja Íslendinga, hvort sem það var nú meining hans eða ekki. Hefði Dolli ekki komið til sögunnar þá værum við Íslendingar ennþá hímandi í moldarkofum og samantjösluðum bárujárnsdrulluhjöllum plokkandi lýsnar úr krullunum hvort á öðru og étandi rolluandlit og hrútspunga einsog frumstæðir villimenn.

 

Hvort sem okkur finnst það súrt í broti eða ekki þá hefur enginn einn maður gert eins mikið fyrir Ísland og Adolf Hitler. Hann er frelsishetja og þjóðhetja Íslendinga þó Íslendingar viti ekki af því. Við Íslendingar eigum að setja hann á þann stall sem honum ber og sá stallur er að sjálfsögðu á Austurvelli þar sem Jón Sigurðsson stendur nú.

Athugasemdir

[patty og selma, 20.4.2009 kl. 14:59]

lol.

[Heimir Tómasson, 20.4.2009 kl. 16:59]

Frábær Sverrir...frábær.

[Magnús Sigurðsson, 20.4.2009 kl. 18:00]

Ertu ekki aðeins farin að ýkja það sem Dolli málari gerði fyrir Ísland?

[Ómar Ingi, 20.4.2009 kl. 20:49]

Dolli vissi sínu viti

Úr hvaða kvikmynd er þessi setning SS 

XD

[doddý, 20.4.2009 kl. 20:59]

einræði strax - það eina sem vit er í. kv d

[Haraldur Baldursson, 20.4.2009 kl. 21:17]

Nú er hart í ári....nú höfum misst okkar mikilvægustu útflutningsgrein....Hernaðarmikilvæginu. Þetta var góð söluvara allt frá því Bretarnir hrifsuðu til sín landinu og þar til Dabbi hætti og Bush áttaði sig á að Halldór Ásgrímsson og Geir Haarde voru ekki vinir hans.
Nú væri eingöngu hægt að selja þessa vöru til austurs...meira að segja að tala við rússan skilaði okkur kærum vinum að nýju...Norðmenn uppgötvuðu gamlan áhuga á að aðstoða okkur.

[Sigurjón, 21.4.2009 kl. 03:07]

Mjög athygliverð pæling Sverrir.  Hvernig skyldi þessi grein falla í kramið almennt?

[Sverrir Stormsker, 21.4.2009 kl. 09:10]

Kreppurkarlinn, Patty og Selma, Heimir: Takk fyrir það.

Magnús: Nei. Áhrif Dolla málara og píanista á Klakann verða aldrei ofmetin.

Ómar: Nei, ég veit ekki úr hvaða kvikmynd þessi setning er. Skít á "Dagbók Önnu Frank."

Doddý: Kannski er einræði betra en tvíræði og fjölræði, veit það ekki. Það sem hér á Íslandi ríkir er allavega glapræði.

Haraldur: Eitt af því góða sem stríðið hans Dolla leiddi af sér fyrir Klakann var að við fengum allt frítt frá Könum næstu áratugina á eftir. Þeir gáfu okkur Keflavíkurflugvöll, Leifsstöð, hringveginn og ég veit ekki hvað og hvað fyrir að fá að vera hér með herstöð. Ég veit ekki hvar við værum stödd ef "blessað stríðið" hans Dolla hefði ekki skollið á. Við værum í svo miklu tjóni að hrunið sem er núna væri einsog jólin í samanburði. 

Svo má náttúrulega alltaf segja "ef" og "hefði;" að ef Dolli hefði ekki komið til þá hefði bara einhver annar ófriðarseggur kveikt bálið, en ég vil nú bara halda mig við raunveruleikann. Afleiðingar gjörða hans fyrir Ísland eru ómetanlegar.

Sigurjón: Ég veit það ekki. Held að Íslendingar almennt séu ofboðslega viðkvæmir fyrir öllu sem viðkemur fjöldamorðingjanum Dolla. Þessvegna hefur enginn sagnfræðingur lagt í að setja málin svona upp.

Stríðið er merkilegasti tími Íslandssögunnar, jafnvel þó við reynum að má út öll ytri vegsummerki um það. Við fórum alveg hreint ofboðslega vel út úr stríðinu og það er staðreynd. Stríðið kippti Íslandi inn í nútímann. Og hverjum segja menn að stríðið sé að kenna? Hitler. Hverjum er þá stríðið að þakka fyrir Ísland? Sama Hitler. Einfalt mál.

Hvort sem okkur líkar betur eða verr þá er Hitler frelsishetja og þjóðhetja Íslendinga. Við eigum að hætta þessari sveitalegu hræsni og setja réttan mann á stallinn á Austurvelli, - allavega í huganum úr því við erum alltaf svona voðalega hrædd við álit umheimsins á okkur

[Sigurjón, 21.4.2009 kl. 13:14]

Satt er það...

[Ómar Ingi, 21.4.2009 kl. 20:25]

Englar Alheimsins - SS