Menn valda ekki valdinu

Það er skrítið með mannskepnuna, það er einsog hún megi ekki fá smá völd í hendur án þess að ganga alveg af göflunum. Hitler, Stalin, Mussolini og Hussein og þessir séntilmenn allirsaman voru í grunninn ekkert verri menn en gengur og gerist þó þeir hafi kannski ekki beint verið sligaðir af kristilegri samvisku, en þegar þeir komust til valda þá umhverfðust þeir gjörsamlega og fóru að munda kjötsaxið. George W. Bush var hinsvegar fæðingarhálfviti og kristnari en guð og ekki tækur í þessu sambandi, enda tilheyrir hann jurtaríkinu.

 

Gamli frasinn: "Vald spillir og alræðisvald spillir algerlega," er örugglega ekkert nema sannleikur. Þó að íslenskir forsætisráðherrar hafi ekki verið miklir og merkilegir fjöldamorðingjar þá held ég að það sé mjög áríðandi að þeir sitji ekki lengur en í 8 ár, sama hversu góðir þeir eru. Dabbi átti t.d. bara að sitja í tvö kjörtímabil og standa þá upp og segja: "Þetta er orðið alveg ágætt hjá mér. Best að hætta á toppnum. Þjóðin er orðin góðærð og feit og fín og ég er kominn með rasssæri og meinsæri og sieg-hælsæri og nú pakka ég saman öllum mínum bláu hönskum og bláu spólum og fæ mér vinnu í Bónus. Ég er farinn í klippingu, þá fyrstu í 20 ár. Bless."

 

Postulínsdúkkurnar á Bessastöðum eiga sömuleiðis ekki að sitja lengur en í 8 ár. Menn verða værukærir og missa allt jarðsamband og gleyma sér í rjómatertusmjatti, sjálfsdekri og gleiðgosahætti. Í viðtali sem ég átti við Ólaf Ragnar rétt áður en hann varð kóngur sagði hann einmitt að forsetinn ætti ekki að sitja lengur en tvö kjörtímabil og að hann myndi allsekki sitja lengur en 8 ár næði hann kjöri. Það skemmtilegasta við Ólaf er að sannleikurinn er aldrei neitt að þvælast fyrir honum þegar hann talar. Uppáhalds Stuðmannalagið hans er að sjálfsögðu "Bara ef það hentar mér."

 

Um þessar mundir er enn einn dvergurinn að gera sig breiðan og stóran, Kim Wrong Ilsig í Norður Kóreu. Það er búið að fara lengi í taugarnar á honum að honum skuli aldrei vera boðið í alheimspartýin með stóru köllunum og finnst að það sé litið niður á sig á alþjóðavettvangi. Auðvitað er litið niður á dverga. Ekki annað hægt. Þetta er stubbur. Hann var ekki einusinni hár í skóla, frekar en annarsstaðar. Hann getur ekki vaxið neinum yfir höfuð enda vex hann ekki yfir höfuð. Og hvað tekur hann þá til bragðs? Jú, fer að drullumalla kjarnorkusprengjur og reynir að gera heiminn hræddan við sig. Alveg dæmigert fyrir smáborgara.

 

 

Roll over... 

 

Ef Hitler sæi þann hrylling sem nú er á döfinni,

þann hörmungar kjarnorkuviðbjóð sem við höfum lært,

þá mynd´ann vafalaust snúa sér við í gröfinni;

sér velta á hina hliðina´og sofna vært.

 

(Úr ljóðabók minni "Með ósk um bjarta framtíð," 1997).

N-Kórea harðlega gagnrýnd

Athugasemdir

[Kjartan Pétur Sigurðsson, 25.5.2009 kl. 14:42]

Flott hugmynd að miða við 8 ár. Í framhaldinu væri svo kjörið að setja viðkomandi ráðamann í valda-, frekju- og hroka-afvötnun, þar sem byrja þyrfti að vinna aftur á botninum (t.d. á lyftara í Bónus).

Þetta gæti hjálpað til við að fækka öllum þeim skýjaborgum sem hafa sprottið upp eins og gorkúlur út um allt í íslensku samfélagi.

[Jóhannes Guðnason, 25.5.2009 kl. 19:13]

HA HA HA HE HE HE HA,þú ert frábær pistlahöfundur Sverrir minn,meiri háttar samlíking hjá þér,og mjög gaman að lesa þetta,en það sem ég er alveg að springa úr hlátri,ætla ég ekki að tjáð mig meir að sinni,HA HA HA,mjög gott. kær kveðja, konungur þjóðveganna

[Ásgeir Rúnar Helgason, 25.5.2009 kl. 20:52]

Lifi fjalldrapinn!

[Sverrir Stormsker, 25.5.2009 kl. 23:16]

Kjartan. Minnir að Jón Násker hafi einmitt talað um að hann gæti vel hugsað sér að fara að vinna á lyftara í Bónus. Einmitt. Það væri þá líklega til að geta lyft sér á aðeins hærri stall í samfélaginu.

Það eru bara spilaborgir og skýjaborgir á Íslandi. Engar skjaldborgir. Reykjavík telst ekki til stórborga heldur Þú-skalt-borga.

[Sverrir Stormsker, 25.5.2009 kl. 23:21]

Takk fyrir það Jóhannes konungur þjóveganna. Sýnum tillitssemi í umferðinni og keyrum varlega yfir gamla fólkið.

Ásgeir. Tek undir með þér: "Lifi fjalladrápin!" 

[Jón Steinar Ragnarsson, 26.5.2009 kl. 02:21]

Við eigum nú eftir að bíta úr nálinni með það hér hvað Hjólkoppurinn Steinki og Silfurtófan Hanna eiga í pokahorninu fyrir okkur. Það þarf nú ekki að líta til alheimsselebritía í skítshætti til að gera sér mynd af því. Afneitunin og skrumið siglir ofar skýjum nú og við inn í lénskipulag maðkaðs evrumjöls af því að nú hafa menn fundið út að allt sé á bömmer af því að við vorum ekki búinn að stinga´hausnum inn í hringstjörnuna lénsherranum í austri.  Þessi afneitun er alveg eins og hjá alkanum, sem hefur endaskipti á rökum tilverunnar og segist drekka af því að hann á svo bágt í stað þess að viðurkenna að hann eigi svo bátt vegna þess að hann drekkur.

Þetta fer illa á hvorn veginn sem  það fer, eins og bóndinn sagði.

[Jón Steinar Ragnarsson, 26.5.2009 kl. 02:43]

Stie uppsöluflug í ókyrrð undir stjórn flugstjóranna Schteingrimm Schwanskopfh og Jón Baldna með pjöllu, munum við lenda með hjólin upp á flugvellinum í Bömmer áður en sumrið er úti.  Góða ferð.

[Jón Steinar Ragnarsson, 26.5.2009 kl. 02:44]

"Eftir" átti að standa þarna fyrst....

[Sverrir Stormsker, 26.5.2009 kl. 04:43]

Jón Steinar. Það er ekki hægt að segja að það sé beint um auðugan garð að gresja þegar kemur að því finna hæfa stjórnmálamenn á Íslandi. Skil þessvegna ekki hvað fólk var svona ofboðslega áfjáð í að fá yfir sig þessa sófakommastjórn sem heldur rauðþrútinni verndarkrumlu sinni yfir bankasoranum, innherjabröskurunum og kúluhyskinu (enda þar innanborðs pólitíkusar) en lætur sig engu skipta þó að 30.000 manns lendi á götunni fyrir áramót.

Ekki það að aðrar stjórnir hefðu ekki unnið með sama hætti, en menn héldu virkilega að einhver rauðgrautur með Grámosann og íþróttafréttamanninn í broddi fylkingar myndi seðja þjóðina og leysa allan vanda.

Íslenskir stjórnmálamenn, og þá sérstaklega þeir sem nú stjórna tímabundið, vilja vinna sín (myrkra)verk í mikilli leynd einsog sönnum þjófum sæmir á sama tíma og þeir tala um "gegnsæi." Það eina sem er glært eru þeir sjálfir.

Þessvegna bið ég til ímyndaðs guðs (gauðs) að sá dagur komi sem fyrst að Alþingi verði lagt niður með allri sinni tilgangslausu ómælisheimsku, og illa þefjandi Djöflaeyjan verði sett undir erlent ríki sem nennir að stjórna þessu pínulitla bananalýðveldi með annarri hendi meðan það heldur fyrir nefið með hinni.

Íslenskir stjórnmálamenn eru fyrir löngu búnir að sanna að þeir eru ekki hæfir til verksins.

[Baldur Hermannsson, 26.5.2009 kl. 16:59]

Átta ár per kjaft, það hljómar vel. Örugglega ekki tilviljun að kanar hafa staðnæmst við tvö kjörtímabil hjá forsetanum

[Magnús Sigurðsson, 26.5.2009 kl. 21:58]

Átta er hin rétta tala, eða hvernig var það, voru jólasveinarnir ekki einn og átta?

[Sverrir Stormsker, 27.5.2009 kl. 03:32]

Baldur, Já, 8 per kjamma. "Hætta skal leik þá hæst stendur," einsog þar stendur. Í sexinu er það: "Hætta skal sleik þá hæst hann stendur."

[Sverrir Stormsker, 27.5.2009 kl. 03:38]

Magnús. Er ekki mjög vel að mér í jólasveinafræðunum þó ég hafi engu að síður áhuga á íslenskri pólitík. Minnir að þeir hafi einhverntíma verið 13. Svo urðu þeir 1 og 8. Sem gerir 9. Í dag held ég að þeir séu 63.

[Helga Guðrún Eiríksdóttir, 28.5.2009 kl. 10:41]

Þarf maður að fara að baska niðri á Austurvelli til að ná þér heim, strákur??? Hér er sólstrandaveður upp á hvern dag, heitur pottur og kaldur bjór - en enginn Hattbarður Jarðálfur Hurricane til að slátra honum með. Farðu nú að drífa þig, þetta gengur ekki lengur. Stútfylli af djúsí slúðri sem ég nenni ekki að skrifa. Sumt meira að segja bráðfyndið. Eins og þegar Ástþór keypti Sirrý spá af Útvarpi Sögu...

Miss jú, darlíngur!  

[Sverrir Stormsker, 28.5.2009 kl. 11:12]

Helga. Hvað segirðu, er komið sólstrandaveður á Klakanum án snjókomu? 10 stiga hiti kannski? Ég fer til helvítis bráðlega, þ.e.a.s. uppá Klaka úr því að það er farið að sjást til sólar. Nauðsynlegt fyrir okkur þunglyndissjúklingana að vera i sólarglætu. Eða einsog skáldið sagði:

þó þig vanti von í hjarta,

vilja, líf og endorfín

þá er engin þörf að kvarta

þegar blessuð sólin skín.

Sirrý spá vinkona vor er akkúrat manneskjan sem bar að kaupa út af Útvarpi Sögu. Hvað ætlar Ástþór að gera við hana? Selja Geira á Goldinger hana á niðursettu verði? Hélt að Ástþór væri bisnessmaður!

35 stiga heitar kveðjur

[Helga Guðrún Eiríksdóttir, 28.5.2009 kl. 18:32]

Hann fór svo bara úr landi án þess að borga henni né nokkrum.. what else is new. Greed sucks. Og nú fatta sumir að atvinnuleysi gerir það líka. Það er gaman á Íslandi. Aldrei döll móment. :)