Maður getur grætt milljarða á "mistökum"

Ég skrifaði til gamans niður hluta af Kastljósviðtali sem Sigmar Guðmunds átti við Bjarna Ármanns fyrir stuttu. Allt annað að sjá þetta svona á prenti. Verður hálf hlálegt. Auðveldara að sjá í gegnum froðuna. Ég hef þetta algerlega orðrétt en innskot innan sviga eru hinsvegar mín.

 

Bjarni: „Það varð mikill vöxtur á löngu tímabili hér á landi og eitt af því sem ég lagði upp með var að launakjör héldust í hönd við þann árangur sem að fyrirtækin og menn voru að ná - og ég held að það sem fór úr böndunum sé tvennt: Annarsvegar það að fjárhæðirnar sem slíkar urðu of háar, (þær urðu ekki of háar fyrir slysni, þær voru hækkaðar af bankastjórunum) og hinsvegar að líklega var maður að ofmeta mikilvægi einstaklingsins í að ná þeim árangri sem náðist (sem var að setja bankann á hausinn) og þá er ég ekki að undanskilja sjálfan mig í því." (Semsé: „Mistök").

Bjarni: „Við gengum úr þeim viðmiðunum sem samfélagið hafði um launakjör. Tölurrnar urðu einfaldlega miklu stærri en nokkurn óraði fyrir." (Endurtek: Þær urðu ekki of háar. Þær voru hækkaðar af bankastjórunum. En semsé: „Mistök")

Bjarni: „Jú þetta kallast græðgi á góðri íslensku." (og væntanlega „mistök").

Bjarni: „Græðgi er einn af þeim kröftum sem drífur svona kerfi áfram, og hún er ekki alslæm í sjálfu sér, en auðvitað má hún ekki vera of mikils ráðandi, en sem er klárlega það sem gerðist."  (Semsé: „Mistök")

Sigmar vitnar í nýlega „sorry"blaðagrein Bjarna: „Þú ert að lýsa alveg hreint órúlegum sofandahætti, Svo ég noti nú bara þín eigin orð Bjarni: Þið voruð of sókndjarfir, þið bjugguð til launakerfi sem fór úr böndunum, þið ástunduð einhverskonar hjarðhegðun, ykkur skorti skilning til að lesa samfélagið, þið sköpuðuð of veikan grunn til að standast sviptingarnar, þið létuð glepjast af hraða og skammtímaárangri og misstuð sjónar á langtímahagsmunum og gildum samfélagsins. Í ljósi þessa er þá ekki galið að þið séuð að fá fleiri hundruð milljónir fyrir það að vera í raun svona vankaðir?"

Bjarni: „Það er alveg ein leið til að líta á þetta og alls ekki röng túlkun á því sem ég er að segja... það er alveg klárt að við fórum fram úr okkur sjálfum. Það má líka lýsa þessu sem sofandahætti."  (Nei, frekar sem „mistökum." Það kemur betur út).

Sigmar: „Er ekki ósanngjarnt að þið sem gátuð farið út úr kerfinu á réttum tíma að þið skuluð sitja með svona mikla peninga á milli handanna á meðan almenningur er að verða fyrir allri þessarri lífskjararýrnun á sama tíma? Þú ert búinn að vera með á árabilinu 2004 - 2007 heilar 900 milljónir í laun og þú ert líka að selja hlutabréf fyrir marga milljarða. Þú ert sjálfsagt búinn að ganga út úr bankanum með fleiri fleiri milljarða."

Bjarni: „Ég held að það sé alveg rétt lýsing að segja að það sé ósanngjarnt. Og það er kannski það sem ég er að gera í þessarri grein, er að horfa gagnrýnið á sjálfan mig í því ljósi sem hefur gerst þ.e.a.s. að kerfið hefur hrunið og það er verið að leggja hér álögur á fólk sem hefur ekkert til þess unnið."  (Smá tæknileg „mistök")

Sigmar: „Og hvernig ætla menn að bregðast við því? Það er ekki nóg að segja bara í einhverri Fréttablaðsgrein „Mér þykir þetta leitt"?

Bjarni: „Nei nei. Það er alveg hárrétt. Og auðvitað er ég, alveg frá því að þessir atburðir gerðust í haust, búinn að hugsa „hvað gerði maður rangt og hvar hugsaði maður hlutina vitlaust og hvað getur maður gert til að bæta fyrir það og hvernig getur maður komið á svona nýju gildismati ef svo má segja, þó ekki sé nema hjá sjálfum sér. Og mín niðurstaða var sú...að greiða Glitni til baka þær greiðslur sem ég hafði fengið eftir að ég lauk mínum starfskyldum hjá Glitni, 370 milljónir." (Jibbííí! Málið dautt).

Sigmar: „Og finnst þér þar með nóg að gert í ljósi þess að þú ert búinn að hafa miklu meiri tekjur af fyrirtækinu í formi sölu hlutabréfa?"

Bjarni: „Ja sko einhversstaðar...einhversstaðar verður maður að horfa á hlutina í samhengi og hvað maður hefur gert...uuuu...ég horfi á mál sem mér finnst vera mistök hjá mér, en ég er auðvitað ekki að segja að ef að ég hefði ekki gert þessi mistök þá hefði kerfið ekki hrunið. Það eru auðvitað fjölmargir þættir sem þar koma inní, bæði annarsstaðar frá sem og frá öðrum aðilum. (Já, það eru svona um 30 aðrar útrásarhetjur sem lögðu hönd á plóginn við að koma landinu til helvítis). En ef ég horfi á þessar tölur í samhengi við það sem þú nefnir og dregur upp að þá sýnist mér svona gróft að ef ég tek þau laun og þá bónusa og alla þá kauprétti sem ég hef fengið á því 10 ára tímabili sem ég starfaði hjá bankanum og fyrirrennurum hans og dreg frá þá skatta og skyldur sem ég hef greitt til samfélagsins á þeim tíma þá jafngildir þessi greiðsla (370 millur) um helmingi af þeim greiðslum sem ég hef fengið í minn hlut." (Skiptimynt miðað við það sem hann hefur sogið út úr bankanum).

Sigmar: „Helmingi af öllum þeim greiðslum sem þú hefur fengið sem stjórnandi bankans?"

Bjarni: „Já."

Bjarni: „Ég er reiður út í sjálfan mig fyrir að hafa trúað of mikið á það góða, (græðgina) þ.e.a.s. að markaðurinn gæti haft eftirlit með sjálfum sér og að markaðsaðilar sæju langtímahagsmunina í því en það var ekki raunin. Ég sá það ekki einusinni sjálfur."  (Með kíkinn fyrir blinda auganu. Semsé: „Mistök").

Bjarni: „Við ofmátum virkni markaða." (Það voru nú bara smá „mistök").       

Sigmar: „Eins og þú ert búinn að lýsa þessu: Þú ert áhættusækinn, þú ert sókndjarfur, þú ferð glannalega og þú lest stöðuna ekki rétt og svo koma einhverjir inn (Jón Ásgeir og Hannes Smára) sem eru hvað - VERRI en þú?! Ég er að reyna að draga upp þessa mynd af því að þú ert búinn að lýsa þínum ákvörðunum sem kolröngum sko, og svo koma einhverjir aðrir sem eru ennþá verri?"

Bjarni:  „Já það má alveg draga upp þá mynd, því að síðan fór kerfið í enn meiri vöxt og gjaldmiðillinn okkar lenti í miklum hremmingum og við soguðumst inní spíral sem við náðum ekki að vinda ofan af sem þjóð." (Kerfið fór ekki af sjálfu sér í enn meiri vöxt. Vaxtaræktarhetjur útrásarinnar stútfylltu það af sterum).

Sigmar:  „En þessir menn sem fóru ekki svona varlega Bjarni, þú fórst seinna í samstarf með þeim stuttu síðar í REI-málinu, þeim Jóni Ásgeiri Jóhannessyni og Hannesi Smárasyni."

Bjarni:  „Það er rétt." (Alveg óviljandi „mistök").

Sigmar:  „Þú virðist þá ekki hafa lært mikið af því að hafa verið varkárari aðilinn þarna nokkrum mánuðum fyrr?"

Bjarni:  „Nei það má svo sem alveg segja það. Og ég get svo sem ekkert litið á þetta REI-mál annað en sem stórkostleg Mistök, hvort sem er af minni hálfu eða annarra, - af minni hálfu í fyrsta lagi bara að þiggja það að koma inn í þetta mál. Í öðru lagi að vera þátttakandi í því og keyra þetta mál áfram á þeim hraða sem gert var." (Og afhverju var það keyrt áfram á svona miklum hraða? Vegna þess að þeir ætluðu að sölsa undir sig auðlindir þjóðarinnar).

Sigmar:  „Gerðir þú ekki meira heldur en að koma þarna inn? Varst þú ekki ákveðið hreyfiafl og drifkraftur í að keyra þetta allt í gegn?"

Bjarni:  „Jú. Ég taldi þetta vera rétta leið. Og það var líka röng ákvörðun að fara í samruna við Geysi Green Energy og draga þar semsagt draga semsagt FL að borðinu sem hluthafa.

Og þá er semsagt ekkert annað við því að gerast eða bregðast en að heldur en að horfa á þá stöðu og gera það sem hérna gerðist þar að segja sig frá málinu og hverfa á braut." (Voðalegt tafs er þetta þegar kemur að Geysi Green og FL Group).

Sigmar:  „En þú varst náttúrulega lengi að móast, þú vildir halda þessu til streitu, lengi, svo mánuðum skipti?"

Bjarni:  „Nei. Ég taldi semsagt rétt að gera þetta, en þegar að það var ekki vilji til þess af hálfu Orkveitunnar lengur að þá að sjálfsögðu bauðst ég til að draga mig í hlé..og var beðinn um að vera eitthvað áfram en fór bara frá málinu."

 

Þann 6. okt. 2007 var Fréttablaðs-viðtal við vinina Bjarna og Hannes Smárason. Bjarni var þá  stjórnarformaður REI og Hannes Smárason var forstjóri FL Group og stjórnarformaður Geysis Green Energy. Þeir vinir sögðu þar að sameining fyrirtækjanna hefði verið afar skynsamleg og „rosalega spennandi."

Auðvitað er „rosalega spennandi" að hirða íslensk orkufyrirtæki. Í kjölfarið ætluðu þeir sér að fara í kröftuga útrás og ná undir sig raforkufyrirtækjum og orkulindum annarra þjóða: „Við erum þegar með í pípunum fjárfestingar í fjórum heimsálfum og verulega metnaðarfull markmið til komandi ára..."

Viðhorf þeirra til Íslands lýsir sér vel í þessum orðum: „Þetta snýst um að fjárfesta í virkjunum víðsvegar um heim og kemur Íslandi ekki við, nema að því leyti sem snýr að þekkingunni og baklandinu hvað það snertir."

Þeir voru búnir að plata gamla góða Villa borgarstjóra alveg uppúr skónum, en sexmenningarnir í borgarstjórn Sjálfstæðisflokksins stoppuðu þetta glæfraspil (landráð?) af á síðustu stundu og fengu miklar skammir í hattinn, sérstaklega frá Össuri Skarphéðinssyni, iðnaðarráðherra. Össuri fannst nefnilega alveg frábært að draga furðufyrirbærið FL Group inní REI og kallaði það „viðskiptalega snilld." Það þarf ekki að taka það fram að hann situr ennþá, að sjálfsögðu.

Bjarni Ármanns trompaðist þegar sexmenningunum tókst að stöðva glæpinn. Þann 1. nóv. 2007 sagði hann í viðtali við visir.is að hann teldi ákvörðun Borgarráðs ranga: "Ég er ekki í pólitík en mér virðist sem það sé verið að kasta verulegum fjármunum á glæ með þessari ákvörðun." Það er rétt að HANN varð af „verulegum fjármunum" en hann var ekkert að hugsa um það hvort að þjóðin væri með þessu að „kasta verulegum fjármunum á glæ." Í veftímaritinu Deiglunni sakaði hann sexmenningana um að hafa skaðað ímynd íslenskra orkufyrirtækja á alþjóðavettvangi. Í dag kallar hann hinsvegar þetta REI-mál allt „stórkostleg mistök."

Stórrán sem mistekst er auðvitað „stórkostleg mistök." Hefði ránið hinsvegar tekist væri það „rosalega spennandi" og „viðskiptaleg snilld."

 

Aftur að Kastljósi:

Sigmar:  „En nú ert þú búinn að fara yfir þessa sögu svolítið svona gróflega og það eru mistök og mistök og mistök og mistök á mistök ofan Bjarni, sko...ég meina, hversu góður viðskiptamaður ertu þegar þú ert búinn að rekja þetta allt?"

Bjarni:  „Það auðvitað svo sem bara sést þegar horft er yfir einhverja heildarmynd sko." (Hryllingsmynd).

Sigmar:  „Er þetta ekki falleinkunn?"

Bjarni:  „Ég vil ekki meina að þau 10 ár sem ég er að stjórna FBA og síðan Íslandsbanka FBA og svo Glitni hafi verið tóm katastrófa eða bara röð mistaka. Ég vil meina að þarna hafi verið byggt upp sterkt og gott fyrirtæki."

Sigmar:  „Sem að hrundi."

Bjarni:  „Já, sem að hrundi." (Mjög STERK og GÓÐ fyrirtæki hrynja alltaf einsog spilaborgir sé blakað við þeim).

Sigmar:  „Við endum alltaf þar."

Bjarni:  „Inní þessum hérna, inní þessari uppbyggingu voru punktar veikleika sem urðu okkur að falli. Það er alveg klárt. Og þessvegna er ég að koma fram og skýra frá þessu og þetta er í mínum huga einlægt uppgjör og og og þetta er ekki..."(Segðu það bara, þetta voru bara alltsaman smá „mistök").

Sigmar: „Þú ert að gefa sjálfum þér falleinkunn samt? Ég ætla bara að fá þig til að meta sjálfan þig. Er þetta ekki falleinkunn?"

Bjarni:  „Ja, fyrirtækið er komið í greiðslustöðvun þannig að það getur í sjálfu sér ekki verið neitt annað, þannig að sá ferill sem ég hef hvað þetta varðar er að hafa byggt upp fyrirtækið sem síðan, sem síðan féll og það er auðvitað það sem ég lifi með."

 

Þjóðin lifir með þessu líka, en munurinn er kannski sá að heimilin hafa ekki milljarða í vasanum, nema í formi skulda.

Er´ekki allir í stuði?

Ekki er ofsögum sagt að skrítið sé Skerið,

hún skín hér ei viskusólin.

Þjóðin er sjálfri sér verst og hefur æ verið,

hún vill-ekk´að snúist hjólin.

Þjóðin vill allt bara ef það er nógu galið;

yfir sig kýs hún fólin.

Á hvaða stóli við sitjum við-getum valið

og veljum rafmagnsstólinn.

 

(Úr ljóðabók minni "Með ósk um bjarta framtíð," 1997).

 

 

- - - - - - - - - - - - - - - - - - - - - - - - - - - - - - - - - - - - - -

 

Gestur minn í dag í þættinum "Miðjan" á Útvarpi Sögu FM 99,4 kl. 16:00 - 18:00 verður Kolfinna Baldvinsdóttir sjónvarpskona, blaðamaður, sagnfræðingur, alþjóðalögfræðingur, mótmælandi og kynbomba - eða kynB-O-B-A einsog Bubbi myndi orða það.

 

Nú einnig kemur til mín enginn annar en Eiríkur Stefánsson verkalýðshetja, útvarpspistlaþrumari, sægreifabani og kyntröll - eða kynB-Ö-L-L einsog Bubbi myndi orða það. Hann hefur lesið mörgum manninum pistilinn á Útvarpi Sögu og notar þá yfirleitt svo væmið orðbragð að meiraðsegja gömlum blævængjafrúm vemmir við.

 

Nú og svo er aldrei að vita nema að jólasveinninn reki inn augun með nokkrar huggulegar kærur í pokahorninu.

 

 

Alla fyrri þætti má finna á:  www.stormsker.net

 

Raddir Harðar og hjarðarinnar

Hörður Torfa gengur hnarreistur að ræðupallinum á Austurvelli í passlega alþýðlegum verkamannafrakka sem hann krumpaði vel og vandlega heima hjá sér áður en hann lagði af stað. Hann er nýkominn úr viðtali við DV þar sem hann sagði orðrétt: „Það kemur ekki að þessum palli fólk sem hefur unnið fyrir stjórnmálasamtök."  Þessi orð hans klingja ekki í höfðinu á honum þegar hann fer að handvelja úr hópnum fólk sem má tala:

„Nei blessaður Einar Már, ert þú ekki örugglega ennþá í Vinstri grænum? Gott. Þá máttu tala. Nú og þið eruð hérna líka mætt, allt kommagerið: Pétur Tyrfings og Kristín Tóma, systir Sóleyjar og Katrín Odds og Viðar Þorsteins. Flokksbundin og flott. Í rétta flokknum. Glæsilegt. Þið megið tala. Ég vil nefnilega að mikill meirihluti frummælenda sem ég leyfi að tala hérna á pallinum séu í Vinstri grænum eða tengist þeim með einum eða öðrum hætti svo að mótmælin beinist í rétta átt. Við verðum að hagnýta okkur harmleik fólksins og nota þessi mótmæli til að koma Vinstri grænum til valda."

Það er bankað í bakið á Herði og hann snýr sér við og segir undrandi:

-  „Blessaður. Er þetta ekki bara sjálfur Steingrímur J.?"

-  „Nei, ég heiti Georg Bjarnfreðarson. Það er þarna einhver smá miiisskilningur á ferðinni. Okkur er oft ruglað saman. Ég myndi nú gjarnan vilja fá að tala á þessum fundi. Ég er með 5 háskólagráður: Í félagsfræði, sálfræði, kommúnis......"

-  „Og ertu örugglega í Vinstri grænum?"

-  „Já, það er ég. Ég er einsog melóna; grænn að utan en rauður að innan. Ég er meiraðsegja með merki kommúnista hérna í barminum, sigð og kamar."

-  „Nú þá er þetta ekkert mál. Þá færðu að tala. Þið hér sem ég er búinn að velja úr megið öll tala á eftir og á meðan þið talið þá ætla ég að standa beint fyrir aftan ykkur á sviðinu þannig að ég verði örugglega í mynd. Ævisaga mína var nefnilega að koma út, þið skiljið. En fyrst tala ég náttúrulega. Þetta eru nú einusinni mín mótmæli þó þau séu í þágu allra kommúnista."

Leiklistarmenntunin kemur sér vel þegar hann gengur ábúðarmikill uppá pallinn og stillir sér upp fyrir framan míkrafóninn með allan heiminn á herðunum. Hann setur í brýrnar og horfir um stund þjáningarfullu heimsósómaaugnaráði yfir soltinn múginn sem þyrstir í lausnir og æðri visku. Loks hefur hann upp raust sína:   

 

Hörður:  „Viljum við ríkisstjórnina BURRRT?!"

Hjörðin:  „JÁÁÁÁÁÁ!"

-  „Viljum við spillinguna BURRRT?!"  

-  „JÁÁÁÁÁ!"

-  „Viljum við kapítalismann BURRRT?!"

-  „JÁÁÁÁÁ!"

-  „Viljum við frjálshyggjuna BURRRT?!"

-  „JÁÁÁÁÁ!"

-  „Viljum við einkavæðinguna BURRRT?!"

-  „JÁÁÁÁÁ!"

-  „Viljum við frjálsa samkeppni BURRRT?!"

-  „JÁÁÁÁÁ!"

-  „Viljum við einstaklingsframtakið BURRRT?!"

-  „JÁÁÁÁÁ!"

-  „Viljum við frelsi einstaklingsins BURRRT?!"

-  „JÁÁÁÁÁ!"

-  „Viljum við mannlegt eðli BURRRT?!"

-  „JÁÁÁÁÁ!"

-  „Viljum við gamla spillta Ísland BURRRT?!"

-  „JÁÁÁÁÁ!"

-  „Viljum við gömlu ónýtu flokkana BURRRT?!"

-  „JÁÁÁÁÁ!"

-  „Viljum við nýtt og ómengað Ísland?!"

-  „JÁÁÁÁÁ!"

-  „Viljum við Vinstri græna?!"

-  „JÁÁÁÁÁ!"

-  „Viljum við kommúnisma?!"

-  „JÁÁÁÁÁ!"

-  „Viljum við að Ísland verði Kúba norðursins?!"

-  „JÁÁÁÁÁ!"

-  „Viljum við forsjárhyggju og afturhald?!"

-  „JÁÁÁÁÁ!"

-  "Viljum við alla skynsemi BURRRT?!"

-  "JÁÁÁÁÁ!" 

-  "Viljum við fara að ferðast um í uxakerrum?!"

-  "JÁÁÁÁÁ!"

-  „Viljum við eftirlaunaforréttindi ráðamanna BURRRT?!"

-  „JÁÁÁÁÁ!"

-  „Viljum við Steingrím J. Sigfússon sem studdi eftirlaunafrumvarpið?!"

-  „JÁÁÁÁÁ!"

-  „Viljum við gjafakvótakerfið BURRRT?!"

-  "JÁÁÁÁÁ!"

-  „Viljum við Steingrím J. Sigfússon sem styður gjafakvótakerfið?!"

-  „JÁÁÁÁÁ!"

-  „Viljum við sérréttindi kvenna og kynjakvóta BURRRT?!"

-  „JÁÁÁÁÁ!"

-  „Viljum við ofurfemínistann Steingrím J. Sigfússon sem styður sérréttindi kvenna og kynjakvóta?!"

-  „JÁÁÁÁÁ!"

-  „Viljum við frelsi til að drekka bjór eins og aðrar þjóðir?!"

-  „JÁÁÁÁÁ!"

-  „Viljum við Steingrím J. Sigfússon sem studdi bjórbannið og vildi bjórinn BURRRT?!"

-  „JÁÁÁÁÁ!"

-  „Skál fyrir því! Viljum við Stóra Bróður BURRRT?!"

-  „JÁÁÁÁÁ!"

-  „Viljum við Steingrím J. Sigfússon sem heimtar netlögreglu!?"

-  „JÁÁÁÁÁ!"

-  "Viljum við allt klám BURRRT?!"

 -  "JÁÁÁÁÁ!"

-  "Viljum við eina lögreglu í hvert svefnherbergi?!"

-  "JÁÁÁÁÁ!"

-  „Viljum við boð og bönn og höft á öllum sviðum mannlegs lífs?!"

-  „JÁÁÁÁÁ!"

-  "Viljum við þindarlaus ríkisafskipti og óbærileg leiðindi? 

-  "JÁÁÁÁÁ!"

-  „Viljum við VINSTRI GRÆNA?!"

-  „JÁÁÁÁÁ!"

-  „Viljum við flokk sem hefur akkúrat ENGAR lausnir á vandanum?!"

-  „JÁÁÁÁÁ!"

-  „Viljum við sama skítinn, bara úr öðru rassgati?!"

-  „JÁÁÁÁÁ!"

-  „Viljum við Vinstri græna með þá Steingrím J. Sigfússon, Kolbrúnu Halldórsdóttur, Martein Mosdal og Georg Bjarnfreðarson í broddi fylkingar til að stjórna þessu landi?!"

-  "JÁÁÁÁÁ!"

-  „Vinstri grænir eru núna með 30% fylgi. Viljum við kosningar STRAX?!"

-  „JÁÁÁÁÁ!"

-  „Ég spyr aftur: Viljum við kosningar STRAX?!"

-  „JÁÁÁÁÁ!"

-  „Viljum við fara BURRRT úr öskunni og BEINT í eldinn og það STRAX?!"

-  „JÁÁÁÁÁ!"

-  „Örvitar allra landa sameinist: HÚRRA! HÚRRA! HÚRRA! HÚRRAAAAA!!!!!!!!!"

Hörður: Mótmælin rétt að byrja

Jón Gerald, Jónína Ben, Eva Hauks og Sturla Jóns komin á netið

Eitt eintak af hverju fyrir sig er nauðsynlegt í hverju landi. Þetta eru umdeildar persónur, sem er mjög gott. Besta leiðin til að komast hjá gagnrýni er að segja ekki neitt, gera ekki neitt og vera ekki neitt.

Ég var víst búinn að lofa fólki því að láta vita þegar viðtölin sem ég tók við þessa fínu uppreisnarmenn á Útvarpi Sögu væru komin á netið og nú efni ég það.

Þættina má finna HÉR

 

Júróvisjón brestur á

Ég er búinn að hlusta á þessi 4 Júrólög sem verða í Sjónvarpinu núna eftir nokkrar mínútur. Ellý Ármanns hjá www.visir.is bað mig að segja álit mitt á snilldinni og ég varð að sjálfsögðu við þeirri bón enda ekki annað hægt þegar svona flott og skemmtileg skutla á í hlut. Svona lítur þetta út:

 

1. The kiss we never kissed  - 
Lag: Heimir Sindrason. Texti: Ari Harðarson. Flytjandi: Edgar Smári.

"Heimir Sindrason er góður lagasmiður. Hver kannast t.d. ekki við Hótel Jörð sem hann samdi við ljóð Tómasar. Þetta nýja lag lans The kiss we never kissed er vel samin ballaða. Fastmótuð melódía. Engin rembingur og tilgerð. Bara einfalt og fallegt, sem er alveg meir en nóg til að halda uppi einu lagi. Útsetningin er af gamla skólanum, látlaus og laus við alla stæla og eitthvað sem á að virka gasalega nútímalegt og "töff." Gríðarlegir "töffarar" sem eru of cool fyrir "væmni" ættu ekki að hlusta á þetta lag.
Ég veit akkúrat engin deili á söngvaranum, Edgari Smára, en hann kemst verulega vel frá þessu. Þarna er greinilega á ferðinni mjög góður söngvari með orginal rödd og sérstaka raddbeitingu og karakter í röddinni sem mér finnst mjög áríðandi. Ekkert varið í að hlusta á góða söngvara ef karakterinn vantar. Edgar virkar soldið einsog 14 ára strákpatti í þessu lagi og það gefur þessu ákveðinn sjarma. Kannski á þetta lag frekar heima í teiknimyndasöngleik einsog t.d. Lion King en í Júróinu. Veit það ekki. En við eigum ekki að hugsa um það, heldur að velja einfaldlega gott lag og það er einmitt það sem þetta lag er. 

 

2. Dagur nýr  - 
Lag: Halldór Guðjónsson. Texti: Íris Kristinsdóttir. Flytjandi: Heiða Ólafs.

Melódían í A-kaflanum er reikul og flöktandi og það er stólað á að hinn klassíski spánski fjórhljómagangur haldi henni á flöti, en hún sekkur, því miður. Er ekki nógu afgerandi. Viðlagið er dæmigert Sálarpopp (t.d. Eltu mig uppi) sem maður hefur heyrt all oft áður, svona einsog 100 þúsund sinnum en samt ekkert óheyrilega leiðinlegt, bara svona frekar sjálfsmorðshvetjandi. Halldór húsasmiður hefur samið mun betri lög en þetta.
Þetta er alltsaman voðalega vel spilað en það er bara ekki nóg því Halldór hefur gleymt að byggja grunninn, kjallarann og 1. hæðina. Það er ris í laginu en það er allt og sumt. Það er ekki hægt að búa í undirstöðulausu risi. Þetta lag hefði átt að heita "Dagur rýr."
Heiða er ein af okkur allra bestu söngkonun. Getur látið billegustu lög virka flott, getur blásið lífi í dauðvona sjúkling en þarna hefði hún bara átt að kippa öndunarvélinni úr sambandi.

 


3. Is it true  - 
Lag og texti: Óskar Páll Sveinsson. Flytjandi: Jóhanna Guðrún Jónsdóttir.

Óskar Páll Sveinsson er fagmaður, allavega sem upptökumaður. Hef ekki heyrt mörg lög eftir hann. Þetta lag virkar frekar cheap við fyrstu hlustun en vinnur svo á, sem þýðir að þetta er ekki slæmt lag en kannski aðeins of venjulegt og lítt afgerandi. Það er hvorki til hægri né vinstri. Þetta er svona framsóknarmiðjumoð. Gæti eflaust slegið í gegn með Jessicu Simpson eða einhverri svoleiðis meikdollu en er ekki nógu sterkt til að standa undir sjálfu sér. Jóhanna "litla" Guðrún gerir þessu góð skil en heildarpakkinn er soldið einsog hænsni: lyftist frá jörðu en nær aldrei flugi.

 

 

4. Hugur minn fylgir þér  - 
Lag og texti: Valgeir Skagfjörð. Flytjandi: Ólöf Jara Skagfjörð.

Ég ætla að vona að höfundurinn Valgeir Skagfjörð taki þessu ekki persónulega en þetta "lag" er einfaldlega hryllilega lélegt og asnalegt í alla staði. Það er ekki með nokkru móti hægt að skilja hvernig þetta komst inn nema ef söngkonan góða og eiginkona Valgeirs, Guðrún Gunnars, skyldi hafa verið í dómnefndinni. Melódían er kubbsleg og reglustikuð, einsog hún hafi verið sett saman í einhverju tónlistarforriti fyrir þroskahefta. Taktskiptingarnar eru svo klúðurslegar, skrikkjóttar og viðvaningslegar að það er ekki nema fyrir verulega hélaðan spassa að hreyfa sig eftir þessu.
Það er í raun ekki fyrir hvítan mann að skilja þetta sull og ennþá síður svartan, rauðan nú eða gulan. Grænar geimverur myndu meiraðsegja hrista hausinn.
Ólöf Jara Skagfjörð er góð söngkona einsog mamman og reynir að bjarga því sem bjargað verður en það er einsog að setja sérríber á ruslahaug. Vonlaust mál. Dæmið er six feet under.

 

Frekari upplýsingar eru hér

Aðgerðir skila árangri, ekki skiltagerðir

Það er sárt að segja það en ég get lofað ykkur því kæru krepplingar og hef það frá fyrstu hendi að stjórnmálamenn taka akkúrat Ekkert mark á fundahöldum einsog þeim sem úlpurnar eru að halda niðrá Austurvelli. Þeim gæti ekki verið meira sama. Pulsujapl og geisp og dösuð ræðuhöld hrófla ekki við sálarró þeirra. Friðsamleg skiltamótmæli í þessum dúr bíta ekki á þá frekar en rök á fávita.

 

Ef fólk heldur að Gandhi og Martin Luther King og þeirra gengi hafi iðkað svona svefndrukkin mótmæli þá er það regin misskilningur. Það var borgaraleg óhlýðni sem skilaði árangri.

 

Stjórnmálamenn voru ekki sáttir við að Kryddsíldinni þeirra skyldi hafa verið sturtað niður en þeir eru hinsvegar afar sáttir við sakleysisleg ræðuhöld og hangs niðrá Austurvelli. Við eigum ekki að láta þessa slímsetustjórnmálamenn og spillingarforkólfa í bönkum og skítafyrirtækjum vera sátta. Við erum ekki sátt við þá og á meðan þeir sýna engan vilja til úrbóta skulu þeir ekki vera sáttir við okkur. Við eigum að fara verulega í taugarnar á þeim. Við eigum að flæma þá út úr grenjum sínum með óhlýðni og taumlausum leiðindum.

Eitt er víst: Aðgerðir skila árangri, ekki skiltagerðir.

 

- - - - - - - - - - - - - - - - - - - - - - - - - - - - - - - -

 

Bendi hér á gott erindi sem Eva Hauksdóttir flutti á Opnum borgarafundi í Iðnó í fyrradag.

Viðtal mitt við Evu Hauks og Sturlu Jónsson verður endurflutt á Útvarpi Sögu FM 99,4 á "besta tíma" í kvöld klukkan 20:00 til 22:00.

Fjórtándi fundurinn á Austurvelli

Framsóknarflokkurinn er ekki í djúpum skít. Hann ER djúpur skítur

Meðan fólk flýr úr Framsóknarflokknum einsog rottur sökkvandi skip þá finna sumir hvöt hjá sér til að ganga í hann - ólíklegustu menn, og sumir meiraðsegja tiltölulega normal og skynsamir. Varla af hugsjónaástæðum og enn síður af mannúðarástæðum einsog þeim að þarna þurfi nauðsynlega að uppræta spillingu. Það labbar enginn inná almenningsklósett og hugsar:

"Jahá, þetta klósett er alveg bráðnauðsynlegt að þrífa. Verulega freistandi. Þetta er eitthvað fyrir mig að fást við. Það er ekki hægt að hafa þetta klósett svona drulluskítugt og illa þefjandi einsog ríkisstjórnina. Best að stinga sér á kaf ofaní viðbjóðinn og byrja að ræsta."

 

Svona skýringar virka ekki, jafnvel þótt móðir Theresa ætti í hlut. Fólk sem gengur í þetta pestarbæli sér sér einfaldlega leik á borði; að þarna hljóti nú að vera auðveldara að ná frama en í flokkum sem gera einhverjar örlitlar kröfur því þarna er jú allra lægsti samnefnarinn. Dvergur virkar stór í Putalandi.

Þetta er soldið einsog ef fiðluleikari sem hvergi hefur fengið séns er staddur um borð í togara árið 1912 og hann sér Titanic mara í hálfu kafi og strengjasveit spila á þilfarinu. Hann hugsar:

"Ókey, þetta skip mætti vera í aðeins betra ásigkomulagi en ég ætla nú samt að ganga í hljómsveitina og slá í gegn. Þetta er mitt eina tækifæri. Ég ætla að stökkva um borð og láta ljós mitt skína. Svona tækifæri býðst sko ekki á hverjum degi."

Auðvitað mun gæinn sökkva ennþá dýpra stuttu síðar, en hann er ekki að hugsa um það í hita framapotsins heldur eingöngu það að ná "árangri" á sem skemmstum tíma. Þetta er bankastjórahugsunin sem Bjarni Ármanns lýsti ágætlega í aflátsgrein fyrir stuttu; að græða sem mest á sem skemmstum tíma án vangaveltna um afleiðingarnar í stóru samhengi. Þetta eru skósprænar sem snúa kíkinum öfugt.

Á sama tíma og Framsóknarflokkurinn gefur fögur loforð um breytta stjórnarhætti og nýjar áherslur og úthreinsun á spillingu þá taka einhverjir 70 framsóknardúddar flokkinn yfir einsog ekkert sé með Sif Friðleifs tístandi af ánægju á bak við gluggatjöld. Það þurfti ekki fleiri til. Þessi flokkur er álíka mikið ekta og bollurnar á Pamellu Anderson og spillingin er jafn samgróin flokknum og girnisígræðslan á hausnum á Elton John. 

Ef einhver hefur haldið að betri tímar væru í vændum fyrir Framsóknarflokkinn með innkomu klárs og fróms formannsefnis einsog Sigmundar Davíðs Gunnlaugssonar þá er það alger misskilningur. Framsókn er og verður Framsókn á sama hátt og krabbameinskýli er og verður krabbameinskýli þó það sé gullhúðað. Framsóknarflokkurinn er stinkandi miltisbrandslík sem á að grafa djúpt í jörðu en ekki að reyna að vekja upp. 

Meiraðsegja Jónínu Ben mun ekki takast að hreinsa skítinn úr Framsókn nú eða Framsókn úr skítnum (the same shit) þrátt fyrir góðan vilja og ennþá betri græjur.

Fjandsamleg yfirtaka

Rétt hjá Imbu Sollu: Árni Mathiesen er æði

Imba hældi Árna Mathiesen sem fjármálaráðherra í hástert í Kastljósi í gær. Skiljanlega. Maðurinn er búinn að standa sig alveg óaðfinnanlega. Flott t.d. þegar hann lét bróðir sinn fá eignirnar á varnarsvæðinu á spottprís. Spilling? Nei. Ekki frekar en í bönkunum.

 

Svo var glæsilegt hvernig hann tæklaði Icesave dæmið við Darling. Það hefði allt getað farið í klúður en hann reddaði málunum gjörsamlega.

 

Árni og Björgvin G. Sigurðsson eru líklegast þeir sem fylgjast hvað best með því sem er að gerast í þjóffélaginu. Þeir eru alltaf með svör á reiðum höndum enda vel inní öllum málum. Aldrei undir nokkrum kringumstæðum myndu þeir segja:

"Ég veit það ekki."  "Ég hef ekki heyrt um þetta."  "Mér hefur ekki verið sagt frá þessu."  "Mér þykir þú segja fréttir."  "Ég held að málið sé í skoðun."  "Var þetta í blöðunum?"  "Ertu að segja mér að það sé eitthvað til sem heitir KPMG?"  "Hvað áttu við með ábyrgð?"  "Hvað sagðirðu að íslenski seðlabankastjórinn héti?"  "Ég kannast ekki við þetta."  "Bíddu, ertu að meina að þetta mál heyri undir mig?"  "Ég man ekki eftir að hafa fæðst í gær."  "Ef ég vissi hvað ég héti þá myndi ég segja þér það."  

 

Það er ekkert skrítið að Imba Solla skuli vera ánægð með þessa kappa. Sjálf er hún gjörsamlega búin að brillera í stjórninni. Hún er virkilega fulltrúi fólksins í landinu þó að engin okkar hinna sé það.

 

 

 

 

 

 

                                                                                                                       Dr. Jekyll and Mr. Hyde

Björgólfur Thor er 29 ríkasti maður Bretlands en gasalega blankur á Íslandi

 

Djöfull ætla þessir auraapar að leika þjóðina grátt. Bjórúlfur Thor sagði í Kastljósviðtali fyrir stuttu að hann myndi svo sannarlega axla ábyrgð en myndi hinsvegar ekki koma með neina peninga í uppbyggingu landsins. Á nútímaíslensku þýðir þetta einfaldlega: "I don´t give a shit. Fuck you!"

 

Bretar settu Landsbankann á hryðjuverkalista þegar þeir komust að því að það væri verið að flytja hundruði milljarða úr Icesave í Bretlandi úr landi. Þetta var náttúrulega ekkert annað en efnahagslegt hryðjuverk. Líklega eitt stærsta bankarán heimssögunnar.

 

 Hvar eru þessir peningar? Hókus pókus - Horfnir. Og enginn spyr um þá. Þessir bankadelar eru slíkir galdrakarlar og seiðskrattar að við þurfum ekki að skammast okkar fyrir að nota orðið "nornaveiðar." Það þarf einmitt að persónugera vandann. Þeir sem segja annað eru annaðhvort fábjánar eða persónur og leikendur í spilinu. Allar þessar morðfúlgur fjár þurfa Íslendingar að borga næstu áratugina meðan ræningjarnir tróna á listum yfir ríkustu menn heims.

 

Hvað er þetta annað en alþjóðleg glæpastarfsemi? Ef ríkisstjórn Íslands væri ekki samansafn af glæpsamlega vönkuðum geðlurðum og hlandaulum þá væri hún fyrir löngu búin að setja Interpol í málið.

 

Það er ótækt að Bjórúlfur Thor og aðrir kennitöluflakkandi útrásargosar skulu fá að ganga um "blankir" á Íslandi en moldríkir í útlöndum á meðan þjóðinni blæðir út af þeirra völdum. Þeir eiga Hvergi að fá að ganga lausir meðan á "rannsókn" málsins stendur, - "rannsókn" sem því miður mun aldrei hefjast af neinni alvöru ef íslenskir gjörspilltir stjórnmálalúðar fá að ráða.

Elín borin út úr bankanum

Sölvi rekinn af Stöð 2 og fyrrv. fjölmiðlafulltrúi Jóns Ásgeirs ráðinn í hans stað

Sölvi Tryggvason var rekinn af Stöð 2 og Sindri Sindrason fyrrverandi fjölmiðlafulltrúi Jóns Ásgeirs ráðinn í hans stað. Á hans fyrst degi í djobbinu var löng fjálgleg gljáborin umfjöllun um útrásarhetjuna og Glitnishluthafann Róbert Wessman. Svo kom löng frétt af pólförum (ekki bólförum) Þorsteins Más Baldvinssonar Glitnisgarps. Nú á sko aldeilis að taka til við að lappa uppá handónýta ímynd auðmannanna. Augljóst hvað er í gangi á þessum Baugsbæ. Til lítils að eiga fjölmiðlana ef maður notar þá ekki í sína þágu og vina sinna, jafnvel þó þeir séu reknir með tapi. Valdið, áróðurinn og heilaþvotturinn kostar sitt.

Eva Hauksdóttir í viðtali hjá mér á Sögu í dag

Gestur minn í þættinum "Miðjan" á Útvarpi Sögu FM 99,4 í dag, miðvikudag, kl. 16:00 - 18:00 verður hin ljúfa galdranorn og skáldkona og klári hugprúði aðgerðarsinni Eva Hauksdóttir sem lætur ekkert stoppa sig í baráttu sinni fyrir örlítið skárri heimi.

Sem norn hefur hún stungið títiprjónum á bólakaf í marga brúðuna og eitrað margt eplið og bruggað margan seiðinn og gengið undir margan stigann og séð margan kolsvartan köttinn hlaupa yfir götu og nóg er víst af spegla-og rúðuglerbrotum í búðinni hennar.

Margar áríðandi spurningar brenna á frostbitnum kjötvörum landsmanna varðandi mótmælin og annað, einsog t.d:

Næst ekki hugsanlega mestur árangur með því að þaga í ca hálft ár niðrá vinstri guðsgrænum Austurvellinum og mæna á Alþingishúsið með kröfuspjöld? "HELVÍTIS FOKKING FOKK" hefur nú alltaf gefist vel. Er ekki best að mótmælendur séu aðgerðarlausir einsog ríkisstjórnin og stjórnarandstaðan?

Getur hún Eva breytt Geir Haarde úr froski í mann? Jafnvel froskmann? Getur hún breytt Ingibjörgu í trúverðugan pólitíkus? Getur hún breytt afturhaldsvandamálaflækjunni í kollinum á Steingrími J. í lausnir? Tók Ólafur Ragnar aðgerðaráætlunina "Sveltum Svínið" nærri sér? Hvað er hann þungur í dag eftir mótmælin? Getur maður fengið skriðdreka á góðum kjörum hjá Amnesty International? Er grímulaust ofbeldi stjórnvalda betra en grímuklædd mótmæli aktivista? Ef það yrði sett í gang aðgerð sem bæri yfirskriftina "Grillum Grísinn," hvor myndi þá fara á taugum, forsetinn eða Bónusfamelían? Eða er það kannski sama tó-pakkið? O.s.fr. Margs er að spyrja ef margt á að vita.

 

Fyrri þætti má finna á:  www.stormsker.net

Atvinnumistakamaðurinn Bjarni Ármanns

Öll gerum við mistök, en aðeins örfá okkar hafa atvinnu af því að gera mistök og græða á þeim fúlgur fjár. Bjarni Fjármanns er einn slíkur lukkunnar pamfíll. Hann hefur gert svo mörg stór og glæst mistök í fjármálum að hann þarf aldrei að vinna meir. Inspector Cloueau hefði ekki haft roð við honum enda var sá gæi bara í því að reyna að gæta laga og reglu og sleppti öllu peningaklúðri. (Hér á Íslandi er bara einn lögreglumaður sem veit hvað er að vera "múraður" í vissum skilningi og það er sá kinnbeinsbrotni).

 

 

Bjarni birti merkilega grein í Fréttablaðinu á mánudaginn þar sem hann fer yfir stórkostlegan feril sinn í fjármálum sem er þakinn svo glæsilegum mistökum að hann varð milljarðamæringur fyrir vikið á aðeins örfáum árum. Kíkjum aðeins á nokkrar setningar Bjarna úr þessari grein, (orð hans eru skáletruð):

 

 

„Ég get verið sjálfum mér reiður fyrir að hafa tekið ákvarðanir í uppbyggingu kerfis sem ekki stóðst, en með þeim ákvörðunum verð ég að lifa."  (Auðvelt að lifa góðu lífi með mistökum sem voru milljarða virði, beint í lommen. Þjóðin verður hinsvegar að skrimta með þessum mistökum).

„Trú mín á krónuna."  (Þjóðleg mistök sem borguðu sig þá).

„Uppbygging launakerfis sem fór úr böndunum."  (Mjög gróðavænleg mistök)

„Hjarðhegðun sem leiddi til útlánaþenslu."  (Samtryggingarmistök).

„Í fjölmörgum atriðum hefur okkur því miður farist óhönduglega."  (Fagleg mistök).

„Í raun hlúðum við ekki að því hvernig við vildum að fjármálakerfið liti út í upphafi einkavæðingar."  (Heppileg mistök fyrir útrásarvíkinga).

„Þegar dreifðu eignarhaldi var kastað fyrir róða vorum við að búa til of sókndjarft kerfi." (Bráðnauðsynleg mistök fyrir útrásarbudduna).

„Samhliða þessu héldum við ekki úti nógu ströngu eftirlitskerfi."  (Afar heppileg mistök).

„Okkur tókst heldur ekki að skapa nauðsynlegar hefðir í fjármálageiranum, þrátt fyrir viðleitni þar að lútandi."  (Skiljanleg mistök).

„Trú mín og margra annarra á að markaðurinn gæti smíðað sitt eigið regluverk og framfylgt því reyndist ekki byggð á nægjanlega traustum grunni."  (Heillavænleg mistök).

„Nú er ljóst að sú umgjörð sem smíðuð var um fjármálageirann dugði ekki."  (Arðvænleg mistök).

„Skorti þar bæði á skilning okkar sem störfuðum í fjármálageiranum á því að lesa samfélag okkar og gæta samhengis við það."  (Ég-um-mig-frá-mér-til-mín-mistök).

„Sömuleiðis skorti á skilning stjórnmálamanna á starfsemi alþjóðlegra fjármálafyrirtækja og þar með hvers konar ramma þau þurfa að búa við."  (Samhjálparleg mistök).

„Við sem leiddum mismunandi þætti íslenska fjármálakerfisins sköpuðum of veikan grunn til að standast (alþjóðlegu) sviptingarnar. Þar gerðum við mistök í því að byggja upp of stórt kerfi á of skömmum tíma, reiða okkur á lítinn gjaldmiðil og peningamálastefnu sem ekki gat gengið til lengdar í heimi alþjóðaviðskipta."  (Banka-mannleg græðgismistök).

„Við létum einnig glepjast af hraða og skammtímaárangri og misstum þar með sjónar á langtímahagsmunum og gildum samfélagsins."  (Sömu græðgismistök).

„Ég og aðrir þeir sem unnu að framgangi fjármálageirans hljótum að viðurkenna mistök okkar, læra af þeim og nýta lærdóminn til að byggja upp til framtíðar."  (Sigurjón Þ. Árnason sem vann líka að „framgangi fjármálageirans" er t.d. farinn að kenna fjáglæf...fjármál í Háskólanum. Það kallast víst að "nýta lærdóminn til að byggja upp til framtíðar").

„Mikilvægt er að við náum að vinna okkur hratt út úr vandanum og byggja upp traust í samfélaginu á nýjan leik."  (Svo að hægt sé að arðræna þjóðina aftur og kreista síðasta blóðdropann úr henni. Allavega fara útrásargreifarnir ekki að borga til baka milljarðana sem þeir fengu í laun fyrir öll „mistökin").

„Mistök fortíðar leiddu okkur á þann stað sem við erum á núna."  (Í þriggja hæða lúxusvillu í útlöndum).

„Eins mikilvægt og það er að rannsaka ítarlega hvað gerðist, skiptir ekki síður máli að hver og einn horfi í eigin barm og bregðist við því sem hann þar finnur."  (Þjóðin á semsagt að gera sér grein fyrir mistökum sínum sem fólust helst í því að treysta mistækum útrásarbankamönnum sem ætluðu að láta það verða sín næstu og stærstu „mistök" að ræna orkulindunum).  

Þjóðin má ekki við fleiri skipulögðum "mistökum" auðmanna og stjórnmálamanna.

Kannski voru það mistök hjá Bjarna Fjármanns vini vorum að skrifa þessa grein.

 

 

 

 

Þorvaldur Gylfason kosinn maður ársins á Útvarpi Sögu

Undanfarin ár hafa Íslendingar verið álíka glámskyggnir og mennirnir sem þeir hafa valið sem Mann Ársins á útvarpsstöðvunum. Þeir kusu Ólaf Ragnar mann ársins á Sögu fyrir 5 árum fyrir að neita að staðfesta fjölmiðlafrumvarpið. Það fannst kjósendum bráðnauðsynlegt og stórkostlegt afrek sem bæri að verðlauna alveg sérstaklega.

 

Svo kusu þeir gamla góða Villa fyrir að hafa náð að verða borgarstjóri. Það þarf náttúrulega alveg sérstaka hæfileika til að komast í það djobb, og eitt gott hnífasett. Aðeins um 10 manns gegna þessu djobbi árlega svo það hlýtur að þurfa mikinn garp til að ná að troða sér í þennan heita stól.

 

Í fyrra var svo Jóhannes í Bónus valinn maður ársins á Sögu fyrir vel heppnaða útrás og ólýsanlega viðskiptasnilld. Þetta var víst maðurinn sem kjósendur sammæltust um að hefði gert mest fyrir heimilin í landinu. Grínlaust.   

 

Nú bregður hinsvegar svo við að það er kosinn heiðarlegur maður, - maður sem á þetta skilið, hagfræðingurinn góði Þorvaldur Gylfason. Þar fer gáfaður, víðsýnn og framsýnn maður sem er vel að þessu kominn, - þótt fyrr hefði verið. Á þennan mann hafa Íslendingar ekki nennt að hlusta undanfarin ár en eru núna fyrst farnir að opna eyrun þegar allt er hrunið. Væri óskandi að fá hann sem forsætis - eða fjármálaráðherra í næstu stjórn. Utanþingsstjórn vel að merkja.

 

Á ríkisdiskótekinu Rás 2 var Hörður Torfason valinn maður ársins fyrir að handvelja menn sem mega tala á Austurvelli. Fast á hæla honum kom afreksfólk einsog Jón Ásgeir forstjóri Baugs, Jóhannes í Bónus stjórnarmaður Baugs, Imba Solla talsmaður Baugs og Ólafur F. fyrrverandi borgarstjóri fyrir að hafa staðið vörð um flugvöllinn sem sker í sundur Reykjavík og fyrir að hafa eytt milljarði af peningum borgarbúa í tvo samantjaslaða vinnuskúra við Laugaveg. Þetta er fólkið sem hlustendum Rásar 2 finnst hafa skarað frammúr á nýliðnu ári. Það er nefnilega það.

Kannski hafa Íslendingar ekki lært svo mikið þrátt fyrir allt. Veit það ekki.

Ég óska allavega Þorvaldi Gylfasyni til hamingju með vel unnin störf undanfarna áratugi og megi vegur hans verða sem mestur. 

 

 

Nú árið er liðið, sem betur fer

Núna erum við að sprengja burt gamla árið en á þessu nýja munum við vonandi sprengja burt gamla hyskið. Sprengjugnýrinn hér fyrir utan lætur sem fuglasöngur í mínum eyrum.

Árið sem nú er að líða byrjaði illa með áramótaávarpi forsætisráðherra og forseta en endaði nokkuð vel með huggulegum mótmælum. Árið endaði semsagt nokkuð gleðilega og vonarstyrkjandi þrátt fyrir árámótaskaupið. Þótt árið sé liðið þá er fárið ekki liðið, en á nýju ári verður vonandi stjórnarliðið og spillingarliðið liðið.

Myndin sem ég læt hér fylgja er áramótakveðja mín til gamla Íslands. Megi gott og byggilegt Ísland upp rísa. Undir okkur sjálfum komið, ef við náum að parkera þýlyndinu.

"Gleðilegt" og "farsælt" komandi ár. Það má eitthvað mikið gerast ef að þessi ósk mín á eftir að rætast, - en vonandi gerist eitthvað Mikið.

Sögufölsun forsetans

 

Fyrir bankahrunið var vefsíða forsetans (www.forsetinn.is) alveg kjaftfull af mærðarlegum útrásarræðum og ljósmyndum af Óla Grí(m)s í faðmi útrásarvíkinganna. Nú er þar ekkert slíkt að finna. Svínslegt. Allt autt einsog veski fólksins og heilabú stjórnmálamannanna. Það eru ekki bara bankamenn og "eftirlitsstofnanir" sem eru í svitabaði við að eyða gögnum. Það er búið að hvítþvo allt og afmá öll vegsummerki um útrásaróráðið af vefsíðu forsetans rétt einsog hann hafi aldrei staðið á torgum út um allan heim einsog hani á fjóshaug og lofsungið viðskiptasnilld Jóns Náskers og annarra útrásargarpa.

 

Óli G. heldur að það sé skynsamlegast að henda hitamælinum þegar fer að kólna og þá komist allt í gott lag. Munurinn á hreingerningum forsetans og bankamannanna er að það vita allir allt um þær óþægilegu upplýsingar sem forsetinn er að fleygja í ruslið einsog hann eigi lífið að leysa. Það er ekki nema 8 mánuðir síðan hann veitti Jóni Náskeri og Baugi útflutningsverðlaun með pompi á prakt á Bessastöðum og jós yfir þá orðum og lofi af svo miklu kappi að það þurfti að leggja hann dauðþreyttan og kófsveittan inn á spítala á eftir:) 

 

Í haust þegar ljóst var að útrásaraularnir höfðu sett landið á hausinn þá lét hann fjarlægja 60 síður af lofi og skrumi um þá úr bók sinni Saga af forseta. Hvað er þetta þá annað en Lygasaga af forseta, eða Hálfsannleikur um forseta? Þó að skítnum sé sópað undir teppið þá er hann ennþá til staðar og þó að líkunum sé troðið inn í skáp þá minnkar nályktin ekkert við það.

 

 

Maður sem blóðskammast sín fyrir embættisverk sín getur ekki furðað sig á því að þjóðin skuli blóðskammist sín fyrir hann. Fyrsta orðið sem kemur uppí hugann þegar talið berst að forsetanum og útrásarnáhirðinni í kringum hann er: Landráðamenn. Grísinn á að yfirgefa samkvæmið og segja af sér með jafn miklum hraði og hann reynir að afmá tengsl sín við Bónussvínið.

Jón Gerald Sull. og Ljónynja Ben

Ég lofaði víst bloggurum og öðrum að láta vita af endurflutningi tveggja tíma viðtals sem ég átti við þau Jón Gerald Sullenberger og Jónínu Ben 17. des. Það er efnt hér með. Viðtalið verður endurflutt á Útvarpi Sögu fm 99,4 kl. 20:00 í kveld. Þarna kom margt fram sem þau hafa ekki verið að tjá sig um í fjölmiðlum fram að þessu, svo sem Stím, FL-turninn, fyrirhugaða giftingu og taumlausa ást þeirra á Stormskerinu. Þetta er eitthvað sem maður verður bara að lifa með. Ég vissi alltaf að það væri eitthvað á milli þeirra en hafði ekki hugmynd um að það væri ég. Þó ég hefði óskað að Jón Gerald hefði brugðið sér frá í korter eða svo þá verð ég að segja að þau tvö eru með bestu viðmælendum sem ég haft í mínum þætti og var þó O. J. Simpson góður.

 

Vil nota hér tækifærið og biðja mína gömlu góðu brjóstgóðu vinkonu Arnþrúði Karls afsökunar á því að hafa gert því skóna að hún hafi ekki endurtekið þáttinn nema 4 sinnum.  Hún er búin að endurtaka hann 5 sinnum. En sem ég segi: Næsti endurflutningur verður kl. 20:00 í kveld, sunnudagskveldið 28. desember.

 

Fólk má hafa sínar skoðanir á Útvarpi Sögu en ég endurtek að ég hefði Aldrei fengið að taka tveggja tíma viðtal sem þetta á Baugsmiðlunum. No way. Þar á bæjum vita menn alveg nákvæmlega hvað má segja og hvað ekki.

 

Bónusgrísirnir reyndu vitaskuld að eignast Sögu á sínum tíma einsog alla aðra fjölmiðla en Adda strækaði á það, sem betur fer. Hún hefur svosem ekki farið hörðum höndum um Bónerana en hvað sem um Sögu má segja þá held ég að hún sé síðasta vígi frjálsrar fjölmiðlunnar. Meiraðsegja Ástþór með öll sín augu fær að tala þarna án þess að orð hans séu slitin úr samhengi og honum gefið á snúðinn

 

Ef fólk rýnir hlutlaust í orð þeirra Jóns Geralds og Jónínu um Baugsvibbann og sleppir öllum samsæriskenningum um þau þá munu augun opnast svo mikið af undrun að Ástþór mun virka píreygður.

Röddum þessarra tveggja "erfiðu" manneskja hefur um áraraðir verið drekkt í mareneringu gróasagna og rugls og þau sproksett sem holdtekjur öfundsýki, haturs og beiskju, en ég held hinsvegar að þau munu geta tekið undir með Steini:

 

Eitt sinn upp skal rísa

mín öfugt kveðna vísa

og fólksins leiðir lýsa

lengra en augun sjá.

 

 

 

Sagnfræðingurinn Imba Solla verður fjármálaráðherfa

Það verða að sjálfsögðu engar afsakanir eða afsagnir í ríkisstjórninni en hugsanlega einhverjar hrókeringar. Imba er víst orðin langþreytt á pönnukökubakstri út um allan heim og vill komast í spikfeitt djobb þar sem hún getur hvílt sig og sofið allan liðlangan daginn. Flottustu svefnherbergin eru Fjármálaráðuneytið og Viðskiptaráðuneytið. Mun meiri líkur eru á að hún velji Fjármálaráðuneytið þar sem það ku víst vera mun fínna og virðulegra "djobb," þótt þess hafi kannski ekki sést merki í tíð Árna Matt.

 

Imba sagnfræðingur verður semsagt fjármálaráðherra og hrossalæknirinn Árni Matt verður þá líklegast utanríkisráðherra. Fagleg sjónarmið eru að sjálfsögðu látin ráða í þessu sem öðru hér á landi. Hinn heimspekimenntaði viðskiptaráðherra, Björgvin G., fer svo hugsanlega í Iðnaðarráðuneytið og ýsukynlífsfræðingurinn Össur Skarpi, sem nú er iðnaðarráðherra, væri þá tilvalinn sem viðskiptaráðherra. Svona á þetta að vera. Réttir menn á réttum stöðum. Fagmennskan í fyrirrúmi. Nú vantar bara Valda koppasala sem heilbrigðisráðherra og allt er fullkomnað. Verst að hann skuli vera óflokksbundinn.

 

Það er reyndar óþekkt í öðrum löndum að menn séu skipaðir í fagráðuneyti sem hafa ekki sérfræðimenntun til þess en við þurfum ekki á slíkum reglum að halda og síst af öllu á tímum sem þessum. Við erum Íslendingar. Við kunnum þetta. Við erum stoltir víkingar og hlustum ekki á heimskra manna ráð, hvort sem þau koma frá IMF, ESB eða whatever. Þetta eru allt útlenskir fávitar og við verðum að halda reisn okkar sem sjálfstæð þjóð.

 

Okkur var t.d. ráðlagt snemma árs af fjölmörgum erlendum sérfræðingum að auka gjaldeyrisforðann í einum grænum svo allt færi ekki hér til helvítis þegar tæki að syrta í álinn og okkur var ráðlagt að leita til IMF í vor en að sjálfsögðu hlustuðum við ekki á þessi útlensku erkifífl. Guði sé lof. Annars værum við í vondum málum. Stolt okkar hefði þar að auki beðið hnekki.

 

Eftir 6 krísufundi í Seðlabankanum sagði Imba orðrétt: „Hér er engin kreppa." Svona manneskju er nauðsynlegt að fá í Fjármálaráðuneytið. Þegar okkur var sagt á svipuðum tíma að ástandið hér minnti mikið á kreppuna sem reið yfir Asíu fyrir nokkrum árum þá svaraði ríkisstjórnin í einum kór: „Ísland er ekki Thailand." Hér giltu nefnilega séríslensk lögmál. Og séríslensk lögmál kalla á séríslenskar reglur í hagstjórn landsins. Segir sig sjálft. Þessvegna er gott að hafa hér draumlyndan heimspeking sem viðskiptaráðherra, sagnfræðing sem utanríkisráðherra, skriðdýralækni sem fjármálaráðherra og gullfiskakynlífsfræðing sem iðnaðarráðherra, - já þessvegna er hér valinn maður í hverju rúmi. Steinsofandi í hverju rúmi.

 

Eftir kosningar fáum við svo vonandi yfir okkur ekki minni sérfræðinga, t.d. Steingrím J. Bjarnfreðarson. Hann er með hvorki meira en 5 háskólagráður: Jarðfræði, uppeldisfræði, kennslufræði, forsjárhyggjufræði og afturhaldskommatittsfræði.  Getur ekki klikkað. Hann studdi gjafakvótakerfið á sínum tíma og vill hér kröftuga netlögreglu og einsog allir vita barðist hann hatramlega á móti því að bjór yrði leyfður hér á landi og greiddi atkvæði gegn frumvarpinu, en þegar hann var spurður að því nokkrum árum síðar hvaða atvinnuuppbyggingu hann sæi fyrir sér fyrir utan stóriðju þá nefndi hann bjórverksmiðju.

 

Okkar vantar svona flokk einsog Vinstri græna sem er samkvæmur sjálfum sér og kann að hugsa fyrir fólkið. Ekki skemmir svo fyrir flokknum að hafa fólk einsog Sóleyju Tómasdóttur og Kolbrúnu Halldórsdóttur í forystusveitinni. Kolbrún er leikari að mennt og gæti því sómt sér vel sem viðskiptaráðherfa. Sóley er hinsvegar með BA í uppeldisfræðum og væri því skotheld sem fjármálaráðherfa. Við þurfum ekki að hafa nokkrar áhyggjur af framtíðinni þegar svona spesíalistar komast til valda - því þá verður hugsanlega engin framtíð til að hafa áhyggjur af.  

 

Sjá frétt um Imbu Sollu HÉR

Þegar tröllheimsku prestarnir stálu jólunum

 

Krakkar trúa á jólasveininn og fullorðnir trúa á Ésú. Enginn teljandi munur á þessu nema hvað jólasveinninn er mjög viðfelldin fitubolla með betri fatasmekk og hefur ekki hótað neinum helvítisvist einsog arabíski sandalagæinn. Fyrir nokkrum árum tók íslenskur pokaprestur uppá því að ljúga því að krökkunum að jólasveinninn væri ekki til og rændi þau þannig jólunum. Hann vildi fyrir alla muni að þau tryðu því frekar að einhver heilagur andi hefði dúndrað Mæju mey fyrir 2000 árum og hún fætt fyrirbrigðið Ésú sem hefði verið bæði maður og guð og þessi galdrakarl hefði verið rosalega fær í faginu og gert flottari töfrabrögð en David Blaine og David Copperfield báðir til samans en svo hefði fólk orðið þreytt á sjóinu hans og neglt hann uppá kross sér til dundurs og stungið hann í vömbina til öryggis svo hann yrði ekki með neitt comeback og fleygt honum síðan steindauðum inní helli einsog hverjum öðrum kartöflupoka, en á þriðja degi hefði hann sprottið upp fjallfrískur og alveg hreint í banastuði og skotist upp í himininn einsog skiparagetta og tyllt sér niður til hægri handar við hliðina á guði almáttugum sem var jafnframt hann sjálfur og "þeir" síðan tekið til við að dæma lifendur og dauða á fullri ferð einsog einhverjir pirraðir Bónusfeðgar.

Þetta kallaði pokapresturinn að "segja börnunum Sannleikann." Yeah, right.

 

Þess má geta að um 5 milljarðar af skattpeningum landsmanna fara árlega í þessa kristilegu speki og allt þetta kirkjumambó og þar má allsekki skera niður um eina krónu. Meiru jólasveinarnir þessir prestar og stjórnmálamenn, - atvinnulygarar ríkisins. Það má tæta niður menntakerfið og framleiða þannig ennþá fleiri jólasveina en hinsvegar má ekki hrófla við kirkjunni og öllu hennar bruðli og rugli. Það má ekki einusinni láta kirkjurnar koma að gagni sem húsaskjól fyrir heimilisleysingja, sem verður víst nóg af innan nokkurra mánaða. Nei, þær eru víst allar kjaftfullar af heilögum anda. Hræsnanda. 

 

 

 

 

Something magic

 

Ég lít í anda Ésú

engjast á krossinum.

Maður eða guð?

Veit það ekki.

En eitt veit ég:

Það hangir eitthvað á spýtunni.

 

 

(Úr ljóðabók minni "Með ósk um bjarta framtíð," 1997)

 

Heiðarlegur prestur „eyðilagði jólin fyrir börnunum“

Land-Ráðamenn biðja um blóð

 

Það er deginum ljósara að stjórnmálaslúbbertarnir ætla sér að varpa öllum byrðunum á beinabert bogið bak þjóðarinnar. Á tyllidögum fjasa þeir um mannauðinn og gildi menntunnar og bla bla bla, en þá loksins þessir jarðsambandslausu aular þora að taka ákvarðanir þá miða þær allar að því að skera niður í mennta - og heilbrigðiskerfinu og sökkva fólki dýpra í skuldafenið og flæma það úr landi. Á sama tíma moka þeir undir taðgatið á sjálfum sér og geta ekki einusinni drullast til að afnema eftirlaunafrumvarpið með öllu. Það tók korter að keyra það í gegnum þingið en er búið að taka 5 ár að skralla efsta lagið ofanaf því þrátt fyrir loforð Samspillingarinnar um algert afnám þess. Þessir bananar eru bíða eftir einhverju miklu harðarara en snjóbolta í galtóman hausinn.

 

Þeir sýna engan vilja til að taka á úrásaröpunum og það gefur fólki skiljanlega þær hugmyndir að þeir sjálfir séu maðkétnir og gjörspilltir og innvinklaðir í bankasorann og að þeirra eigin pöddur hvíli undir hverjum þeim steini sem þeir eru sífellt að lofa að velta við. Það eru nær 3 mánuðir frá hruninu og enn eru menn að "rannsaka" sjálfa sig og enn kemur Björgvin G. af fjöllum einsog rammvilltur jólasveinn í öllum málum og enn er Geir fálmandi og hikstandi einsog blindur róni og enn eru gefin loðin svör og fólki haldið í þoku og óvissu og enn er "verið að skoða málin" (stinga þeim undir stól) og enn eru málin "í ákveðnum farvegi" (í pappírstæturunum) og enn sitja sömu strumparnir í bönkunum og enn láta hákarlarnir greipar sópa um allt fémætt sem eftir er í brunarústunum og enn hrýtur Fjármálaeftirlitið og enn ganga útrásarhryðjuverkamennirnir lausir.

 

Forsetinn, sameiningartákn útrásarþjófanna, býðst í auglýsingaskyni til að fá laun sín lækkuð úr tæpum tveimur milljónum í 1700.000 í stað þess einfaldlega að gefa helming þeirra þegjandi, hljóðalaust og skrumlaust í Mæðrastyrksnefnd. Ýldustækjan er kæfandi hvert sem fólk rekur nefið. Þorláksmessukötustækjan virkar sem rósaangan í samanburði. Aðstæður núna eru kjörnar til allsherjar hreingerninga og uppstokkunar en engu skal breytt. Öllu skal sópað undir teppið. Allt verður við það sama. Enginn banani skal fá að falla til jarðar af lýðveldistrénu. Það á greinilega að halda þjóffélaginu áfram í heljargreipum spillingar, óréttlætis, fúsks, yfirstéttarhagsmuna og heimsku. Fólk sér í hendi sér að það mun ekkert breytast. Kosningafyrirkomulaginu verður ekki breytt. Persónukjöri verður ekki komið á. Eftir kosningar munum við fá yfir okkur sama ógeðslega horið, - bara úr vinstri nösinni.

 

Auðvitað mun sjóða uppúr. Það ætti allavega að gera það. Pottlokið ætti að festast við loftið ekki seinna en í febrúarber. Ef að Íslendingar væru ekki þolinmóðustu lindýr jarðarinnar þá stæðu hús útrásartalíbananna og land-ráðamannanna í björtu báli eftir áramót og Alþingishúsið flygi í 30 þúsund fetum yfir Austurvelli. Stjórnmálamenn treysta því að þjóðin láti bjóða sér ALLT. Vonandi hafa þeir ekki rétt fyrir sér.

 

PS: Skellti inn jólalagi eftir mig frá 1987 í tónlistarspilarann, Söngi veiðimannsins, lagi sem var bannað á sínum tíma af einhverjum ástæðum.

"Gleðileg" kreppujól.

Óttast að uppúr sjóði

Hver er glataðasti fjölmiðill ársins?

 

Það er hæpið að setja alla íslenska fjölmiðla undir sama hatt og afskrifa þá alla sem vonlaust rusl. Íslenskir fjölmiðlar er misvonlausir einsog annað rusl. Þeir eru flestir mjög sérhæfðir. Sumir hafa sérhæft sig í hagsmunagæslu fyrir eigendur sína, aðrir í mannorðsmorðum og aðrir í hvortveggja o.s.fr. Enginn þeirra hefur ráð á kröftugri rannsóknarblaðamennsku, en kannski vantar ekki bara peninga heldur líka metnað og krítíska hugsun.

Þótt Agnes Bragadóttir hjá Mogganum sé ekki óskeikull dýrðlingur þá hefur hún engu að síður verið meira vakandi og unnið þarfara starf undanfarna mánuði en samanlagðar eftirlitsstofnanir landsins frá upphafi, og það væri óskandi að fleiri væru með svona gott nef.

Í Bandaríkjunum er frægur sjónvarpsþáttur sem kallast 60 mínútur en ég efast um að við Íslendingar gætum gert sambærilegan þátt sem héti 60 sekúntur.

Á flestum fjölmiðlum má ekki halla orðinu á einhverja tiltekna klíku, hvort heldur það eru ákveðnir auðmenn, stjórnmálaflokkur eða eitthvað þaðan af verra. Allir verða alltaf að tilheyra einhverju liði. Án þess að ég ætli að fara að leggja dóm á tiltekna fjölmiðla þá hafa tilaðmynda margir talað um Ríkissjónvarpið sem Bláskjá og að Björgólfsfeðgar njóti þar sérstakrar friðhelgi vegna vilyrðis sem þeir gáfu um 300 milljóna styrk, og aðrir hafa bent á að Bónusfeðgar njóti sérstakrar friðhelgi í DV, Fréttablaðinu, Bylgjunni, Stöð 2 og á Útvarpi Sögu. Hvað Útvarpi Sögu viðkemur þá hefur gomma fólks haft samband við mig og fullyrt að ástæðan fyrir því að síðasti þáttur minn með Jónínu Ben og Jóni Geraldi Sullenberger hafi ekki verið endurfluttur á kristilegum tíma þegar venjulegt fólk er vakandi sé sú að það megi greinilega ekki halla orðinu á Baug og Bónusfeðga á þessari ágætu útvarpsstöð. Ég hef svarað því til, einsog satt er, að ég hafi einfaldlega ekki hugmynd um ástæðuna fyrir þessu og beðið fólk um að hafa samband vð manneskjuna sem geti svarað þessu, Arnþrúði Karls.

Allskonar feðgar virðast vera í einhverju sérstöku uppáhaldi fjölmiðla. Á einni sjónvarpsstöðinni má t.d. ekki halla orðinu á himnafeðgana án þess að allt fari til helvítis.

Nú og svo eru fjölmiðlar sem sérhæfa sig sem plötusnúðar. Mörgum finnst t.d. stórskrítið að ríkið sé að reka diskótek einsog Rás 2 og hafa kvartað yfir því að Bubbi sé þar spilaður 10 sinnum á dag á meðan öðrum tónlistarmönnum, sem sumir hverjir eru jafnvel mun vinsælli, sé ýtt út af borðinu og fá ekki að heyrast. Það má allavega undrun sæta að Ríkisútvarpið, sem er með 3000 milljóna forskot á frjálsu fjölmiðlana, skuli þurfa að láta afskrifa skuldir og sé alltaf með allt í buxunum. Yfirbyggingin er greinilega allt of mikil og þar á bæ hlýtur hreinlega að viðgangast óhemju bruðl, sem sannar kannski kenninguna góðu um að menn fara betur með eigið fé en annarra.

Þó að fjölmiðlafrumvarpið hafi ekki verið alfullkomið frekar en önnur mannanna verk þá er dapurlegt að forsetinn, sem er í boði Baugs, skyldi hafa synjað því staðfestingar. Allt að því glæpsamlega vitlaust. Hefði þjóðin, sem er í boði Baugs, fengið að kjósa um þetta nauðsynlega frumvarp á sínum tíma þá hefði 90% hennar hafnað því vegna þess hún virtist gjörsamlega heilaþveginn af Baugsmiðlunum, og er kannski enn. Veit það ekki. Allavega held ég að þjóðin geti verið sammála um það að flestir fjölmiðlar hafi verið steinsofandi á gróðæristímanum (einsog hún sjálf) og þeir steingleymt að sinna hlutverki sínu, sem er að vera gagnrýnir á ríkjandi ástand og vera ávallt í sjórnarandstöðu.

Hér til vinstri á síðunni hef ég skellt inn þremur skoðanakönnunum þar sem ég spyr: Hvert er glataðasta dagblað ársins? Hver er glataðasta útvarpsstöð ársins? Hver er glataðasta sjónvarpsstöð ársins?   

(Fái einhverjir fjölmiðlar ekkert stig þá er það ekki endilega merki um það að fólki finnist þeir ekki glataðir heldur að því finnist aðrir fjölmiðlar ennþá glataðri).